Fakaholoaga Fou he Aho Toloaga Pauaki

Loga lahi e tau talahauaga kua ha ha he vaha nei ke leveki aki e ate ha tautolu ke malolo ke lahi e fiafia mo e moui loa. Ka e kua mua atu e aoga he tuaga he tau loto fakatai ha tautolu. Kua felauaki lahi ai he mogoia, e matapatu he aho toloaga pauaki ka kamata ia Sepetema 2003: “Fekafekau ki a Iehova mo e Loto Katoa.” (1 Nofo. 28:9) Ko e heigoa ha tautolu ka amaamanaki ke ako?

Ko e leveki takaiaga to fakatutala ke he “Lagomatai e Falu ke Fekafekau ki a Iehova mo e Loto Fiafia.” Ko e tau huhu tala ka fakakite e olioli ne fua mai he feaki e fiafia mo e taute e tau fakaakoaga Tohi Tapu mo e tau tagata ne manako ke fekafekau ki a Iehova. Ko e tau tagata oti ka fakalataha ai to nakai fakauaua to moua e mafanatia mo e fakamalolo mai he lauga fakamua he tagata lauga ahiahi, “Leveki e Tau Loto ha Tautolu he Lalolagi Matematekelea.” Ko e lauga papatiso ka fakahiku aki e fakaholoaga he magaaho pogipogi.

Ke he magaaho afiafi, ko e vala “Fakaolo Atu e Lima ke Lagomatai” ka fakatutala ke he puhala ne maeke ia tautolu ke lagomatai e falu. Ko e heigoa he tau matua ka taute ke puipui e tau loto he tau fanau ha lautolu mai he tau fakaohoohoaga hepe mo e lagomatai a lautolu ke fakatata atu ki a Iehova? Ko e vala “Lagomatai e Tau Fanau Hau ke Fiafia ki a Iehova” ka foaki mai e tau lagomataiaga aoga mo e to fakakite e puhala ka taute aki e mena nei.

Kua fakaaoga fakamitaki nakai e tautolu e tau foakiaga oti ne taute e Iehova ke leveki aki e tau loto fakatai ha tautolu ke malolo mitaki mo e mao? Ko e lauga fakahiku he tagata lauga ahiahi, “Kia Tumau e Loto Katoa he Fekafekau ki a Iehova,” ka onoono fakalahi ke he fa e vala aoga he ha tautolu a fakaholoaga leveki fakaagaga. Lahi fefe e magaaho mo e malolo kua fakaaoga e tautolu ke liogi nakai noa, ke fakaako e Kupu he Atua, ke fakamatala fakamakamaka, mo e ke lafi mo e falu Kerisiano? Maeke nakai ia tautolu ke fakaholo ki mua ke he ha fahi nei?

Kua tuku mai e Iehova e uiina: “Kia haga mai e koe hāu a loto ke he tau mena kua fakaako atu ai, mo e hāu a tau teliga ke he tau mena ke iloilo ai.” (Fakatai 23:12) Fakatokatoka he mogonei ke finatu ke he aho palepale mitaki nei he tau fakaakoaga faka-Tohiaga Tapu. Ko e taute pihia ka fakamalolo a koe ke fakatumau ke fekafekau ki a Iehova mo e loto katoa mo e loto fiafia.