Kua Lata Oti ke ‘Talia e Kupu mo e Fiafia’!
1 Totou miliona e tau tagata hane fakaako Tohi Tapu mo e Tau Fakamoli a Iehova. Ke lata ai mo e moui tukulagi, kua lata ia lautolu ke ‘talia e kupu mo e fiafia,’ tuga e 3,000 ne fakatokihala ti papatiso ai he aho Penetekoso 33 V.N. (Gahua 2:41) Ko e heigoa e matagahua kua fakalago he mena nei ki a tautolu he vaha nei?
2 Kua lata ia tautolu ke lagomatai e tau tagata fakaako Tohi Tapu ha tautolu ke feaki e mahani fakamoli ki a Iehova. (1 Timo. 4:7-10) He mena ia, kua lagomatai mai he uho he Our Kingdom Ministry ia Iuni 1996, paratafa 20: “He fakaakoaga, kia kumi puhala ke ati hake e loto fakaue ke he tau fua a Iehova. Fakakite e manatu hokulo hau ni ma e Atua. Lagomatai e tagata fakaako ke he puhala ke fakatupu e fakafetuiaga mafanatia fakatagata mo Iehova.”
3 Ko e Paleko kua Fehagai mo Tautolu: Tokologa e tau tagata, ne kua fakaohooho he lotu fakavai, kua makona mo e puhala tapuaki kua tote maka e magaaho mo e laliaga, nakai kitia ai ha hikiaga moli he tau puhala momoui ha lautolu. (2 Timo. 3:5) Ko e paleko kua fehagai a tautolu ki ai ko e lagomatai e tau tagata fakaako Tohi Tapu ha tautolu ke kitia kua lahi atu e lauiaaga ke he tapuakiaga moli mai he eke mo tau tagata fanogonogo hokoia ke he kupu he Atua. Kua lata ia lautolu ke fakaaoga ke he tau momoui ha lautolu e tau mena ne fakaako e lautolu. (Iako. 1:22-25) Ka fai mena ke he mahani fakatagata ha lautolu kua nakai talia ke he Atua, kua lata ia lautolu ke mailoga e kotofaaga ha lautolu ke “mafokifoki” mo e taute e mena kua hako ke fakafiafia a ia. (Gahua 3:19) Ke moua e moui tukulagi, kua lata ia lautolu ke ‘eke taha’ mo e tumau ke he kupu moli.—Luka 13:24, 25.
4 Ka fakatutala ke he tau puhala kehekehe he tau mahani, huhu ke he tagata fakaako Tohi Tapu hau ko e fefe moli e kitiaaga hana ke he tau mena nei mo e ko e heigoa kua lata ke taute kaeke ke kitia e ia e lata ke taute e tau hikihikiaga he moui hana. Hataki hana onoonoaga ke he fakatokatokaaga ha ne fakaako a ia ke he kupu moli, ti fakamalolo a ia ke fina atu tumau he tau feleveiaaga he fakapotopotoaga.—Hepe. 10:25.
5 Kia eke mo foliaga ma tautolu ke hokotia ke he loto he tagata fakaako e fakaakoaga ha tautolu. To fiafia a tautolu he omoomoi a lautolu kua fou ke talia e kupu he Atua mo e fiafia ti hokotia ke papatiso!—1 Tesa. 2:13.