Ko e Fefakamafanaaki ma e Tau Tagata Oti
1. Ko e heigoa e tau magaaho pauaki kua foaki he tau ahiahi he tau leveki faifano?
1 Ne tohi he aposetolo ko Paulo ke he fakapotopotoaga i Roma: “Kua manako lahi au ke feleveia mo mutolu, kia ta atu ai e au kia mutolu taha mena fakaalofa ke lata mo e [a]gaga ke fakatumau ai a mutolu; ko e kakano hanai, kia fefakamafanaaki a tautolu ke he tua ha tautolu, ko mutolu katoa mo au.” (Roma 1:11, 12) Ko e tau ahiahi he vahā nei ne taute he tau leveki faifano kua foaki e tau magaaho pihia foki ma e fefakamafanaaki.
2. Ko e ha ne fakailoa tuai e ahiahi he leveki takaiaga?
2 Ko e Fakapotopotoaga: Ko e ahiahi he leveki takaiaga kua fa fakailoa tuai ke he fakapotopotoaga ke he kavi tolu e mahina ato hoko ai. Kua fakaatā ai ke fai magaaho a tautolu ke hikihiki e tau setulu ke maeke ke aoga katoa mai ai. (Efeso 5:15, 16) Kaeke ke gahua tupe a koe, liga ole a koe ke fai magaaho ka nakai gahua ai ke lalago e gahua he fonua he faahi tapu ia. Kua fakatoka e falu ke paionia fakakū he mahina he ahiahi. Kaeke ke fitā e fakatoka a koe ke nakai fakalataha i ai he magaaho ia, maeke nakai ia koe ke taute e tau hikiaga ke ha ha i ai he faahi tapu ia?
3. Ko e heigoa ha tautolu ka taute fakatagata he magahala he ahiahi ke moua e fakamalolōaga?
3 Ko e matapatu kakano he ahiahi he leveki takaiaga ke foaki e fakamalolōaga mo e fakamahani fakatagata ke he fekafekauaga he fonua. Maeke nakai ia koe ke ole ke gahua mo ia po ke hoana haana ka fai hoana a ia? Kua fiafia e leveki takaiaga he gahua mo e tau tagata fakailoa kehekehe, putoia a lautolu ne tote e iloaaga po ke temotemoai e lotomatala ke he fekafekauaga. Maeke ia tautolu oti ke ako mai he puhala gahua haana he fonua mo e fakagahua e ha lagomataiaga kua liga foaki fakatotonu e ia. (1 Kori. 4:16, 17) He uiina a ia ke kai auloa mo koe to hafagi fakalaulahi atu e magaaho ma e lafiaga atihake. (Hepe. 13:2) Ha kua taute pauaki e tau lauga haana ke lata mo e tau manako he fakapotopotoaga, kia fanogonogo fakamitaki ki ai
4. Liga fakamafanatia fēfē e tautolu e leveki takaiaga ha tautolu?
4 Ko e Leveki Takaiaga: Kua nakai kehe e aposetolo ko Paulo mai he tau matakainaga ne leveki e ia ha kua fehagai foki a ia ke he tau paleko mo e tau fakaatukehe ti loto fakaaue a ia ke he fakamafanaaga. (2 Kori. 11:26-28) Magaaho ne iloa he fakapotopotoaga i Roma ko e hau fai a Paulo, ne nofo puipui mogonei, ne fenoga falu ki Apio Foro ke fonofono a ia—ko e 74 e kilomita he mamao! “Kua kitia atu e Paulo a lautolu, ati fakaaue ai ke he Atua, mo e fakamanavalahi a ia.” (Gahua 28:15) Maeke foki ia mutolu ke fakamafanatia e leveki takaiaga ha mutolu. Fakakite ki a ia e “lilifu kua lafi ua” he fiafia lahi ha mutolu ke lalago e ahiahi haana. (1 Timo. 5:17) Talahau mo e fakakite e loto fakaaue mooli ha mutolu ma e tau gahua haana ke lata mo mutolu. To olioli a ia mo e hoana haana he kitia e laua e tua, fakaalofa, mo e fakauka ha mutolu.—2 Tesa. 1:3, 4.
5. Ko e ha kua lata a tautolu oti ma e fakamafanaaga he vahā nei?
5 Mogonei he “tau aho fakamui to hohoko mai ai e tau aho uka,” ti ko hai ha tautolu ne nakai manako ke he fakamafanaaga? (2 Timo. 3:1) Fifili mogonei ke fakalataha katoatoa ke he faahi tapu pauaki he tau gahua he leveki takaiaga. Ko tautolu oti—tau leveki faifano mo e tau tagata fakailoa foki—ka olioli fakalataha ha ko e fefakamafanaaki. He puhala nei to “fetomaaki a mutolu, mo e fefakamafanaaki a mutolu.”—1 Tesa. 5:11.