Ka Nakai Fakamooli e Hoa

“Fia mate au he pehē e taane haaku ko e toka fai e ia au ke fano mo e taha fifine fuata. Tuga kua hepe e tau mena oti, mua atu he manatu e au e tau foakiaga ne taute e au ma haana.”—Maria, Spain.

“Magaaho ne ofo ni kua toka he hoana haaku au, tuga na fai mena i loto ia au ne mate. Ko e tau mena ne manamanatu, amaamanaki, mo e fakatokatoka e maua kua moumou oti. Falu aho ne manatu au kua atāina mai he tupetupe, ka e liu ni au fakaatukehe foki.”—Bill, Spain.

KO E nakai fakamooli i loto he fakamauaga ko e tuaga mamahi lahi mahaki. Mooli, falu hoa ne maeke ke fakamagalo e hoa kua fakatokihala ti liu ati hake e fakafetuiaga ha laua.a Ka e pete ne matutaki e fakamauaga po ke nakai, ko e tau hoa mau ne iloa kua nakai fakamooli e hoa ha lautolu ne mamahi lahi tumau. Puhala fe kua maeke a lautolu ia ke fehagai mo e tau logonaaga mamahi ha lautolu?

TAU KUPU TOHI TAPU KA LAGOMATAI

Pete kua lahi mahaki e momoko, tokologa agaia e tau hoa ne fakamooli kua mafanatia mai he tau kupu Tohi Tapu. Iloa e lautolu na kitia he Atua e tau hihina mata ha lautolu mo e fakaalofa hofihofi noa ha kua mamahi a lautolu.—Malaki 2:13-16.

“Ko e tau manamanatu loga he haku a loto kua fiafia ai au ha ko e fakamafanaaga mai ia koe.”—Salamo 94:19.

“He totou e au e kupu ia, ne manamanatu au ki a Iehova nukua fakamafana mai au he loto mamahi, tuga e matua taane fakaalofa hofihofi noa,” he talahau e Bill.

“Kua mahani fakaalofa [fakamooli] a koe kia ia kua fakaalofa [fakamooli].”—Salamo 18:25.

“Ko e taane haaku ne nakai fakamooli,” he fakamaama e Carmen, ne fai mahina he nakai fakamooli e taane. “Ka e maeke au ke falanaki ke he fakamooli ha Iehova. To nakai fakatonoa e ia au.”

“Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole. . . . Ko e monuina [po ke mafola] foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu.”—Filipi 4:6, 7.

“Totou lagaloga e au e tau kupu nei,” he talahau e Sasha. “He lahi e liogi haaku, ne foaki mai he Atua e mafola ke he moui haaku.”

Ko lautolu oti ia ne talahau e tau tala i luga ne manako he falu magaaho ke tiaki ai. Ka e falanaki a lautolu ki a Iehova ko e Atua mo e moua mai e malolō he haana Kupu. Talahau e Bill: “Ko e tua haaku ati moua e au e kakano ke he moui haaku he magaaho ne tuga kua kelea e tau mena oti. Pete he fai magaaho ne fano au ‘ke he pahua he ata he mate,’ ne fakalataha e Atua mo au.”—Salamo 23:4.

a Ma e fakamaamaaga ke fakamagalo po ke nakai, kikite e tau vala tala he Awake! ia Aperila 22, 1999, “When a Mate Is Unfaithful.”

Puhala kua Fahia Mai e Falu

Manamanatu ke he tau kupu tohi mafanatia.

“Totou e au e tohi a Iopu ti holo ke he Salamo,” he fakamaama e Bill, “mo e fakamailoga e tau kupu oti ne tuga kua felauaki mo e tau tuaga ni haaku. Mailoga e au ko e tau tagata nei ne tohia e Tohi Tapu ne logona e mamahi mo e tupetupe tuga au.”

Moua e mafanatia he leo kofe.

“Ka nakai maeke au ke mohe he pō, ne fanogonogo au ke he leo kofe,” he talahau e Carmen. “Ko e punaaga lahi anei he mafanatia.” Pehē a Daniel: “Ne fakaako au ke tā e kitā ti ko e tau lologo kua lagomatai au ke moua e mafola mo e fakatotoka e loto.”

Tutala hagaao ke he tau logonaaga haau.

“Nakai mahani au ke tutala hagaao ke he tau logonaaga haaku,” he talahau e Daniel. “Ka e fai kapitiga mitaki au ti tutala ki a lautolu he tau aho oti. Ne tala age e au e tau logonaaga haaku, he tohitohi mo e tutala. Lagomatai mooli e mena ia.” Pehē a Sasha: “Aoga lahi e lagomatai he magafaoa haaku. Ha ha i ai tumau e matua fifine haaku. Ka manako au ke tutala, ne fai magaaho a ia ke fanogonogo. Taute he matua taane haaku au ke logona hifo kua ofania mo e haohao mitaki au, ti lagomatai e ia au ke liu fakahaga ke he tuaga haaku.”

Fakamalolō ke liogi.

“Liogi tumau au,” he talahau e Carmen. “Logona hifo e au kua tata e Atua ki a au, ti fanogonogo mai, mo e lagomatai au. He magaaho mamahi nei, ne fakatata lahi au ke he Atua.”