“Kia Eke e Tau Mena Oti Kia Tupu Ai e Fakamafanaaga”
1 He fehagai mo e tau matakainaga ha tautolu, kua lata ia tautolu ke taute e mena kua mitaki ma e ha lautolu a fakamafanaaga. Kakano e mena nei ke manamanatu ke he puipuiaga he tau manako fakaagaga ha lautolu. Kaeke ke gahua a tautolu he faga gahua tupe kua putoia e fakatupuaga he koloa po ke gahua, kua lata ia tautolu ke fakaeneene he nakai taute ha mena ke fakatupetupe aki e tau matakainaga ha tautolu.—2 Kori. 6:3; Filipi 1:9, 10.
2 Kua putoia e falu he tau pisinisi hagahaga kelea kehekehe, he kitekite ke he tau Kerisiano ko e tau tagata fakatau mitaki. Ko e falu fakatokatokaaga fakafua kua fakamafana e tau hukui ha lautolu ke kitekite ke he tau tagata oti kana mo tau tagata fakatau mitaki—putoia foki a lautolu kua fakalataha ke he lotu taha ia mo lautolu. Kua fakatokatoka he falu matakainaga e tau fakapotopotoaga lalahi he Tau Fakamoli ma e kakano ke fakamalolo a lautolu ke putoia ke he tau gahua fakapisinisi. Kua fakatolomaki he falu e gahua ha lautolu he fakahako atu ke he tau tagata talitonu he puhala he tau vala tala, tau porosua, tau vala tala he Internet, po ke tau tepi. Kua tonu kia ma e Kerisiano ke fakaaoga hana tau matutakiaga fakateokarasi ke pule ke he hana tau matakainaga fakaagaga? Nakai!—1 Kori. 10:23, 24, 31-33.
3 Lata e Tau Matakainaga ke Mataala: Nakai pehe e mena nei kua nakai maeke e Kerisiano ke taute pisinisi mo e matakainaga. Ko e mena fakatagata ni a ia. Pete ia, kua kamata he falu e tau puhala pisinisi kua fakaohooho e lotokai, ti fakalagalaga e lautolu e tau matakainaga talitonu ke eke mo tau hoa po ke tau tagata moua tupe ha lautolu. Laulahi he tau gahua nei ne kaumahala, ati totogi ai e lautolu ne fakalataha ki ai e tau tupe loga. Pete ni ko lautolu ne fakalataha ke he gahua ne kua omoomoi he manako ke moua mafiti e tupe, ko e tagata fakatokatoka kua nakai lata ke logona kua ataina a ia mai he tukupau kaeke ke kaumahala e tau gahua ia. Kua lata ia ia ke manamanatu fakamitaki ke he puhala ke tupu ki mua e malolo fakaagaga mo e fakatino he hana tau matakainaga ka lauia e tau mena tutupu ha kua nakai kautu e pisinisi. Ko lautolu kua ha ha i ai e tau matagahua fakateokarasi kua lata ke fakaeneene pauaki hagaao ke he tau kumiaga fakatupe ha lautolu ha ko e to fakalilifu mo e falanaki lahi he falu a lautolu. Nukua hepe ke fakaaoga hehe e falanaki ia. Ko e tau kotofaaga he fekafekauaga tapu kua liga kaumahala ka galo he matakainaga e fakalilifu mai he falu.
4 Ko e foliaga ha tautolu kua lata “kia eke e tau mena oti kia tupu ai e fakamafanaaga.” (1 Kori. 14:26) Kua lata ia tautolu ke kalo kehe mai he futia e tau gahua fakatupe i loto he fakapotopotoaga po ke fakatolomaki ai. Ko e tau mena pihia kua nakai fai mena ke fakalavelave aki e tau kakano faka-Tohiaga Tapu ma e fakapotopoto auloa.—Hepe. 10:24, 25.