Tala Mooli Hagaao ke he Vahā i Mua
Kua manamanatu nakai a koe to fēfē la e vahā i mua? Fakakite mai he Tohi Tapu e tau mena tutupu aoga lahi kua tata mai ka lauia e tau tagata oti he lalolagi.
Fakamaama e Iesu e puhala ka “iloa ai e [ta]utolu, kua tata tuai e kautu he Atua.” (Luka 21:31) Ne talahau tuai e ia fakalataha mo e falu mena foki, to ha ha ai e tau felakutaki, tau mafuike lalahi, tau hoge, mo e tau tatalu—ko e tau mena ia kua kitia e tautolu mogonei.—Luka 21:10-17.
Fakakite foki he Tohi Tapu “ko e tau aho fakamui” he pule he tagata to kitia ai ke he mahani kelea he tau tagata. Maeke a koe ke totou e fakamaamaaga he 2 Timoteo 3:1-5. Ka kitia e koe e tau mahani mo e tau tuaga pihia mogonei, to talia e koe ko e perofetaaga ia he Tohi Tapu kua tatai lahi mo e tau mena tutupu mogonei.
Ko e heigoa e kakano he mena nei? Kua tata mai e magaaho ke fakahoko he Kautu he Atua e tau hikiaga lalahi ke mitaki e moui he lalolagi. (Luka 21:36) He Tohi Tapu, mavehe mai he Atua e tau mena mitaki ma e lalolagi mo e tau tagata ka nonofo ai. Hanei falu fakataiaga.
MITAKI E PULE
“Ti foaki age kia ia [Iesu] e pule, mo e fakahekeaga, mo e kautu, kia fekafekau kia ia e tau motu oti, mo e tau kautu, mo e tau vagahau kehekehe; ko e hana pule ko e pule tukulagi haia, nakai mole atu ia, ko e hana kautu foki nakai fakaoti ia.”—TANIELU 7:14.
Kakano he mena nei: To fiafia e moui haau i lalo hifo he fakatufono mua ue atu he lalolagi katoa ne fakatū he Atua mo e ko e Tama haana e Patuiki.
MITAKI E MALOLŌ TINO
“To nakai pehe mai foki taha kua nofo ai, Kua gagao au.”—ISAIA 33:24.
Kakano he mena nei: To nakai liu a koe ke gagao po ke kulikuli; to maeke a koe ke moui tukulagi.
MAFOLA KATOATOA
“Kua fakahiku e ia e tau ato hoko ke he fakatulakiaga he lalolagi.”—SALAMO 46:9.
Kakano he mena nei: To nakai liu fakamatakutaku he felakutaki mo e to utakehe e tau matematekelea oti ne tupu mai ai.
TO PUKE E LALOLAGI HE TAU TAGATA MITAKI
“Ti nakai ha i ai e tagata mahani kelea; . . . Ka ko e tau tagata mahani molu, to eke ma lautolu e motu.”—SALAMO 37:10, 11.
Kakano he mena nei: To nakai fai tagata mahani kelea, ko e tau tagata ni kua fiafia ke omaoma ke he Atua.
TO EKE E LALOLAGI KATOA MO PARATAISO
“To ta fale e lautolu, mo e nonofo ai a lautolu; to to e lautolu e tau ulu vine, mo e kai ai e lautolu ha lautolu a tau fua.”—ISAIA 65:21, 22.
Kakano he mena nei: To fulufuluola e lalolagi katoa. To fakamooli he Atua e liogi ha tautolu ke eke haana a finagalo “ke he lalolagi.”—Mataio 6:10.