Kua Mautali Nakai e Fanau Haau?
1. Ko e ha kua lata e tau fanau ne o he aoga ke mautali?
1 He kamata e tau kuata takitaha he aoga, to lauia mooli e tau fanau haau mo e tau paleko foou mo e tau peehiaga. To moua foki e lautolu e tau tutuaga foou ke ‘talahau e kupu moli.’ (Ioane 18:37) Kua mautali nakai a lautolu?
2. Ke maeke ke mautali, ko e heigoa kua lata he tau fanau haau ke iloa?
2 Maama mitaki nakai he fanau haau e tau mena kua putoia he fakalataha ke he tau faiagahau fakamotu mo e tau aho okioki pouliuli mo e kakano kua hehe ke fakalataha ke he tau mena ia? Kua mautali nakai a lautolu ma e peehiaga ka feleveia mo lautolu ke tutuli e fakaakoaga tokoluga atu, ke fakatu kapitiga, mo e fakaaoga e kava po ke tau tulaki? To pehē ni kia a lautolu ko e matagahua ia kua nakai felauaki mo e lotu ha lautolu, po ke iloa e lautolu e puhala ke fakamaama e tau taofiaga ha lautolu?—1 Pete. 3:15.
3. Fakaaoga fēfē he tau mamatua e afiafi Tapuakiaga Magafaoa ke mautali e tau fanau ha lautolu?
3 Fakaaoga e Tapuakiaga Magafaoa he Afiafi: Mooli, liga fai fakatutalaaga tumau a koe he tau katoa he magahala aoga, kaeke kua lata. Ko e haau a lali pauaki ke tutala ke he tau mena hagaao ke he aoga ato kamata e kuata foou, tau foou po ke aoga foou, to foaki ke he tau fanau haau e mauokafua. He ha he fakaaoga taha po ke loga e afiafi Tapuakiaga Magafaoa ma e mena nei? Liga hūhū a koe ke he tau fanau haau hagaao ke he tau mena ne fakatupetupe lahi ki a lautolu he tauteute ke o he aoga. Ko e tau mena ne tutala a mutolu ki ai he tau tau kua mole kua maeke ke liu onoono ki ai mogonei ha kua lalahi e tau fanau mo e kua holo ki mua e maamaaga. (Sala. 119:95) Liga lafi e koe ke he tau magaaho fakamahani ka fakatai ko koe ko e faiaoga, tagata fakatonutonu, po ke taha tama aoga. Fakaako e tau fanau haau ke tali mai he Tohi Tapu mo e fakaaoga e tau puhala lagomatai tuga e tohi Reasoning mo e Young People Ask. Taha e matua fifine ne fakaaoga e tau magaaho fakamahani ke tauteute haana tau fanau ke tutala ke he tau faiaoga foou ha lautolu he kamataaga he tau tau takitaha he aoga mo e fakailoa age ko lautolu ko e Tau Fakamoli a Iehova.—Kikite Ko e Kolo Toko, Tesemo 15, 2010, lau 3-5.
4. Ko e heigoa he tau mamatua lotomatala ka taute?
4 Ko e tau paleko kua fehagai e tau fuata Kerisiano he tau aho fakamui nei kua mua atu e “uka.” (2 Timo. 3:1) To lali e tau matua lotomatala ke manamanatu tuai ke he tau mena ka liga tutupu. (Fakatai 22:3) Taute e tau mena oti kua fahia a koe ki ai ke lagomatai e tau tama haau ke mautali.