Vevehe Kehe he Gahua Fakamatala a Tautolu
1 Tokologa e tagata ne huhu, “Ko e heigoa ne kehe mai e Tau Fakamoli a Iehova he falu lotu?” Fefe e tali hau? Maeke ia koe ke fakamaama falu he ha tautolu a taofiaga ne fakave ke he Tohi Tapu. Ka kua manamanatu foki nakai a koe ke fakakite e puhala kua maeke lahi he fekafekauaga ha tautolu he fonua ke vevehe kehe a tautolu mai he falu lotu?—Mata. 24:14; 28:19, 20.
2 He vaha nei, fihafiha ni e tagata lotu ne logona e manako ke talahau e tau taofiaga ha lautolu ke he falu. Kua manamanatu a lautolu kua lahi tuai e omaoma ke he tau matafakatufono a Kaisara, ke moua e moui hagahaga mitaki, po ke taute e tau gahua totonu ma e falu. Pete ia, kua nakai logona e lautolu e matagahua ke lagomatai e falu he ako e mena ne talahau he Tohi Tapu ke moua e fakamouiaga. Kehe fefe a tautolu?
3 Ko e fekafekauaga makai ha tautolu kua kehe lahi mahaki mo e tau gahua he falu lotu. Molea e 100 tau, ko e Tau Fakamoli a Iehova kua fakamatala fakamakutu e tala mitaki ke he tau kalakala oti he lalolagi, he muitua ai ke he tau Kerisiano fakamua. Ko e foliaga ha tautolu he taute e mena ia ke lagomatai e tau tagata tokologa ke ta mai e tau momoui ha lautolu ke lagotatai mo e finagalo he Atua.—1 Timo. 2:4; 2 Pete. 3:9.
4 Ko e Heigoa Hau a Aga? Kua talahaua nakai a koe, ko e tagata fakamatala makai he Kupu he Atua? (Gahua 17:2, 3; 18:25) Ha ko e gahua fakamatala hau, maeke kia he tau tuuta kaina hau ke kitia maali e kehe he lotu ha lautolu mo e hau? Kua talahaua nakai a koe kua makai he fakamatala hana amaamanakiaga ke he falu? Fai fakaholoaga tumau nakai a koe ke fakalataha ke he fekafekauaga? Manatu kua kehe a tautolu nakai ni ha ko e tau higoa ha tautolu ka e pihia foki he taute e tautolu e mena kua fakamaama he higoa ia—he fakamatala hagaao ki a Iehova.—Isa 43:10.
5 Ko e fakaalofa ma e Atua mo e katofia kua fakalagalaga a tautolu ke gahua fakamatala. (Mata. 22:37-39) Ko e mena haia ko tautolu, tuga a Iesu mo e tau aposetolo, kua manako ke fakaaoga e tau magaaho oti ke talahau e fekau he Kautu ke he falu. Kia fakatumau a tautolu ke fakamatala fakamakai e tala mitaki ki a lautolu kua manako ke fanogonogo. He taute pihia to lagomatai a lautolu kua loto fakamoli ke ‘kitia ai kua kehe a ia kua fekafekau ke he Atua, mo ia kua nakai fekafekau ki a ia.’—Mala. 3:18.