Tau Leveki ne Takitaki—Ko e Tau Leveki Fekafekau
1 Kua matakaki lahi e leveki fekafekau ke he tau gahua oti ne matutaki atu ke he tupu ki mua he gahua evagelia i loto he matakavi kotofa he fakapotopotoaga. Kua gahua lahi ai a ia ke lagomatai a tautolu ke fakamoli e matagahua ha tautolu ke fakamatala e tala mitaki. Ko e evagelia fakamoli, ne takitaki e ia e tau gahua oti ne matutaki atu ke he fekafekauaga. Ko e faiaoga lotomatala, ne lagomatai takitokotaha e ia e tau tagata fakailoa ke tolomaki ha lautolu a lauia mitaki ke he fekafekauaga.—Efeso 4:11, 12.
2 Kua fakatonu he motua nei e gahua he tau fekafekau lagomatai ne kotofa ke he tau tohi, tau mekasini, mo e fakatokaaga he tau matakavi. Ti lago ki a ia ke fai tohi, mekasini, mo e tau lau pepa fakapuke ke fakaaoga he tau mahina oti. Lagataha he tau, ne liu a ia kikite ke he tau kaina oti he tau matakavi ne fakamau hifo ke nakai aahi atu a tautolu ki ai, ti kotofa e ia e tau matakainaga kua lata ke aahi e tau kaina nei.
3 Kua lago ke he leveki fekafekau ke takitaki e tau puhala oti he fakamatalaaga, putoia ai e tau fahi pisinisi, puhala tu, mo e he telefoni. Kua mataala a ia ke fakatokatoka e tau fakaholoaga latatonu ke feleveia ke he fekafekauaga he tau fahi tapu, pihia foki e tau aho okioki. Fakakite e ia e fiafia moli ke he gahua fakaako Tohi Tapu. Ne kumi e ia e tau puhala ke lagomatai fakaagaga aki a lautolu ne nakai fakatumau po ke nakai ni o ke he fekafekauaga. Kua tokaga lahi atu a ia ke he gahua he tau paionia, mo e leveki e ia e polokalama Lagomatai he Tau Paionia e Falu.
4 Ha ko e taha he Komiti Fekafekau he Fakapotopotoaga, ne pulega he leveki fekafekau ha hikihikiaga ne kua lata ma e tau matakau he Fakaakoaga Tohi he Fakapotopotoaga. Ka aahi atu a ia ke he matakau ha mutolu, kia lata ke ha ha i ai a mutolu mo e ke fakatauo mo ia ke he gahua he fonua.
5 Kia fakamakai e fakapotopotoaga katoa ke kauauloa ke he fakatonuaga ne mai he leveki fekafekau. To lagomatai he mena nei a tautolu ke fakatolomaki ha tautolu a lauia mitaki ke he gahua taute tutaki mo e moua e olioli lahi he fekafekauaga ha tautolu.