Hikihikiaga he Tau Magaaho ne Poaki ma e Tau Paionia

¹ Kua fakaaue lahi a tautolu oti he tau gahua malolo he tau paionia tumau mo e fakaku he fakapotopotoaga. Pete ni he kaupa e fonua ti gahua fakamakutukutu tumau, kua fakatoka mai he tau paionia e fakafifitakiaga mitaki he ha lautolu a fekafekauaga fakamakutu he Kautu. Kua fakamafana e lautolu e tau tagata fakailoa oti ke lavelave tumau he kumi ai a lautolu ne “kotofa.”​—Gahua 13:48.

² Kua logona he Sosaiete e tau mena uka fakahaga ne kua fehagai he tau paionia, mua atu ni hagaao ke he ha gahua tupe ke fakata a lautolu ke tokaga e tau manako fakatagata ha lautolu ke taofi mau e fekafekauaga tumau. Pihia foki, ko e tuaga fahitupe ke he tau motu loga he vaha nei kua uka lahi ke he falu ke hu atu ke he gahua paionia, pete ni kua loto lahi a lautolu. Ha ha i ai he tau mogonei, kua kikite ai fakamitaki e tau mena nei mo e falu atu foki.

³ Ha ko e mena ia, kua tukutuku hifo mai he Sosaiete e tau magaaho poaki ma e tau paionia tumau mo e fakaku. Kamata ai he kalena 1999, ko e poakiaga ma e tau paionia tumau to tuku ke 70 e tula he mahina, po ke katoatoa e 840 e tula he tau. Ko e poakiaga he mahina ma e tau paionia fakaku to tuku ke 50 e tula. Ko e magaaho poaki ma e tau paionia pauaki mo e tau misionare kua nakai hiki, ha kua lagomatai he Sosaiete e levekiaga ke he tau manako fakatagata ha lautolu. Ko e mena ia, kua maeke a lautolu ke onoono fakalahi ke he gahua fakamatala mo e taute tutaki ha lautolu.

⁴ Kua amaamanaki ai ko e hikihikiaga nei he tau magaaho poaki to lagomatai ke fakalauka atu e tau paionia ke taofi mau e fekafekauaga lilifu uho nei. Kua lata foki ke hafagi aki ai e puhala ma e loga he tau tagata fakailoa ke hu atu he gahua paionia fakaku po ke tumau. Ko e fakamonuinaaga ha anei ki a lautolu oti he fakapotopotoaga!