Kia Iloa Hau Tau Matakainaga
1 Ko e kapitiga moli, he talahau mai he Tohi Tapu ko e tagata ka mua e fetui mai he matakainaga, ka tumau e fakaalofa mo e fakamoli, mo e ka fakamafanatia hana kapitiga he tau magahala fakaagitau. (Fakatai 17:17; 18:24) To nakai ku e tau kapitiga pihia i loto he fakapotopotoaga kaeke ke fakamakai ke feiloaaki mo e fefakaalofaaki a tautolu.—Ioane 13:35.
2 Kua ha ha ai e tau magaaho ke fakamahani mo e tau matakainaga ha tautolu fakamua to kamata e feleveiaaga po ke ka oti ai. He ha he hau tuai mo e nofo he mogo fakamui ke olioli e matutakiaga mafanatia mo e hauhau? Lali ke tutala ke he tau matakainaga oti, katoa mo e tau momotua, ko lautolu ne lahi e mena iloa mo e fanau ikiiki po ko lautolu ne hehegi mai.
3 Kia Kamata Mua e Tutalaaga: Aua neke fakafeleveia atu ni hokoia e tau matakainaga hau. Maeke ia koe ke kamata mua e tutala ke he fakafitaaga he fonua, ke he manatu i loto he taha mekasini fou, po ke taha manatu ke he feleveiaaga ne oti laia. To iloa lahi e koe e tau matakainaga hau ka fanogonogo fakamitaki a koe ki ai, he fakamafana ki a lautolu ke tala ke he ha lautolu a tau fakafitaaga mo e tau mena hane ako e lautolu. Kua mua atu foki e mena ka iloa he huhu age ko e iloa fefe e ia a Iehova. Kua fakafita tuai e falu mo e tau mena loga he moui ne fakamalolo aki e tua, ka ko e falu haia he mogonei kua fakauka ke he tau tutuaga ne liga nakai kiki ki ai e tokologa. He mailoga e tuaga nei ka lagomatai a tautolu, ko e tau kapitiga moli, ke matatetotonu mo e gutugutu atu ke he levekiaga he falu.
4 Kia Fekapitigaaki: He mole e mate he tama he taha matakainaga fifine, ne momoko lahi a ia ke uhu e lologo Kautu hagaao ke he liu tu mai. Ne manatu e ia: “Taha mogo ne kitia he taha matakainaga ne nofo he taha fahi a au hane tagi. Ne hau a ia fakamalaga mai ki a au, mo e uhu tokoua e vala lologo ne toe. Kua pukeina e fakaalofa haku ma e tau matakainaga he o atu a mautolu ke he tau feleveiaaga, he mailoga ai ko e haia he Fale he Kautu e lagomatai ki a mautolu.” Kia fakakapitiga atu ke he ha tautolu a tau matakainaga he foaki age e fakamafanatia he magaaho kua lata mo e fakamaloloaga he tau magaaho oti.—Hepe. 10:24, 25.
5 He au atu e kelea he lalolagi tuai nei, kia lali ke iloa mitaki e tau matakainaga ha tautolu. Ko e feutaaki he tau fakamaloloaga moli nei kua eke mo fakamonuinaaga ma e tau tagata oti.—Roma 1:11, 12.