Tau Fakakiteaga he Tau Mena Nakai Kitia he Lagi

KO IEHOVA NE TOKOLUGA UE ATU

“Ko e nofoaiki kua tu mai ke he lagi, kua nofo foki e taha ke he nofoaiki; Ko ia foki kua nofo ai kua tuga e maka iasepi mo e salikea hana a tino mai; kua agaagai foki e nofoaiki he tagaloa tuga e samaraki hana tino mai.”​—Fakakiteaga 4:2, 3.

“Ne ha i ai foki e kikila ne agaagai ai. Tuga ne tino mai e tagaloa ke he aolagi ke he aho uha, ne pihia e tino mai he hana kikila ne agaagai ai. Ko e hana tino mai ko e fakatai ia ke he lilifu a Iehova.”​—Esekielu 1:27, 28.

Ko e tau fakakiteaga nei ne tuku age ke he aposetolo ko Ioane mo e perofeta ko Esekielu, ne fakakite e lilifu ofoofogia ha Iehova ko e Atua Mua Ue Atu ne fakamaama ke he puhala kua maeke a tautolu ke iloa​—ko e makauho, ko e tagaloa, mo e nofoaiki lilifu. Talahau mai e laua e lilifu ue atu, fulufuluola, mo e mafola ha Iehova.

Ko e tau fakakiteaga nei he Atua kua lautatai mo e tau kupu he salamo ne tohi: “Ha kua homo a Iehova, ti lata ni ke fakaheke fakalahi kia ia; kua mua e matakutaku kia ia ke he tau atua oti. Ha ko e tau tupua e tau atua oti he tau motu; ka ko Iehova, ne eke e ia e lagi. Ha ha i mua hana e fakahekeaga mo e fulufuluola; ha he faituga hana e malolo mo e lilifu.”​—Salamo 96:4-6.

Pete kua Mua Ue Atu a Iehova, kua uiina e ia a tautolu ke liogi ki a ia mo e fakamafana ki a tautolu to fanogonogo mai a ia ki a tautolu. (Salamo 65:2) Kua fakaalofa lahi mo e leveki mai e Atua ki tautolu, ati maeke ai e aposetolo ke tohi mo e fakamooli: “Ko e Atua ko e fakaalofa a ia.”​—1 Ioane 4:8.

FAKALATAHA A IESU MO E ATUA

“Kua puke [e tutaki ko Setefano ko e Kerisiano] ke he Agaga Tapu, kua mataono ke he lagi, kua kitia atu e lilifu he Atua, mo Iesu ha ne tu ke he fahi matau he Atua; ti pehe mai a ia, Kitiala, kua kitia e au e lagi kua maihi mai, mo e Tama he tagata ha ne tu ke he fahi matau he Atua.”​—Gahua 7:55, 56.

He nakai leva e kitia e Setefano e fakakiteaga nei, ne tamate a Iesu ha kua fakaohooho he tau tagata ne tutala a Setefano ki ai, ko e tau takitaki Iutaia. Ne fakamooli mai he fakakiteaga kua moui a Iesu ti kua fakaliu tu mai mo e fakalilifu. Hagaao ke he mena nei, ne tohia he aposetolo ko Paulo: “Fakatu [e Iehova a Iesu] mai ia lautolu kua mamate, mo e fakanofo a ia ke he hana fahi matau ke he tau mena ha he lagi, Kua mua ke he tau iki lalahi oti kana, mo e tau pule, mo e tau toa, mo e tau iki, katoa mo e tau higoa oti kana kua talahaua, nakai kuenaia he mouiaga nai, ka kua hoko foki ke he mouiaga ne tatali.”​—Efeso 1:20, 21.

Lafi ke he fakamaamaaga ke he tuaga lilifu ha Iesu, ne fakakite mai he tau Tohiaga Tapu ko ia ne tuga a Iehova, ne mataala lahi ke leveki e tau tagata. He fekafekauaga ha Iesu he lalolagi, ne fakamaulu e ia e tau tagata gagao, fakamalolō e tau tagata kulikuli, mo e fakamomoui e tau tagata mamate. Ha kua foaki e ia e moui haana he mate, ne fakakite e ia e fakaalofa hokulo haana ke he Atua mo e tau tagata. (Efeso 2:4, 5) Kua nofo a Iesu mogonei he faahi matau he Atua, to nakai leva ti fakagahuahua e ia e pule haana mo e tamai e tau monuina mitaki lahi ke he tau tagata oti ne omaoma.

FEKAFEKAU E TAU AGELU KE HE ATUA

“Ne kitekite au [ko e perofeta ko Tanielu] ato tuku mai e tau nofoaiki, ne nofo ai foki [a Iehova] mai i tuai hana tau aho, . . . ko e afe ni e afe ne fekafekau kia ia, ti hogofulu e afe kua taki hogofulu e afe ne tutu ki mua hana.”​—Tanielu 7:9, 10.

Hagaao ke he fakakiteaga nei ke he lagi, ne loga lahi e agelu ne kitia e Tanielu. Ko e fakakiteaga ofoofogia mooli a ia! Ko e tau agelu ko e tau mena momoui fakaagaaga lilifu lahi, ne lotomatala mo e malolō lahi. Putoia ai foki e tau serafi mo e tau kerupi. Ne molea e laga 250 e totoku e tau agelu i loto he Tohi Tapu.

Ne nakai ko e tau tagata fakamua e tau agelu ne nonofo he lalolagi. Kua leva he tufugatia he Atua e tau agelu ato tufugatia e tagata. He fakavē ai e lalolagi, kua haia e tau agelu ne kitekite mo e kalaga fiafia.​—Iopu 38:4-7.

Taha puhala kua fekafekau e tau agelu fakamooli ke he Atua he fai vala ke he gahua aoga lahi kua taute ke he lalolagi mogonei​—ko e fakamatala he tala mitaki ke he Kautu he Atua. (Mataio 24:14) Kua kitia e putoia ha lautolu ke he gahua nei he fakakiteaga ne kitia he aposetolo ko Ioane, ne tohia: “Ne kitia foki e au e taha agelu kua lele ke he pulagi, ha ia ia e vagahau mitaki tukulagi ke fakamatala atu kia lautolu kua nonofo ke he lalolagi, mo e tau motu kehe oti, mo e tau magafaoa, mo e tau vagahau kehekehe, mo e tau motu.” (Fakakiteaga 14:6) Pete kua nakai vagahau e tau agelu ke he tau tagata he vahā nei tuga he vahā fakamua, kua lagomatai he tau agelu a lautolu ne fakamatala e tala mitaki ke hokotia ki a lautolu ne loto molū.

FAKAHEHĒ E SATANI E TAU MILIONA TAGATA

“Kua tau foki a lautolu he lagi; ko Mekaeli [Iesu Keriso] mo e hana tau agelu kua tau ke he tarako, ko e tarako foki kua tau a ia mo e hana tau agelu; Ka e nakai kautu a lautolu, ti nakai tuai moua foki ha mena ke he lagi ke nonofo ai a lautolu. Ti liti hifo ni e tarako lahi, ko e gata tuai haia, kua higoa ko e tiapolo, ko Satani foki ia, ko ia kua fakahehe e lalolagi oti; kua liti hifo a ia ke he lalolagi, kua liti hifo foki hana tau agelu fakalataha mo ia.”​—Fakakiteaga 12:7-9.

Ne nakai mafola tumau e lagi. He kamataaga he tagata, taha he tau agelu ne manako lahi ke tapuaki age ki a ia kua totoko ki a Iehova ti eke mo Satani, kakano ko e “Totoko.” Falu agelu foki ne fakalataha mo ia he mogo fakamui ke he totokoaga ia ne fakahigoa ai ko e tau temoni. Ha kua kelea muitui, ne favale lahi mahaki a lautolu he totoko ki a Iehova ti fakaohooho e tau tagata ke nakai omaoma ke he takitakiaga fakaalofa ha Iehova.

Ko Satani mo e haana tau temoni kua matahavala mo e favale. Kua matafī a lautolu ke he tau tagata ti fai vala ke he tau matematekelea loga he lalolagi. Ma e fakatai, ne kelipopo e Satani e tau manu mo e tau fekafekau he tagata tua fakamooli ko Iopu. Ti tamate foki e ia e tau tama toko hogofulu ha Iopu he fakatupu e “matagi lahi” ti veli e fale ki luga he tau tama. Mole ia, ne fakahoko foki e Satani ki a Iopu e “gagao fufula kelea, ne kamata mai he tau aloalohui hana, ti hoko atu ke he hana tumuaki ulu.”​—Iopu 1:7-19; 2:7.

Ka e nakai leva to utakehe a Satani. Tali mai he liti hifo a ia ke he lalolagi, ne iloa e ia “kua tote hana vaha.” (Fakakiteaga 12:12) To moumou a Satani, ti ko e tala mitaki mooli a ia!

KO LAUTOLU MAI HE LALOLAGI

“Ti fakafua foki e koe [Iesu] a mautolu ma e Atua . . . mai he tau magafaoa oti, mo e tau vagahau kehekehe, mo e tau motu, katoa mo e atu motu; Kua eke foki e koe a mautolu mo tau patuiki, mo tau ekepoa ke he Atua ha mautolu; kua eke foki a mautolu mo tau patuiki ke he lalolagi.”​—Fakakiteaga 5:9, 10.

Tuga ni he fakaliu tu mai a Iesu he lalolagi ke moui he lagi, to fai tagata foki ka pihia. Pehē a Iesu ke he tau aposetolo tua fakamooli haana: “Fano au ke taute taha mena ke nonofo ai a mutolu. . . . Ti talia mai foki e au a mutolu kia fakalataha mo au, kia nonofo ai a mutolu ke he mena ha i ai au.”​—Ioane 14:2, 3.

Ko lautolu ka o hake ke he lagi kua fai matagahua a lautolu. He fakalataha mo Iesu, ko lautolu ko e fakatufono he Kautu ka pule ke he tau tagata oti ne nonofo he lalolagi ti foaki ai e tau monuina ma lautolu. Ko e Kautu anei ne poaki a Iesu ke he tau tutaki haana ke liogi ke he liogi fakatai: “Ha mautolu a Matua na e, ha ha he lagi, kia tapu hau a higoa. Kia hoko mai hau a kautu. Kia eke hau a finagalo ke he lalolagi, tuga ne eke ke he lagi.”​—Mataio 6:9, 10.

KO E MENA KA TAUTE E LAUTOLU HE LAGI

“Ne logona foki e au [ko e aposetolo ko Ioane] e leo lahi mai he lagi; kua pehe mai, Kitiala, kua fakalataha mo e tau tagata e fale uta fano he Atua, . . . To holoholo kehe he Atua e tau hihina mata oti mai he tau mata ha lautolu; ti nakai tuai fai mate, po ke fakatutuku, po ke tagi, ti nakai tuai fai matematekelea; ha kua mole atu e tau mena fakamua.”​—Fakakiteaga 21:3, 4.

Ko e fakakiteaga fakaperofeta nei kua hagaao ke he magaaho he Kautu he Atua, ko Iesu haia mo lautolu ne fakaliu tu mai he lalolagi, ka fakaotioti e pule ha Satani mo e taute e lalolagi mo parataiso. Ko e tau mena ne fakatupu e mamahi mo e fakaatukehe ke he tau tagata to mole atu ai. To mole atu foki e mate.

Ka e kua e tau tagata ne totou piliona kua mamate mo e to nakai fakaliu tu mai ke he lagi? He maagaho i mua, to liu a lautolu ke momoui mo e amaamanaki ke moui tukulagi he Parataiso ia he lalolagi.​—Luka 23:43.