Puha Hūhū

◼ Lagomatai fēfē e tau tagata oti ke fakatumau e takatakaiaga aoga ke fakaako ke he tau feleveiaaga fakapotopotoaga? (Teu. 31:12)

Mai he fakalilifu hokulo ki a Iehova mo e foakiaga haana he tau feleveiaaga he fakapotopotoaga, kua fakamalolō ke he tau tagata oti ke hohoko tuai mo e ke mautali ke fakaako e ia. Kua aoga ke nonofo he tau atu nofoa i mua he fale he tapuakiaga, ka e toka e tau nofoa i tua ma lautolu ne fai tama ikiiki mo lautolu ne mule he falu magaaho. Ato kamata e feleveiaaga, kua lata ke hiki e fakatokaaga he tau mena tuga e tau selafoni mo e tau koloa pihia foki ke nakai fakatauhele e toloaga. To gahoa mo e fakatote hifo e tau fakatauhele ka fakatumau he tau tagata oti ne ha ha ai e aga fakalilifu he feleveiaaga katoa.​—Fakama. 5:1; Filipi 2:4.

Ka kamata a lautolu ne foou ke o atu he tau feleveiaaga, ko e tagata he fakapotopotoaga kua mahani mo lautolu ka ole ke nonofo mo lautolu. To lagomatai lahi e mena nei ka fai tama ikiiki kua lata ke fakamahani. He o atu ke he tau feleveiaaga kua liga ko e mena foou ma e magafaoa. Ka pihia, to liga loto fakaaue a lautolu he maeke ke nonofo he tau atu nofoa i tua ka nakai fakatauhele lahi ke he falu ka lata e tau matua ke ō fakakū ki fafo he fale he tapuakiaga ke hagaaki ke he tau manako he fanau. (Fakatai 22:6, 15) Nakai lata he tau magafaoa ne fai tama ikiiki ke nonofo he poko kehe ka atāina e tau tama ke fakahohā. Kua fa mitaki lahi mahaki ma e tau matua ke foaki e akonaki po ke hagaaki ke he tau manako fakatagata i fafo he poko lahi mo e to liliu ai ki loto mo e fanau.

Ko e tau fekafekau ne kotofa ke fakatumau e takatakaiaga ke latatonu mo e fale he tapuakiaga. Ko lautolu ke lagomatai e tau magafaoa mo lautolu ne fa mule he falu magaaho ke kumi e tau nofoa kua latatonu. Kia mataala e tau fekafekau ke fakailoilo mo e fakalotomatala he lagomatai e falu ke nonofo fakamitaki ka e nakai fakatauhele teao. Fakaaoga e lautolu e fifiliaga mitaki ka fehagai mo e tau fakatauhele fakaofo. Ka fakatauhele he mahani he tama e falu, maeke he tau fekafekau leveki ke foaki e lagomataiaga totonu.

Ko e tau tagata oti ne ha ha ai he tau feleveiaaga ma e tapuakiaga ka lafi ke he takatakaiaga aoga ke fakaako hagaao ki a Iehova mo e amaamanakiaga haana ma e lalolagi foou kua mafola mo e tututonu.​—Hepe. 10:24, 25.