Fakaholoaga Fou he Aho Toloaga Pauaki
Kaeke kitia po ke logona e tautolu e fakailoaaga hataki ka e nakai fai mena ne taute, to liga moua e tau matematekelea. Kua mua atu e aoga ke taute taha mena ke he tau takitakiaga fakaagaga kua foaki mai e Iehova. To peehi mai e mena nei he fakaholoaga he aho toloaga pauaki ma e tau he fekafekauaga ka hau. Ko e matapatu “Mataala ke he Puhala Fanogonogo Hau.”—Luka 8:18.
He lauga fakamua hana, ko e tagata lauga ahiahi to fakatutala ke he puhala kua lauia a tautolu he vaha nei ke he tomatomaaga he tau veveheaga fakamua he tohi a Paulo ne omoomoi he agaga ke tohi ke he tau Heperu. He lauga fakahiku, “Fanogonogo Tumau ke he Fakaakoaga Faka-Atua,” to lagomatai a tautolu oti ke kumikumi kua fanogonogo moli nakai a tautolu ki a Iehova, hana Tama, mo e “fekafekau fakamoli mo e loto matala.”—Mata. 24:45.
Loga e vala he fakaholoaga ne aoga pauaki ke he tau magafaoa. “Tau Magafaoa ne Fanogonogo Katoatoa ke he Kupu he Atua” ka lagomatai a tautolu ke puipui e tau mena he lalolagi nei neke apitia e moui fakaagaga ha tautolu. To putoia ai e tau huhu tala ki a lautolu ne kua taute e tau hikihikiaga ke maeke ke tuku fakamua e tau mena fakaagaga. “Puhala he Fanogonogo Fakamakutu ke he Kupu he Atua kua Fakamalolo e Tau Fuata ha Tautolu” to putoia e tau huhu tala ke he tau fuata ne kua mauokafua ke he kupu moli he aoga, mo e tau atu taha ha lautolu, po ke ke he fekafekauaga. “Tau Tama Ikiiki ne Fanogonogo ke he Atua mo e Ako Ai” to lagomatai a tautolu ke nakai fakateaga e lotomatala he tau fanau ke ako. Ko e huhu tala ke he tau fanau mo e tau mamatua ha lautolu ka lagomatai a tautolu ke kitia e fua mitaki he fakamahani e tau fanau mai he vaha ikiiki ke he tau puhala ha Iehova.
Ha ko Satani “kua fakahehe e lalolagi oti,” ko Iehova hane fakakite ke he hana tau fekafekau tua fakamoli hana e puhala kua lata ke o ai a lautolu. (Fakakite. 12:9; Isaia 30:21) Ko e fanogonogo fakamakutu ke he hana tomatomaaga mo e fakagahuahua omaoma ai ke he tau momoui ha tautolu ka taute a tautolu ke iloilo, moua e fiafia, mo e takitaki atu ke he moui tukulagi.—Fakatai 8:32-35.