Kia Eke mo Kerisiano Fakamalolo
1 Loto fakaaue ha ia ha tautolu he kupu fakamaloloaga! Ko e ha tautolu ni a tau lolelole mo e tau mena vihi fakatagata kua fakatupetupe aki a tautolu. Lafi ke he mena nei kua foli a Satani mo e hana tau temoni ke moumou e mahani fakamoli ha tautolu. Ka ko e ati hake ha ia ke logona e talahauaga mitaki he loto fakaaue mai he tau matakainaga ha tautolu. He puke e lalolagi nei ke he hepehepe, ko e fakamalolo ke tumau ke tau fakalahi ma e tua, kua omoi a tautolu ke ‘pipiki mau ki a Iehova.’ Ha ha ia tautolu oti e kotofaaga he fakalataha ke he “fefakamafanaaki.”—Roma 1:11, 12.
2 Ha ko e nakai mitaki katoatoa mo e fakaohooho he lalolagi, kua mukamuka lahi a tautolu ke kamata e hagahaga kelea mo e tuhituhi ke he tau matakainaga ha tautolu. Fakalataha ai mo e laliaga, kua maeke ia tautolu ke fakatumau e kitekiteaga mitaki pete ni ka tutupu e tau mena uka po ke fakakite he falu e aga gugu. Kia lagomatai e tautolu e tua he falu he vagahau e “tau mena ke fefakamafanaaki.” (Roma 14:19) Loto fakaaue a tautolu oti ke he tagata totonu. Ko e tau tagata pihia kua fakatote e tau lolelole ha tautolu mo e talahau e tau mahani mitaki ha tautolu. Mafanatia a koe ko e tau motua mo e tau fekafekau lagomatai, tuga ni a tautolu oti kua nakai mitaki katoatoa, kua fakamalolo ka fakakite e tautolu e maamaaga pihia ki a lautolu. Ko e mitaki ha ia he tau gahua kua taute he tau matakainaga fakamoli nei ke lata mo tautolu! Kua ufiufi moli he fakaalofa e tau lolelole he tau matakainaga oti ha tautolu.—1 Pete. 4:8.
3 Ko e fefakamaloloaki ko e vala fiafia lahi he tau matagahua Kerisiano ha tautolu. Ko e heigoa falu puhala aoga ke fakatata e tautolu e manako ke lagomatai falu? Mataala ke he tau tutuaga kua lauia e tau matakainaga hau. Mailoga nakai e koe kua galo falu he tau feleveiaaga? Gagao kia a lautolu? Ka e kua a lautolu kua nakai fakalataha tumau ke he fekafekauaga he fonua? Fehagai kia a lautolu mo e tau mena vihi? Maeke ia KOE ke lagomatai! Fefe? He ahi tino atu, hea he telefoni po ke tutala ki a lautolu he tau feleveiaaga. Fakaata taha magaaho ke talahau falu talahauaga fakamalolo. Ko e falu kupu totonu ko e omoomoiaga moli ke he tau tagata maanu. Ko e moli he taute e koe falu laliaga ke fakakite e fiafia fakatagata kua foaki ai e fakamalolo. Pihia foki ka logona e koe e manako ke lagomatai, ka kumi puhala a koe ke foaki e lagomatai ke he falu, to lagomatai foki ki a koe.
4 Manatu ha ha ia tautolu oti e matagahua fiafia ke fefakamaloloaki. Maeke mogoia a tautolu ko e tau fakapotopotoaga kaufakalataha ke auloa he talahau: “Kia moua ai e tautolu e fakamafanaaga lahi . . . ke toto e amaamanaki kua tuku tuai ki mua ha tautolu.”—Hepe. 6:18.