Totou Nakai e Koe e Tau Mekasini?
1 Ne talahau mai he hoa misionare i Aferika hagaao ke he tau mekasini ha tautolu: “Ne lagomatai he Ko e Kolo Toko a maua ke tumau ke mataala fakaagaga he ha maua a matakavi. Kua moua e maua e mafanatia mo e fakamalolo mai he tau mekasini takitaha.” Hokulo pihia nakai e fiafia hau ma e tau senolo ha tautolu? Mo e matakaki pihia nakai a koe ke totou ai?
2 Kua lahi mahaki e magaaho ne tauteute ai e tau vala tala he mekasini ke totou ni ke he tau minuti gahoa. Mailoga ai e mena nei, to fuke noa ni kia e koe e tau vala tala, kitekite e tau fakatino, po ke totou lagataha e vala tala ne fiafia a koe ki ai? Kua pulotu a tautolu ka mua atu e mena ka taute e tautolu mai he naia. Lata ia tautolu ke totou mo e kumikumi fakamitaki e tau vala tala oti he tau fufuta takitaha he tau mekasini ha tautolu. Ko e Kolo Toko e senolo ne mua haia ha tautolu ma e tau mena kai fakaagaga he magaaho. I loto he Awake! e tau vala tala fakaohooho mo e kakano ke he tau matapatu tala kehekehe. Ko e mena ne ako e tautolu he totou e tau mekasini nei kua nakai ni fakamalolo fakaagaga a tautolu ka kua tauteute a tautolu ke lauia mitaki ke he fekafekauaga. Ha kua fakamoli a tautolu ke totou, to fiafia foki a tautolu ke foaki e tau mekasini ke he falu.
3 Puhala ke Fakatolomaki e Aga Totou: Maeke nakai ia koe ke fakalaukauka atu hau a totouaga he tau mekasini? Hanei ua e lagomataiaga ne gahua ma e falu. (1) Taute e setulu ke fakatumau ke totou. He tuku ke he mafoa 10 po ke 15 ni e minuti he tau aho takitaha ke totou, to kitia e koe e lahi he mena ne totou e koe he fahi tapu. (2) Kia taute taha puhala ke fakamau hifo e totouaga hau. Liga lata ke fakamailoga e koe e kamataaga he tau vala tala takitaha ne totou. Ka nakai fakamailoga, liga to nimo ia koe ke totou falu vala tala po ke mekasini katoa ni. Kua aoga ai ke feaki e puhala totou ne lata mo koe mo e fakatumau ki ai.—Fakatatai Filipi 3:16.
4 Ne tali fakapulotu e “fekafekau fakamoli mo e loto matala” ke he hikihikiaga he tau vaha, he lomi fakailoa e tau vala tala ne fehagai mo e tau manako moli he tau tagata. (Mata. 24:45) Moli ai kua aamotia he tau mekasini e tau momoui ha tautolu. Ko e mafiti lahi he holo ki mua fakaagaga ha tautolu, kua falanaki ai ke he fua he aga totou fakateokarasi ha tautolu. Ko e monuina fakaagaga uho kua toka ai ma lautolu ne tuku kehe taha magaaho ke totou oti e tau mekasini.