Ko Hai ka Liga Talia e Fakaako Tohi Tapu?
1 Ko e perofeta ko Amosa ne fakapuloa to ha ha i ai e hoge ke he motu ha Isaraela, “nakai ko e hoge he tau mena kai, ti nakai ko e fia inu ke he magavai, ka ko e hoge ke he tau kupu a Iehova ke fanogonogo ki ai.” (Amosa 8:11) Ke aoga ma lautolu kua hoge mo e fia inu fakaagaga, kua tufa he fakatokatokaaga ha Iehova e lahi he tau tohi faka-Tohi Tapu he lalolagi katoa.
2 Hoko mai mogonei, ne lomi e tautolu 70 e miliona he tau tohi Iloilo mo e 91 e miliona he tau porosua Manako. He fakaako e kupu moli, kua fakaaue a tautolu ke he mukamuka mo e lauia mitaki he tau tohi nei. Pete ia, ko e tokologa he tau tagata ne moua e tau tohi ha tautolu kua nakai la fakaako ia e Tohi Tapu mo tautolu. Ko e heigoa ha tautolu ka taute hagaao ke he mena nei?
3 Ko e Foakiaga Takitaha kua Kakano ke Ligaliga ke Fakaako! Manamanatu la ke he mena tupu ke he tagata fakailoa ne foaki e fakaakoaga ke he fifine he magaaho fakapa he vagahau a ia ki a ia he gutuhala. Ne mafiti a ia ke talia. Ne tala age a ia ki a ia he magaaho fakamui, “Ko koe laia e tagata fakamua ne foaki ke fakaako e Tohi Tapu mo au.” He matakavi hau, tokofiha la e tagata ne fita e moua e tau tohi ka liga talahau e mena taha ia? Ko e tau foakiaga takitaha kua fakaata e magaaho ma e tau liu ahi atu mo e fakaakoaga Tohi Tapu he kaina.
4 Ha kua fa fehagai a tautolu mo e tau tagata kua fita e moua e tau tohi ha tautolu, fakalagalaga fefe e tautolu e fiafia ke fakaako e mena kua toka ai he tau tohi ha tautolu? Ne huhu fakahako he taha Fakamoli ke he tagata he kaina kaeke kua fai huhu faka-Tohi Tapu a ia, ko e fua ni kua pehe a ia, “Nakai.” Ne peehi ni e matakainaga fifine, “Moli liga na fai.” Ne fai huhu e fifine, ati kamata e fakaakoaga. He ha he huhu ke he tagata he fale kua manako nakai a ia ke ako e matakupu he Tohi Tapu ke he huhu po ke manatu kua tupetupe a ia ki ai? Mautauteute ke talaga taha huhu fakalagalaga ka nakai manamanatu a ia ke he ha mena. Ko e tau fakaakoaga pihia ka liga fakatoka e puhala ma e fakaakoga tumau he tau kupu moli he Tohi Tapu.
5 Ko e gahua he fakaako Tohi Tapu ko e matapatu he ha tautolu a fekafekauaga. Ha kua nakai iloa e tautolu ko hai ka talia e fakaakoaga, kia nakai fakauaua ke foaki taha ke he ha tagata kua feleveia mo koe. Uta e manatu ki a Iehova he liogi, ti gahua fakalagotatai mo e tau liogi hau. Nakai leva to moua e koe taha tagata ne kua foaki e fakaakoga, ke talia ai!—1 Ioa. 5:14, 15.