Ko e Gahua kua Mua Atu e Fiafia
1. Ko e heigoa e gahua fakamalolō fakaagaaga kua tupu he vahā nei ha tautolu?
1 Kua pukenamo he fiafia lahi e tau loto ha lautolu kua kitia mata e fakamalolōaga ke he tino he senetenari fakamua. (Luka 5:24-26) He vahā ha tautolu, kua fiafia lahi a tautolu he gahua fakamalolō fakaagaaga. (Fakakite. 22:1, 2, 17) Ko e fiafia ha ia ke totou e tau tala ne kua fakakite mai ko e Kupu a Iehova mo e agaaga tapu kua hikihiki e tau momoui he tau tagata takitokotaha! Ka kua mua atu foki e palepale ha ko e fakalataha ke he gahua nei ha kua taute e fakaakoaga Tohi Tapu holo ki mua.
2. Ko e heigoa e fiafia ka iloa e tautolu he fakaako e kupu mooli mo e taha tagata?
2 Ko hai e higoa he Atua? Ko e ha ne fakaatā e ia e matematekelea? Ko e heigoa he Kautu he Atua ka taute ke lata mo e tagata? Moua e tautolu e fiafia nakai ni ke tali e tau hūhū ia, ka e pihia foki ha kua kitia e fiafia kua puna mai he tagata fakaako ha kua iloa e ia e kupu mooli. (Fakatai 15:23; Luka 24:32) Ha kua holo ki mua e tagata fakaako, liga kamata a ia ke fakaaoga e higoa a Iehova, taute e tau hikihiki he haana tau tapulu mo e puhala tauteute, tiaki e tau mahani kelea, mo e kamata ke fakamatala ke he falu. Ka holo ki mua a ia ke he tukuleleaga mo e papatisoaga, to eke a ia mo matakainaga ha tautolu mo e tagata ke gahua auloa. Igatia e tau lakaaga holo ki mua nei mo kakano ke fiafia ki ai.—1 Tesa. 2:19, 20.
3. Ko e heigoa e tau lakaaga mitaki kua lata ke taute e tautolu ke kamata e fakaako Tohi Tapu?
3 Maeke Nakai a Koe ke Fakatau Gahua? Ka manako a koe ke fakatau gahua ke he gahua fiafia lahi nei, ole ki a Iehova ke he monuina ke taute taha fakaako Tohi Tapu, ti gahua fakatatau mo e haau e liogi. (1 Ioa. 5:14) Gahua fakamatala ke he ha mena mo e ha magaaho kua moua e tau tagata. Foaki e fakaako Tohi Tapu ke he tau magaaho oti kua lata. (Fakama. 11:6) Ka moua e koe e tagata ne fiafia, to e tega he kupu mooli, ti liu atu ke fakamalū.—1 Kori. 3:6-9.
4. Ko e ha kua lata ke foaki e tautolu e tau fakaako Tohi Tapu mo e agaaga fakamafiti?
4 Tokologa e tagata ne toe kua hoge mo e fia inu ke he tututonu. Ko hai ka lagomatai ke fakapuke e manako fakaagaaga ha lautolu ke taute e fakaakoaga Tohi Tapu mo lautolu? (Mata. 5:3, 6) O mai a tautolu ke foaki fakamakai e tautolu a tautolu ke lagomatai mo e fakakatoatoa e gahua fakamatala mo e taute tutaki, to hoko mai e fakaotiaga ke he heleheleaga.—Isaia 6:8.