Lagomatai he Tau Paionia e Falu
1 Ne pehe a Iesu: “Kua loga e tau saito ke helehele, ka ko e tau tagata gahua, kua tokogahoa a lautolu; kia olelalo a mutolu ke he Iki hana e tau saito ke helehele, kia fekau atu e ia e falu ke gahua ke he hana tau saito ke helehele.” Ha kua tokogahoa e tau tagata helehele he senetenari fakamua ka kua lahi mahaki e fonua ke helehele, ti kua lata ia Iesu ke fekau takitokotaha atu a lautolu ke uta e tala mitaki ke he tokologa. Nakai pihia, “kua fakafano atu [e ia] a lautolu ke takitokoua.” (Luka 10:1, 2) Ko e ha ne takitokoua?
2 Ko e tau tutaki ia na fou mo e nakai la mahani. He gahua tokoua kua feiloaaki a laua mo e fefakamaloloaki. Tuga he talahau e Solomona, “kua mua he mitaki e tokoua ke he tokotaha.” (Fakama. 4:9, 10) He mole e liligi hifo he agaga tapu he Penetekoso 33 V.N., ko Paulo, Panapa, mo e falu ne fakalataha mo e tau matakainaga kua tua ke he fekafekauaga. (Gahua 15:35) Ko e fakamonuinaaga lahi ma e falu ia lautolu ke fakamahani he tau tagata tane lotomatala pihia!
3 Fakaholoaga Fakaako kua Mitaki: Tuga ni e tau hoa he senetenari fakamua, ko e fakapotopotoaga Kerisiano fou ko e fakatokatokaaga fakamatala. Kua fakatoka mai foki ki a tautolu e fakamahaniaga. Ko e tau tagata takitokotaha, ko e manako mai he tau loto ha tautolu kua lata ke lauia mitaki e foaki he tala mitaki. Ti kua taute ai e lagomataiaga ke maeke he tau tagata fakailoa tokologa ke tolomaki ha lautolu a lauiaaga mitaki.
4 He Aoga Fekafekau he Kautu ne nakai la leva e hoko, ne fakailoa he Sosaiete e fakaholoaga ma e tau paionia ke lagomatai e falu he fekafekauaga he fonua. Kua lata kia e mena nei? E, kua lata. Molea e miliona he tau tagata fakailoa ne papatiso he tolu tau kua mole, ti tokologa ia lautolu nei kua lata mo e fakamahani ke lauia mitaki lahi ke he gahua fakamatala. Ko hai ka fakaaoga ke lata mo e manako ia?
5 Maeke he tau paionia fakatumau ke lagomatai. Kua foaki he fakatokatokaaga a Iehova ki a lautolu e fakatonuaga mo e fakamahaniaga kua lahi. Kua moua he tau paionia e hatakiaga ne hikihiki ke he tau manako ha lautolu ke he ua e fahi tapu he Aoga Fekafekau Paionia. Kua lagomatai foki a lautolu mai he tau feleveiaaga he tau leveki takaiaga mo e fahimotu, mo e mai he tau takitakiaga he tau motua. Pete ia nakai iloa mitaki oti e tau paionia tuga a Paulo mo Panapa, ka kua moua e lautolu e tau fakamahaniaga aoga, ne kua fiafia a lautolu ke foaki.
6 Ko Hai Ka Aoga Ai? Kua fakakaupa ni kia e fakaholoaga nei ke he tau tagata fakailoa fou po ke ke he tau tagata papatiso fou? Nakai pihia! Ha ha i ai a lautolu kua ikiiki mo lautolu kua momotua ne kua leva e iloa e kupu moli ka to fakaaue ke he lagomatai ke he falu puhala he fekafekauaga. Falu ne mitaki lahi mahaki he foaki e tau tohi ka e uka lahi ke liu ahi atu po ke kamata e tau fakaakoaga Tohi Tapu. Falu kua nakai uka ke kamata e tau fakaakoaga Tohi Tapu ka e kitia kua nakai holo ki mua e tau tagata fakaako ha lautolu. Ko e heigoa kua fakatolomuli aki a lautolu? Kua ole ke he tau paionia iloa lahi ke foaki lagomatai ke he fahi nei. Ko e falu paionia kua lauia mitaki he feaki e fiafia, kamata e tau fakaakoaga Tohi Tapu, mo e puhala atu e tau tagata fakaako fou ke he fakatokatokaaga. Ko e ha lautolu a iloaaga to lagomatai ke he fakaholoaga fou nei.
7 Mailoga kia e koe kua lavelave e setulu hau ti nakai fakaata ke hoko atu ke he tau feleveiaaga he fakapotopotoaga ma e fekafekauaga he fonua, pete he manako a koe? Kua liga maeke he paionia ke gahua mo koe ke he tau magaaho kua nakai ata e falu tagata fakailoa.
8 Lata e Fakalatahaaga Mitaki: Lagaua he tau, to taute he tau motua e tau fakatokatokaaga ma e tau tagata fakailoa kua manako lahi ma e lagomataiaga fakatagata ke taute e fakaholoaga Lagomatai he Tau Paionia e Falu. Ka talia e koe ke moua e lagomataiaga pihia, fakalataha mo e paionia fakailoa hau ne kotofa ke lagomatai a koe, taute e setulu kua aoga ma e fekafekauaga hau, ti tumau ki ai. Fakatumau ke he matafekau. He gahua tokoua a mua, kitekite e tau puhala kua lauia mitaki ke foaki e tala mitaki. Fokifoki ko e ha e tau feleveiaaga takitaha kua lauia mitaki. Manamanatu ke he tau lagomataiaga kua foaki he paionia fakailoa ke fakatolomaki aki e tutalaaga hau. He fakaaoga e koe e tau mena kua ako e koe, ko e tolomaki ki mua hau ke he fekafekauaga to kitia maali ai, ki a koe mo e falu. (Kikite 1 Timoteo 4:15.) Gahua tokoua tumau ka maeke, taute e tau puhala kehekehe he fekafekauaga, lauia foki e fakamatala nakai mautali he hagaaki ke he ha fahi pauaki ne kua lata ia koe ma e lagomataiaga fakatagata.
9 Ne fiafia e leveki fekafekau ka fai tolomakiaga. To fakakia tumau e ia mo e takitaki he Fakaakoaga Tohi he Fakapotopotoaga ke kitia e aoga hau mai he fakaholoaga. To lagomatai pihia foki he leveki takaiaga a koe ka ahi atu a ia ke he fakapotopotoaga.
10 Kua manako a Iehova ke he hana tau tagata ke fakamahani mo e ‘taute ke he tau gahua mitaki oti kana.’ (2 Timo. 3:17) Ono ke he fakatokaaga Lagomatai he Tau Paionia e Falu ko e foakiaga mitaki ke lagomatai a lautolu kua manako ke tolomaki ki mua ha lautolu a lotomatala ke fakamatala e kupu. Kaeke ko e kotofaaga hau ke taute ai, kia taute mo e fakaaue, fakatokolalo, mo e olioli.