Mukamuka Nakai Haau a Mata?
1. Ko e heigoa e kakano ke ‘mukamuka e mata’?
1 Ko e tau mena ne kitia he tau mata ha tautolu kua fakaohooho a tautolu ke taute. Kua latatonu mooli e tau kupu ha Iesu: “Kaeke foki ke mitaki [po ke, mukamuka] hau a tau mata, ti maama ai hau a tino oti”! (Mata. 6:22) Ka ‘mukamuka’ fakaagaaga e tau mata ha tautolu, kua hagaaki ni ke he taha e manatu—ko e taute e finagalo he Atua. Tuku fakamua e tautolu e Kautu ti nakai tauhele he tau koloa po ke tau matagahua nakai aoga ne fakalavelave e gahua fakamatala.
2. Ko e heigoa ka fakatauhele e onoonoaga ha tautolu, ka ko e heigoa ka lagomatai a tautolu?
2 Lata e Kumikumi Fakatagata: Maeke ke fakakeukeu e onoonoaga ha tautolu ha ko e tau mena ne fakainaina he tau tohi tala kua talahau ki a tautolu kua lata po ke tau mena kua moua he falu. Ato tutuli e gahua po ke fakatau e koloa ne lata ke foaki fakalahi e magaaho, tupe, po ke malolō, kua mitaki ke “totou e tau tupe ke palepale aki” he hūhū ki a tautolu, ‘To fakatupu ki mua nakai he mena nei e gahua haaku ki a Iehova po ke fakatauhele ai?’ (Luka 14:28; Filipi 1:9-11) Kua pulotu foki ke manamanatu tumau ke he puhala ke fakamukamuka fakalahi e moui ha tautolu ke lahi e mena ka taute he gahua he fonua.—2 Kori. 13:5; Efeso 5:10.
3. Ko e heigoa ne fakaako e tautolu mai he taha matakainaga fifine ne taute e tau hikihikiaga ke fakamukamuka e moui haana?
3 Taha e matakainaga fifine ne kamata ke paionia tumau, ne fifili a ia ke gahua tupe tumau pete he maeke he gahua vala magaaho ke foaki e tupe lahi ke leveki aki e tau manako haana. Fakahiku e ia: “Nakai fai tagata ke fekafekau ke he ua e iki. Toka kehe e au e tau manako haaku ke leveki e tau mena haaku kua lata. Ati mailoga e au kua tuai e tau koloa he tino ti mategūgū au he lali ke moua e tau koloa ia.” Ne fakaatā he tau tuaga haana a ia ke taute e tau hikiaga ke fakamukamuka e moui haana mo e ke hiki e gahua, he fakaatā a ia ke matutaki e gahua paionia.
4. Ko e ha kua mafiti ke fakatumau e tautolu e mata mukamuka he mogonai?
4 Ko e mafiti he tau magaaho ha tautolu kua mua atu e aoga ke fakatumau e tautolu e mata mukamuka. He mole atu e tau aho takitaha kua fakatata lahi atu he taha aho a tautolu ke he fakaotiaga he fakatokaaga he tau mena nei mo e kamata he lalolagi foou he Atua. (1 Kori. 7:29, 31) He hagaaki ke he gahua fakamatala, maeke ia tautolu ke fakamoui a tautolu mo lautolu ka fanogonogo ki a tautolu.—1 Timo. 4:16.