Fakaaoga Fakapulotu e Magaaho Hau
1 Ko e manako ha tautolu ke fakafiafia a Iehova kua fakalagalaga a tautolu ke fakave e tau momoui ha tautolu ke he tau gahua fakaagaga. Kua fakaako he Kupu hana a tautolu ke ‘kumikumi fakamua e kautu’ mo e ke ‘mailoga e tau mena ne mua e aoga.’ (Mata. 6:33; Filipi 1:10) Maeke fefe a tautolu ke fakatau e tau magaaho ma e tau mena he Kautu mo e tuku e tau matagahua nakai aoga lahi ke he tokaaga ha lautolu?—Efeso 5:15-17.
2 Tuku Fakamua e Tau Gahua he Kautu: Setulu e magaaho hau ke nakai moumou ke he tau mena nakai aoga. Falu ne kamata e mahina he fakatoka kehe e tau magaaho pauaki he kalena ha lautolu ma e fekafekauaga he fonua. Ti mataala a lautolu ke nakai fakaata falu mena foki ke fakatauhele e tau fakaholoaga ia. Ko e mena taha ia ka taute ke fakatau e magaaho ma e tau feleveiaaga, fakaako fakatagata, mo e tau fonoaga. Tokologa ne ha ha ai e fakaholoaga he tau aho takitaha kua kamata po ke fakaoti e aho aki e totouaga he Tohi Tapu. Fakatoka kehe e magaaho pauaki ma e tau gahua aoga takitaha, ti nakai fakaata ha mena fakateaga ke tauhele aki.—Fakama. 3:1; 1 Kori. 14:40.
3 Fakakaupa e Fakaaoga he Lalolagi: Kua ataina lahi ke he falu motu e tau sipote, fakafiafiaaga, faofao tino, tau matafeua, mo e falu tutuliaga. Ne molea e lahi he magaaho ne fakaaoga he tokologa ke kitekite televisoni po ke fakaaoga e tau komopiuta. Pete ia, he lavelave ke he tau matagahua fakafiafia mo e tau koloa fou ne foaki he lalolagi nei ka takitaki moli ke he fakaita. (1 Ioa. 2:15-17) Ti, kua tomatoma he tau Tohiaga Tapu a tautolu ke nakai toto fakalahi e tau mena he lalolagi. (1 Kori. 7:31) He muitua e fakatonuaga pulotu ia, maeke ia koe ke fakakite ki a Iehova kua tuku mua e tapuakiaga hana he moui hau.—Mata. 6:19-21.
4 Kua teitei oti tuai e magaaho ne toe ma e fakatokaaga nei. Ko lautolu ne tuku fakamua e tau mena he Kautu ka fiafia mo e to moua e taliaaga he Atua. (Fakatai 8:32-35; Iako. 1:25) Ati o mai a tautolu ke fakaaoga fakapulotu e koloa uho nei, ko e tau magaaho ha tautolu.