Maeke Ia Tautolu ke Taute e Tau Gahua Mua Atu
1 Kua fakakite he tau gahua mua ue atu e fekafekauaga a Iesu Keriso. Ne fagai fakamana e ia e tokoafe, fakamalolo e tokologa, ti fakatutu mai e falu he mamate. (Mata. 8:1-17; 14:14-21; Ioane 11:38-44) Ko e tau gahua hana ne mafiti e mailoga he motu katoa. Ka e, he afiafi fakahiku ato hoko hana mate, ne tala age a ia ke he tau tutaki fakamoli hana: “Ko ia ne tua mai kia au, to eke e ia ni e tau gahua ne eke e au; to eke foki e ia e tau mena ke mua ke he tau mena nai.” (Ioane 14:12) Taute fefe e tautolu e tau gahua kua “mua”?
2 He Lahi e Matakavi kua Gahua: Ko e takaiaga he gahua a Iesu ne kaupa ni ki Palesitaina, ka e ne tala age ke he tau tutaki fakamua hana ke fakamatala ke “hoko ni ke he fakaotiaga he lalolagi,” fano muatua atu he matakavi ne fakamatala a Iesu. (Gahua 1:8) Ko e gahua fakamatala ne kamata e ia kua hokotia ke he lalolagi katoa mogonei, he 232 e tau motu. (Mata. 24:14) Kua fakalataha katoatoa nakai a koe he gahua e matakavi ne kotofa ke he fakapotopotoaga hau?
3 Hokotia ke he Tau Tagata Tokologa: Kua toko gahoa e tau tutaki ne toka hifo e Iesu ke matutaki e gahua fakamatala. Pete ia, ko e fua he fakamatala fakamakai ha lautolu he Penetekoso 33 V.N., ko lautolu ne taofi mau e kupu moli ti papatiso ai ke he aho ia ne katoatoa ke he tolu e afe ia lautolu. (Gahua 2:1-11, 37-41) Ko e fakapotopoto ia lautolu “ne kotofa ke he moui tukulagi” kua matutaki mai ke he vaha ha tautolu, he kua papatiso e tautolu avelesi ke molea e 1,000 he aho. (Gahua 13:48) Kua taute nakai e koe e mena kua maeke ia koe ke hokotia ke he tau tagata loto fakamoli ke he tau matakavi oti mo e liu ahi atu fakamafiti ki a lautolu kua fiafia?
4 Lahi Agaia e Magaaho ke Fakamatala: Ne kaupa ni e fekafekauaga a Iesu he lalolagi ke tolu mo e hafa e tau. Tokologa ia tautolu kua leva atu e fakamatala. Pete ni e leva e fakaata ke matutaki a tautolu ke he gahua nei, kua fiafia a tautolu ke lagomatai e tau tutaki fou ke kamata ke he puhala kua takitaki ke he moui. (Mata. 7:14) Lahi nakai e mena hau ne taute he tau mahina takitaha ke he gahua he Iki?—1 Kori. 15:58.
5 Tumau e mauokafua ha tautolu ke he lagomatai ha Iesu ki a tautolu, to taute agaia ni e tautolu e tau gahua mua atu ko e hana tau tutaki moli.—Mata. 28:19, 20.