Fakailoa e Higoa Faka-Atua
1. Ko e heigoa e lauiaaga ke he tau tagata he iloa e higoa he Atua?
1 Tali fefe a koe he magaaho ne logona fakamua e koe e higoa he Atua? Ne tatai e tali he tokologa mo e fifine ne pehe: “Magaaho ne kitia fakamua e au e higoa he Atua i loto he Tohi Tapu, ne tagi au. Kua omoomoi lahi au he iloa nukua maeke moli ia au ke iloa mo e fakaaoga e higoa he Atua.” Ki a ia, ko e ako he higoa faka-Atua ko e lakaaga aoga ke iloa a Iehova ko e peresona mo e maeke ke atihake e fakafetuiaga mo ia.
2. Ko e ha kua fakamafiti ai ma tautolu ke fakaako e falu hagaao ki a Iehova?
2 Ko e Ha ne Fakailoa Ai? Kua matutaki e higoa he Atua mo e hana tau mahani, tau finagalo, mo e tau gahua. Ne matutaki foki mo e fakamouiaga. “Ha ko e mena fakamomoui a lautolu oti kana kua ui ke he higoa he Iki,” he tohi e Paulo. Ka e “tauui fefe a lautolu kia ia,” he fakakakano e Paulo, ato ako fakamua e tau tagata hagaao ki a Iehova mo e fakagahuahua e tua ki a ia? Ko e mena ia, kua fakamafiti ma e tau Kerisiano ke fakailoa atu ke he falu e higoa mo e kakano he higoa he Atua. (Roma 10:13, 14) Pete ia, ha ha agaia e kakano mua atu ne kua lata e higoa faka-Atua ke fakailoa.
3. Ko e heigoa e matapatu kakano he fakamatala ha tautolu?
3 He tau atu tau 1920, ne mailoga he tau tagata he Atua mai he tau Tohiaga Tapu e mena ne tupu ke he lalolagi mo e lagi katoatoa ha ko e fakatokolugaaga he pule katoatoa he Atua mo e fakatapuaga he hana higoa. Ato moumou e Iehova a lautolu ne mahani kelea ke uta kehe e ekefakakelea ne fata ke he higoa hana, ko e kupu moli hagaao ki a ia kua latatonu ke ‘fakailoa atu ke he lalolagi oti.’ (Isaia 12:4, 5; Eseki. 38:23) Ko e mena ia, ko e matapatu kakano he fakamatala ha tautolu ke fakaheke a Iehova ke he tau tagata mo e fakatapu hana higoa ki mua he tau tagata oti kana. (Hepe. 13:15) Ko e fakaalofa ke he Atua mo e katofia ka omoomoi a tautolu ke fakalataha katoatoa ke he gahua nukua fakauku he Atua.
4. Hokotia fefe e Tau Fakamoli a Iehova ke moua e higoa he Atua?
4 “Ke Moua Ai e Tau Tagata Māna”: He tau 1931 ne hiki e higoa ha tautolu ke he Tau Fakamoli a Iehova. (Isaia 43:10) Tali mai ai, ko e tau tagata he Atua hane fakailoa e higoa faka-Atua ati talahau ai he tohi Proclaimers, lau 124: “Ke he lalolagi katoa, ko e ha tagata ne fakaaoga ataina e higoa Iehova kua mukamuka lahi ke iloa ko e taha he Tau Fakamoli a Iehova.” Kua iloa pihia nakai a koe? Ko e loto fakaaue ke he mitaki lahi ha Iehova kua lata ke omoomoi a tautolu ke ‘fakamonu ke he hana higoa,’ he tutala hagaao ki a ia he tau magaaho oti kua lata.—Sala. 20:7; 145:1, 2, 7.
5. Putoia fefe e tau mahani ha tautolu he hahamo e higoa he Atua?
5 He eke mo “tau tagata māna,” kua lata ia tautolu ke fakatokoluga hana tau tutuaga. (Gahua 15:14; 2 Timo. 2:19) Fa mahani ai ko e tau mena fakamua he tau tagata ne mailoga ke he Tau Fakamoli a Iehova ko e tau mahani mitaki ha lautolu. (1 Pete. 2:12) Kua nakai manako a tautolu ke holitu e higoa hana he fakaheu e tau matapatu fakaakoaga mahani Atua po ke tuku ke uaaki e tapuaki ki a ia he tau momoui ha tautolu. (Levi. 22:31, 32; Mala. 1:6-8, 12-14) Ka e, kia fakakite he puhala moui ha tautolu na tokiofa e tautolu e monuina ia ke hahamo e higoa faka-Atua.
6. Ko e heigoa e tau monuina ne maeke ia tautolu ke olioli ki ai he magaaho nei mo e tukulagi?
6 He vaha nei, kua kitia e tautolu e fakamoliaga he ogo ha Iehova: “Ha kua kamata mai he mena ne hake ai e la, ke hoko ke he mena ne hifo ai a ia, to fakaheke ki ai haku a higoa ke he tau motu kehe.” (Mala. 1:11) Kia matutaki a tautolu ke fakailoa e kupu moli hagaao ki a Iehova mo e ‘fakamonu atu ke he hana higoa tapu ke he tukulagi tukumuitea.’—Sala. 145:21.