Tau Monuina he Fekafekauaga Paionia
1, 2. Ko e heigoa e tau monuina ne matutaki lahi ke he fekafekauaga paionia, mo e ko e ha?
1 “Iloa e au kua nakai fai gahua foki ka liga tamai e makona ke tuga ne tamai he tutala ke he falu hagaao ke he kupu moli,” he talahau he taha paionia. Ne pehe foki taha: “He fakaotiaga he tau aho takitaha, kua mohe mitaki au, ti puke haku loto he olioli.” Kua vagahau e tau paionia nei ma e tau matakainaga tane mo e fifine he tau matakavi oti ne kua logona e tau monuina he fekafekauaga paionia.—Fakatai 10:22.
2 Ko e lagomatai e falu ke moua e iloilo fakamoui he Kupu he Atua kua tamai e fiafia moli. (Gahua 20:35; 1 Tesa. 2:19, 20) “Kua fiafia mo e fakamalolo e tua he kitia e malolo he Kupu he Atua hane fakaohooho e tau tagata ke hikihiki ha lautolu a tau momoui,” he tohia he taha kua leva e paionia. E, he fakaata e lautolu a lautolu ke lagomatai e tau tagata mo e taute e tau fakaakoaga Tohi Tapu, kua tuku he tau paionia a lautolu ke he laini ma e tau monuina pehenei.
3, 4. Puhala fe ne fakaako he paionia e tagata ke falanaki ki a Iehova, mo e puhala fe ne lagomatai he mena nei e tagata ke tupu fakaagaga?
3 Falanaki ki a Iehova: Ko e falanaki tumau ha lautolu ke he agaga tapu he Atua he taute ha lautolu a fekafekauaga ne lagomatai e tau paionia ke feaki e “fua he [a]gaga” mo e ko e puipuiaga ma lautolu. (Kala. 5:16, 22, 23) Ke lafi ki ai, ha kua fakaaoga tumau e lautolu e Kupu he Atua, kua fa makaka e tau paionia he fakaaoga e tau Tohiaga Tapu ke lalago aki e kupu moli mo e ke fakamalolo e falu. (2 Timo. 2:15) Ko e matakainaga tane ne paionia ke he tau hogofulu tau ne talahau: “Ne lagomatai he paionia au ke moua e iloilo hokulo he Tohi Tapu, ko e iloilo ne fakaaoga e au ke lagomatai aki e tokologa he tau tagata ke iloa a Iehova mo e hana tau finagalo.” Ko e palepale mitaki ha ia!
4 Ko e tau paionia mau kua latatonu foki ke falanaki ki a Iehova ke he tau puhala loga. Ne fakamalolo e tua ha lautolu he kitia kua fakamonuina e ia e tau laliaga ha lautolu he foaki ma e tau levekiaga tino ha lautolu. Ko e matakainaga ne 72 e tau he moui ne paionia mau ke he 55 e tau ne pehe: “Ne nakai tiaki e Iehova au.” Lafi ki ai, he fakamukamuka e tau momoui ha lautolu, ne puipui he tau paionia a lautolu mai he tau tupetupe loga he moui. Futiaki nakai e mena nei ki a koe?—Mata. 6:22; Hepe. 13:5, 6.
5. Puhala fe ne lagomatai he paionia e tagata ke fakatata atu ki a Iehova?
5 Fakatata Atu ke he Atua: Ko e fakafetuiaga ha tautolu mo Iehova ko e koloa kua mua atu e mitaki. (Sala. 63:3) Ka fakalataha katoatoa a tautolu ke he fekafekauaga ha ko e fakaalofa ki a Iehova, to au atu e tata he fakafetuiaga ia. (Iako. 4:8) Ko e matakainaga ne paionia ke he molea e 18 e tau ne pehe: “Ko e gahua paionia kua fakaata a mautolu ke ‘kamata mo e kitekite kua mitaki a Iehova,’ kua haitia ai ke he taha aho mo e taha aho e fakafetuiaga kua mua e malolo mo e ha tautolu a Tufuga.”—Sala. 34:8.
6. Ko e heigoa he tau paionia kua latatonu ke moua, mo e ko e tau paionia mo hai ne aoga mai ai?
6 Ke lafi ke he lata he tau tutuaga, kua latatonu e tau paionia ke malolo e tua, fakaalofa moli ke he Atua mo e tuuta kaina, mo e makai ke taute e tau foakiaga. (Mata. 16:24; 17:20; 22:37-39) Ko e mena ia, tuga kua fakamoli mai he tau fofoga fiafia he tau paionia he tau matakavi oti, ko e tau monuina he fekafekauaga paionia kua lahi ue atu. (Mala. 3:10) Nakai fakamahao ni e tau monuina nei ke he tau paionia hokoia, ka e kua lahi foki e aoga ke he tau magafaoa ha lautolu mo e fakapotopotoaga ha ko e agaga mitaki ne fakakite he tau paionia.—Filipi 4:23.