Kia Fakamukamuka Hau a Tau Mata
1. Ko e heigoa e kakano ke fakamukamuka e tau mata, ti ko e ha kua aoga e mena nei?
1 He hana Lauga he Mouga, ne fatiaki a Iesu ke he fakaohoohoaga mua ue atu kua maeke e mata fakatai po ke fakaagaga ke fakaaoga he puhala moui katoa ha tautolu. Ne pehe a ia: ‘Kaeke foki kua fakamukamuka e tau mata hau, ti maama ai hau a tino oti. Kaeke kua kelea hau a tau mata, ti pouli ai hau a tino oti.’ (Mata. 6:22, 23) Ko e mata kua fakamukamuka ne hagaaki ke he taha e finagalo—he taute e finagalo he Atua—mo e nakai fakatauhele he fakaatukehe nakai aoga ke he tau mena fakatino. (Mata. 6:19-21, 24-33) Ko e heigoa ka lagomatai aki a tautolu ke fakatumau e fakamukamuka e mata?
2. Ko e heigoa e onoonoaga he tau mena fakatino kua fakamalolo he Kupu he Atua?
2 Feaki e Mahani Fakalatalata: Ko e leveki fakalahi ke he tau manako he magafaoa he tagata ko e kotofaaga faka-Tohi Tapu. (1 Timo. 5:8) Ka e nakai kakano e mena nei ke gahua tumau he kumi ma e tau mena mitaki lalahi mo e fou maka. (Fakatai 27:20; 30:8, 9) Ka e, tomatoma mai he tau Tohiaga Tapu ki a tautolu ke mahani fakalatalata ke he “tau mena kai, mo e tau mena ke fakatapulu ai,” ko e tau mena kua lata ma e moui. (1 Timo. 6:8; Hepe. 13:5, 6) Ko e omaoma ke he fakatonuaga nei kua maeke ke lagomatai a tautolu ke fakatumau e tau mata ha tautolu ke he hagaaki kua tonu.
3. Ko e heigoa kua lagomatai a tautolu ke kalo kehe mai he tau pehiaaga fakatu ni he tagata?
3 Kua pulotu a tautolu ke fehola kehe mai he fakapehia ne tautolu a tautolu aki e tau kaitalofa fakalataha mo e tau koloa po ke tau tutuliaga nakai aoga kua manako ke lahi e magaaho mo e onoonoaga ki ai. (1 Timo. 6:9, 10) Taute fefe e tautolu e mena nei? Ka manamanatu ke he tau mena taute, liogi he foaki e manatu mo e fokifoki fakamoli neke moumou ai e tau tutuliaga fakaagaga. Kia fakamalolo ke fakatumau e tuku fakamua e tau mena fakaagaga he moui hau.—Filipi 1:10; 4:6, 7.
4. Ko e ha kua lata ke kumi e tautolu e tau puhala ke fakamukamuka e puhala moui ha tautolu?
4 Fakamukamuka Hau a Puhala Moui: Ko e taha lagomatai ke totoko e futiaki he velevelekoloa ko e tutuli ke fakamukamuka hau a puhala moui. Taha e makatakainaga tane ne mailoga ko e magafaoa hana kua maeke ke holo mitaki he nakai petu e tau koloa fakatino ne pehe: “Maeke ia au mogonei ke lahi e mena ke taute he fakapotopotoaga ke lagomatai e tau matakainaga haku. Kua kitia moli e au na fakamonuina e Iehova e tau fekafekau oti hana ka tuku fakamua e lautolu e tapuakiaga moli i mua he tau mena fakatagata.” Olioli nakai e koe e tau monuina lalahi he fakamukamuka e puhala moui hau?
5. Ko e ha e laliaga fakatumau kua lata ke taofi mau e tau mata ha tautolu ke fakamukamuka?
5 Ko e laliaga fakatumau kua lata ke totoko e fakaohoohoaga ha Satani, hana lalolagi velevelekoloa, mo e ha tautolu ni a tau tino nakai mitaki katoatoa. He nakai fakaata e tau mata ha tautolu ke o fano, kia fakatumau a tautolu ke taofi mau ai ke taute e finagalo he Atua mo e ke he amaamanakiaga uho ha tautolu he moui tukulagi.—Fakatai 4:25; 2 Kori. 4:18.