Kulikuli—Ka e Fua Mitaki
1 Kaeke ko koe taha he tokologa he Tau Fakamoli a Iehova ne fai kulikuli, maeke agaia ia koe ke fua mitaki e fekafekauaga. Moli, maeke he tuaga hau ke tamai e tau magaaho pauaki ki a koe ke fakamatala mo e ke fakamalolo e falu.
2 Foaki e Fakamatala: Tokologa ne fehagai mo e kulikuli kua hane fakalataha katoatoa ke he fekafekauaga. Ma e fakatai, taha e matakainaga fifine ne lauia kelea e puhala fano mo e vagahau hana ha ko e iihi, ne iloa e ia na maeke ia ia ke fakalataha ke he gahua mekasini ka fakatu he tane hana e motoka ha laua fakatata ke he hala o hui ne tokologa ne fakaaoga. He taha magaaho, ne foaki e ia 80 e mekasini he ua ni e tula! Ko e tau tutuaga pauaki hau ka liga maeke foki ia koe ke feleveia mo e tau tagata ne liga uka ke moua. Ka pihia, onoono ki a lautolu ia ko e fonua pauaki hau.
3 Maeke e fakamatala hau ke lauia mitaki lahi! Ka kitia he falu e mauokafua mo e lauia mitaki e kupu moli he Tohi Tapu ke he moui hau, to liga futia mai foki a lautolu ke he fekau he Kautu. Laulahi ai, ka feleveia a koe mo e tau tagata hane fehagai mo e mamahi, liga ko e tau mena ne tutupu ke he moui hau ka lagomatai a koe ke fakamafana a lautolu mai he Kupu he Atua.—2 Kori. 1:4.
4 Fakamalolo e Falu: Nakai kia fakamalolo a koe he tala ke he moui ha Laurel Nisbet, ne puipui ni ke he mama lapatoa ke 37 e tau ka e lagomatai e ia 17 e tagata ke iloa e iloilo tonu he kupu moli he Tohi Tapu? He aga taha ia, ko e fakafifitakiaga hau ka omoomoi e tau matakainaga talitonu ke fakamakamaka ke he fekafekauaga ha lautolu ki a Iehova.—g93 1/22 lau 18-21.
5 Pete ka fakakaupa he tau tutuaga hau a koe ke nakai finatu ke he fonua ke tuga he manako hau, maeke agaia ia koe ke fakamalolo e falu. Taha matakainaga tane ne pehe: “Ne ako e au na maeke e tagata ne kulikuli lahi mahaki ke lagomatai lahi ke he falu. Ko e hoana haku mo au hane tuga e taula ke he tau tagata kehekehe he fakapotopotoaga. Ha ko e tau tutuaga ha maua ati nonofo tumau a maua hinei, ti ata tumau.” Pete ia, ha ko e kulikuli hau, to liga nakai maeke tumau ia koe ke gahua fakatatau ke tatai mo e manatu makutu hau. He tumau ai, lafi mo e falu lagomataiaga to liga maeke ia koe ke fakalataha makaukau ke he fekafekauaga. Ko e mena ia, ka manako lagomatai a koe, kia nakai fuafuakelea ke tutala ke he tau motua po ke falu he fakapotopotoaga ne maeke ke lagomatai a koe.
6 Kitia e Iehova e tau gahua oti hau ne taute ke fekafekau atu ki a ia, ti fiafia a ia ke he fekafekau solu katoa hau. (Sala. 139:1-4) He falanaki a koe ki a ia, to fakamalolo e ia a koe ke fua mitaki mo e fai kakano e fekafekauaga hau.—2 Kori. 12:7-10.