Paionia—Fakaaoga Fakamitaki e Tau Magaaho ha Tautolu!
1 ‘Kua fita au he lavelave lahi mahaki! To pulotu moli nakai ki a au ke kamata paionia he magaaho nei?’ Manatu pihia e matakainaga fifine he fanogonogo ke he lauga he motua ne paionia he toloaga he takaiaga ne kua mataulu “Holo ki Mua ke he Fekafekauaga Paionia.” Ko e matakainaga tane tote he toloaga ia ne manatu, ‘Fai magaaho fefe a ia ke paionia? Nakai ko e motua au, ka kua fita e moui haku he lavelave!’
2 He matutaki atu e motua ke tutala ke he tau monuina he paionia, ne huhu a ia ke he tau paionia tokogahoa mai he takaiaga ke he tau hikihikiaga ne taute e lautolu ke maeke ke paionia ti fakamonuina fakaloga fefe e Iehova ha lautolu a tau laliaga. Taha ne matematekelea, taha ne nakai tua e hoa, ti taha ne toka e gahua fakalalolagi ka e fahia agaia ni ke paionia. Logona ai e kautuaga he tau paionia nei mo e lagomatai a Iehova, kua kamata e matakainaga tane mo e fifine he toloaga ke liu kumikumi ni ha laua a tau manamanatuaga mo e tau tutuaga. Uiina foki e mautolu a mutolu ke taute pihia, mua atu ha kua to hifo e tula ke paionia ti latatonu ke tokologa e tau tagata fakailoa he tala mitaki.
3 Iloa e tautolu ko Iehova e Tufuga mo e Pule Katoatoa he Lalolagi mo e Lagi Katoatoa ti kua lata ke foaki e tautolu e tau momoui ha tautolu ki a ia. (Tani. 4:17; Gahua 17:28) Kua maama ki a tautolu kua fakaaoga e Iehova taha ni e fakatokatokaaga. Kua monuina a tautolu ke fekafekau fakamoli ai, he lagomatai e “fekafekau fakamoli mo e loto matala” ke fakamatala e Kautu ato hoko mai e fakaotiaga. (Mata. 24:45; 25:40; 1 Pete. 2:9) Nonofo ai ke he “tau aho uka,” kua mailoga e tautolu kua tote lahi e magaaho ke fakamatala. (2 Timo. 3:1) Ka e mogonei, kua lata ia tautolu ke lagomatai e tau magafaoa ha tautolu ke he tau koloa. (1 Timo. 5:8) Ko e totogi he tagata kua nakai lahi tuga fakamua. Liga nakai tuga he vaha fakamua e malolo tino ha tautolu. Ti, ke fakamoli, kua manako a tautolu ke fai magaaho tote mo e fai koloa ke fakaaoga ki a tautolu ni. (Fakama. 3:12, 13) Ti kua manamanatu a tautolu kaeke ke tali atu ke he uiina ke paionia kua pulotu moli.
4 Ko e mena hake ni ia tautolu takitokotaha ke kumikumi fakamitaki ke he tau tutuaga ha tautolu ti fifili kua maeke nakai ia tautolu ke paionia. (Roma 14:12; Kala. 6:5) Kua fakamalolo ke mailoga e malikiti he numera ne kua tali atu ke he paionia. Pete ni e tau pehiaaga mo e tau mena vihi he tau aho fakahiku nei, kua fakakite he hokotaki he fekafekauaga ne tohi he 1999 Yearbook kua tata ke he 700,000 he tau tagata a Iehova he lalolagi katoa hane holo ki mua ke he fekafekauaga paionia. Pete he fekafekau he tau tutuaga uka fakatupe, nakai fai peleo afi, moua he tau gagao, po ke fehagai mo e tau vihi mo e uka, nakai lolelole e tau matakainaga nei he taute e mena kua mitaki, ti kua nava lahi ke he mena nei. (Kala. 6:9) Kua talia e lautolu e manako a Iehova ke kamatamata a ia. (Mala. 3:10) Kua logona e lautolu ko e paionia ko e fakaaoga pulotu lahi he magaaho ha lautolu ne toe mo e tau koloa ti kua fakamonuina moli e Iehova a lautolu he taute e tau hikihikiaga kua lata ke hu atu mo e fakatumau ke he gahua paionia.
5 Fakamonuina Tuai e Tau Paionia: Ko e matakainaga fifine i Kamerono kua ha ha ai e tama fifine tote lahi kua fakamaama: “Tali mai he fanau e tama fifine haku, kua faihoani tumau e ia au ke he fekafekauaga. Ato iloa a ia ke fano, ne fafa e au a ia he tua, he pipi aki e kalaie. Taha pogipogi he fekafekauaga, ne tu au he kala hala. Ne toka he tama haku au, he uta falu mekasini he kato haku. Ne lakalaka atu a ia ke he taha kala hala. Pete ne nakai lahi e mena kua vagahau e ia, ne futiaki e ia e onoonoaga he fifine mo e foaki e mekasini. Ne ofo e fifine ke kitia e tama tote hane taute e matagahua nei. Ne talia fiafia e ia e mekasini ti pihia foki mo e fakaako Tohi Tapu he kaina!”
6 He tali atu ke he ui ma e tau paionia fakaku, ko e motua mo e ulu he magafaoa i Samapia ne gahua tupe ke he tau aho oti ne fifili ke paionia fakaku pete ni e lavelave e fakaholoaga hana. Ne manako a ia ke fakatoka e fakafifitakiaga ma e fakapotopotoaga mo e magafaoa hana. He falu magaaho, kua fakatu e ia e motoka hana he kala puhala ti ta e autiokasete Ko e Mena Galo he Fiafia he Magafaoa mo e uiina ke he tau tagata ne o he puhala ke o mai mo e fanogonogo ke he mena kua totou fakalahi. He puhala ia, ne maeke ia ia ke foaki 16 e tohi Fiafia he Magafaoa mo e 13 e tohi Iloilo, ti kamata e ia ua e fakaakoaga Tohi Tapu.
7 Ko e aga paionia mitaki ne mailoga foki ke he motu katofia i Simipapue. Ia Aperila 1998, taha e fakapotopotoaga mo e 117 e tagata fakailoa ne hokotaki 70 e paionia fakaku mo e 9 e paionia tumau. Ko e taha fakapotopotoaga mo e 94 e tagata fakailoa ne 58 e paionia fakaku kua hokotaki. Ko e taha foki, mo e 126 e tagata fakailoa, ne hokotaki ko e 58 ne fifili ke paionia fakaku fakalataha mo e 4 e paionia tumau. Kua mua ue atu e tau he fekafekauaga kua mole i Simipapue. Pete ni kua lavelave lahi e tau matakainaga i ai mo e tau mena fakamagafaoa, ko e tau gahua fakapotopotoaga, taaga he la, ne hagaaki a lautolu ke fakaaoga fakapulotu e tau magaaho ha lautolu ke he fekafekauaga.
8 Kua mailoga he tau paionia ko e kamata e gahua paionia mo e fakatumau ki ai kua nakai falanaki ke he malolo ni ha lautolu. Ko lautolu kua talahau fakamua kua maeke ia lautolu ke taute ai ha ko lautolu kua “fakalata ke he malolo kua foaki mai he Atua.” (1 Pete. 4:11) Kua fakamalolo he tua ha lautolu a lautolu ke fakatumau ke he fekafekauaga ha lautolu he tau aho oti. He nakai kumi ni ha lautolu a tau mena fakaaoga mo e tau monuina, kua mailoga he tau paionia kautu ko e fakaholo ki mua, kua lata mo e “tau lahi,” ka e loga e tau monuina kua moua e lautolu he magaaho fakamui.—1 Tesa. 2:2.
9 Kua Lata e Fakafifitakiaga a Paulo ke Muitua: Kua fakamau i loto he Tohi Tapu e tau mouaaga he aposetolo ko Paulo he fekafekauaga mo e lagomataiaga mitaki ne foaki e ia ke he tau tagata tokologa. Ka e, ka pehia ha tagata, pihia foki a Paulo. Ne fakauka a ia ke he tau favaleaga mo e tau mena uka fakatino ke maeke ia ia ke fakamatala e tala mitaki mo e fakamalolo e tau fakapotopotoaga. Kua maeke ia ia ke fahia mai he nakai malolo e tino. (2 Kori. 11:21-29; 12:7-10) Ne fifili a ia ke fakaaoga fakapulotu hana magaaho. Kua talahau e ia ne taute e ia e tau gahua hana mo e lagomatai a Iehova. (Filipi 4:13) Nakai fai ia lautolu ne lagomatai e Paulo ne manamanatu ko e magaaho mo e tau laliaga hana he fekafekauaga ne moumou magaaho po ke kua lata he fakaaoga ke he falu mena foki. Kua lagomatai agaia ki a tautolu he vaha nei e fakaaoga fakapulotu e Paulo hana magaaho! Kua fakaaue a tautolu ke he fakatonuaga he agaga hana ke lagomatai a tautolu ke fakatokatoka e tau mena kua mua mo e tapiki ki ai mo e fakamoli ke he tau vaha uka nei!
10 Mogonei nakai la pihia fakamua, ‘kua toe gahoa e tau aho ke fakamatala e tala mitaki.’ (1 Kori. 7:29; Mata. 24:14) Ko e mena ia, kua latatonu ke huhu hifo ni ki a tautolu, ‘Ka oti fakalutukia e moui haku a pogi, maeke nakai ia au ke tala age ki a Iehova kua fakaaoga fakapulotu tuai e au e magaaho haku?’ (Iako. 4:14) He ha he tutala ki a Iehova he liogi he magaaho nei, he tala age ki a ia e manako hau ke fakaaoga fakapulotu e magaaho hau ko e taha he hana a Tau Fakamoli? (Sala. 90:12) Liogi ma e lagomatai a Iehova ke fakamukamuka e moui hau. Pete ni he lavelave lahi a koe fakamua, liga to moua kia e koe he mogonei e paionia ke lautonu ke he moui hau?
11 Fakaaoga Fakalahi e Tau Tutuaga Hau: Maama ai, ha ko e tau tutuaga nakai maeke oti ia lautolu kua manako ke paionia tumau he 70 e tula he mahina. Pete ia, tokologa e tau tagata fakailoa kua fakatoka ke fakamoli e 50 e tula he mahina ke he fekafekauaga ko e tau paionia fakaku ka maeke po ke fakatumau. Ka nakai maeke he tau tutuaga hau mogonei ke paionia fakaku po ke tumau, kia nakai fakalolelole. Fakatumau ke liogi ke maeke he tau tutuaga hau ke hiki. He magaaho nei, ka nakai maeke e tau hikihikiaga hau, kia mafanatia he iloa to fakaaue lahi a Iehova ke he mena kua maeke ia koe ke taute mo e solu katoa he hana fekafekauaga. (Mata. 13:23) Kua mailoga e ia kua tu mauokafua a koe he hana fahi ti kua lali fakalahi a koe mo tagata fakailoa fakamoli kua nakai fakaata e mahina ke mole noa ka e nakai fakamatala. Liga maeke ke fakatolomaki a koe he fakamatila e tau puhala fakamatala hau he gahua ke mitaki lahi ko e tagata fakamatala mo e faiaoga he tala mitaki.—1 Timo. 4:16.
12 Ha kua tata lahi mai “e aho a Iehova kua lahi mo e matakutakuina,” kua lata ia tautolu ke fakaaoga fakapulotu e vala magaaho ne toe kaeke ke oti e gahua ne kua poaki mai ke taute e tautolu. (Ioelu 2:31) Kua iloa e Satani kua ku hana magaaho, ti nakai tuga fakamua, kua lali a ia ke he tau mena oti he hana malolo ke fakauka ha tautolu a tau momoui mo e ke tauhele ia tautolu he hagaaki ke he tau mena kua aoga moli. (Filipi 1:10; Fakakite. 12:12) Kia nakai fakateaga e fiafia he Atua ki a koe. To lagomatai e Iehova a koe ke fakamukamuka e moui hau ke hokotia katoatoa a koe ke he fekafekauaga. (Sala. 145:16) Fiafia ai, tokologa kua moua, he liu kumikumi e tau tutuaga ha lautolu, ke maeke ia lautolu ke fakalataha mo e tau paionia fakaku po ke tumau. Moli, kua moua he tau paionia e makona hokulo he fakaaoga fakapulotu e tau magaaho ha lautolu. To eke nakai a koe mo taha ia lautolu?