‘Kia Fakalahi Atu’
1. Ko e heigoa e matagahua ha tautolu takitokotaha?
1 He fakamatakainaga Kerisiano, igatia a tautolu oti mo e matagahua ke lafi ke he mafanatia he fakapotopotoaga. (1 Pete. 1:22; 2:17) Ko e mafanatia pihia kua tupu mai ka ‘fakalahi atu’ e tautolu e fakaalofa hofihofi ha tautolu ko e taha ke he taha. (2 Kori. 6:12, 13) Ko e ha kua aoga lahi ke iloa mitaki e tau matakainaga fifine mo e tane ha tautolu?
2. Ko e ha kua aoga ai ke feaki e fekapitigaaki mo e tau matakainaga talitonu?
2 Tupu Malolo e Fekapitigaaki: He kamata fakahaga a tautolu ke iloa mitaki e tau matakainaga talitonu, kua lahi e loto fakaaue katoatoa ha tautolu ke he tua, fakauka, mo e falu mahani mitaki ha lautolu. Ko e tau kuku ha lautolu kua tuga na ikiiki ki a tautolu, ti kua tupu e pipiaga fekapitigaaki. He feiloaaki mitaki, kua tu hagahaga mitaki a tautolu ke atihake mo e fefakamafanaaki. (1 Tesa. 5:11) Maeke ia tautolu ke eke “mo fakamafanatia” ko e taha ke he taha ke totoko e tau fakaohoohoaga ulu moumou he lalolagi ha Satani. (Kolo. 4:11) He onoono ke he tau aho fakahiku nei ne kua pukeina ke he tau peehiaga, kua fakaaue lahi ha a tautolu he fai kapitiga mitaki he tau tagata ha Iehova!—Fakatai 18:24.
3. Maeke fefe ia tautolu ke eke mo fakamafanatia ke he falu?
3 Kua maeke e tau kapitiga tata ke eke mo punaaga he malolo mo e mafanatia ka fehagai a tautolu mo e tau kamatamata lalahi. (Fakatai 17:17) Taha e Kerisiano ne taufetului mo e tau logonaaga kua nakai aoga a ia ne talahau: “Ne ha ha e tau kapitiga ne talahau e tau mena mitaki hagaao ki a au ke lagomatai au ke fakakautu mai he tau manatu kelea haku.” Ko e tau kapitiga pihia ko e fakamonuina mai ia Iehova.—Fakatai 27:9.
4. Maeke fefe ia tautolu ke iloa mitaki e falu i loto he fakapotopotoaga?
4 Fakakite e Fiafia ke he Falu: Maeke fefe ia tautolu ke fakalahi atu e fakaalofa hofihofi ha tautolu ke he tau matakainaga talitonu? Ke lafi ke he fakafeleveia atu ke he falu he tau feleveiaaga Kerisiano, lali ke putoia a lautolu he fakatutalaaga fai kakano. He nakai ahiahi teao ke he tau mena fakatagata ha lautolu, fakakite e fiafia fakatagata. (Filipi 2:4; 1 Pete. 4:15) Taha puhala ke fakakite e fiafia ke he falu ko e uiina a lautolu ke kai auloa fakalataha. (Luka 14:12-14) Po ke liga pulega a koe ke gahua mo lautolu ke he fekafekauaga he fonua. (Luka 10:1) He taute e tautolu e lakaaga ke iloa mitaki e tau matakainaga ha tautolu, kua omoomoi e tautolu e maopoopo he fakapotopotoaga.—Kolo. 3:14.
5. Ko e heigoa taha puhala ke fakalaulahi atu e fekapitigaaki ha tautolu?
5 Kua liga hihiga ni kia a tautolu ke fifili e tau tagata ke lafi lahi ki ai mai ni ia lautolu ne atu taha po ko lautolu ne tatai e tau mena ne fiafia ki ai mo tautolu? Kua nakai lata ia tautolu ke eke e tau mena pihia ke fakakaupa aki e fekapitigaaki ne feaki e tautolu i loto he fakapotopotoaga. Ko Tavita mo Ionatana pihia a Ruta mo Naumi ne feaki e fekapitigaaki mauokafua pete he kehekehe e tau tau moui mo e tau tupumaiaga. (Ruta 4:15; 1 Samu. 18:1) Maeke nakai ia koe ke fakalaulahi atu e fekapitigaaki hau? Ko e taute pihia ka tamai e tau monuina ne nakai amaamanaki a koe ki ai.
6. Ko e heigoa falu fua mitaki he fakalahi atu e fakaalofa hofihofi ke he tau matakainaga ha tautolu?
6 He fakalahi atu e fakaalofa hofihofi ha tautolu ke he falu, kua fefakamaloloaki e taha mo e taha mo e omoomoi e mafola i loto he fakapotopotoaga. Lafi ki ai, to fakamonuina e Iehova a tautolu ma e fakaalofa ne fakakite e tautolu ke he tau matakainaga ha tautolu. (Sala. 41:1, 2; Hepe. 6:10) Ko e ha nakai taute ai mo foliaga hau ke fakamahani ke iloa mitaki e tokologa atu foki?