Fakaholoaga Fou he Aho Toloaga Pauaki

Ko e mata ko e talagaaga homo ue atu. (Sala. 139:14) Ka e, kua onoono ni ke he taha e mena he magaaho. Kua pihia tonu ke he moli mo e puhala fakatai. Ke maali mo e tumau e onoonoaga fakaagaga ha tautolu, kua lata ia tautolu ke fakamatapatu e hagaaki ha tautolu ke he taute he finagalo he Atua. Ha kua tolomaki ki mua e tau fakatauhele he lalolagi ha Satani, kua latatonu ko e fakaholoaga he aho toloaga pauaki ma e tau he fekafekauaga he 2006 to feaki e matakupu “Kia Fakamukamuka Hau a Tau Mata”!​—Mata. 6:22.

Maeke fefe ia tautolu ke moua e tau monuina mai ia Iehova? (Fakatai 10:22) Ko e huhu nei ka fakatutala ki ai he vala “Moua e Tau Monuina he Fakatumau ke Fakamukamuka e Tau Mata.” To fakamaama he tau huhu tala e puhala kua maeke ia tautolu ke aoga mai he fakagahua e tau matapatu fakaakoaga faka-Tohiaga Tapu. Ko e lauga fakamua he tagata ahiahi, “Fakatumau he Fakamukamuka e Tau Mata ke he Lalolagi Kelea,” ka hataki a tautolu ke he tau mena ka fakauka aki e tau momoui ha tautolu ti fakatauhele fakahaga e tuaga fakaagaga ha tautolu. To ako foki e tautolu e tau mena ne putoia he fifili e ‘vala uho.’​—Luka 10:42.

Maeke fefe he tau matua mo e falu ke fakamalolo e tau fuata Kerisiano ke hagaaki atu ke he tau tutuliaga fakaagaga? Ko e tau vala “Tau Matua ne Fana Fakahako e Tau Tao ha Lautolu” mo e “Tau Fuata ne Tutuli e Tau Foliaga Fakaagaga” to putoia ai e tau talahauaga mai he tau matua mo e tau fuata ke he huhu aoga nei. (Sala. 127:4) Ko e lauga fakahiku he tagata ahiahi to fakatutala ke he puhala ka fakatauo a tautolu mo e fakatokatokaaga ha Iehova ko e tau tagata takitokotaha, ko e tau magafaoa, mo e ko e fakapotopotoaga.

Pete kua fakalataha fou a tautolu ke he kupu moli po kua leva tuai e fekafekau ki a Iehova, kua aoga ke ‘fakatumau ke fakamukamuka e tau mata ha tautolu.’ Ko e aho toloaga pauaki ka lagomatai a tautolu ke taute e mena ia.