Kua Mautali Nakai a Koe ma e Aoga?
1. Ko e heigoa e tau magaaho kua fakatali mai ki a koe he matutaki e fakaakoaga haau?
1 He fitā e kamata e aoga po ke kamata he tau foou po ke lotoga mahina, to feleveia a mutolu ma tau Kerisiano ikiiki mo e tau paleko mo e tau pehiaaga foou. Ka e ha ha foki ia mutolu e tau magaaho foou ke ‘talahau e kupu moli.’ (Ioane 18:37) Kua mautauteute mo e mautali mitaki nakai a koe ke talahau atu, po ke fakamatala?
2. Ke he tau puhala fe kua mautali a koe ke fehagai mo e paleko he aoga?
2 Ke lagomatai a koe ke kautū he tau faahi oti he moui, kua moua e koe e fakamahani lahi mai ia Iehova, mai he tau mamatua, mo e mai he fekafekau fakamoli mo e loto matala. (Fakatai 1:8; 6:20; 23:23-25; Efeso 6:1-4; 2 Timo. 3:16, 17) He mogonei kua fitā he iloa e koe e tau paleko kua amanaki a koe ki ai he aoga haau. Mo e fakamahani ke he mahani Atua mo e iloa e takatakaiaga he aoga ka fehagai ki ai a koe, kua tauteute a koe ke fakamatala. (Fakatai 22:3) Manamanatu fakahokulo ke he fakaakoaga mo e tau lagomatai faka-Tohi Tapu i loto he tau volume ne ua he Young People Ask ti pihia mo e tau vala tala ne hagaao foki ki ai ne taute fakailoa tumau he Awake!
3. Ke he tau puhala fe ka maeke ia koe ke foaki e fakamatala?
3 Ko e haau a fonua lahi mahaki ka fakaatā a koe ke fakamatala ke he tau puhala kehekehe. Ka kitia he falu e puhala he tau mena tui mo e puhala tauteute mitaki haau, mahani mo e tau kupu vagahau haau, ko e fakalilifu haau ke he tau kapitiga aoga mo e tau faiaoga haau, pihia foki mo e tau ola haau, mo e mailoga e lautolu kua ha ha ia koe e fakavēaga mauokafua he moui, falu ne liga hūhū, “Ko e ha ne kehe lahi a koe?” (Mala. 3:18; Ioane 15:19) Kua liga hafagi ki a koe e magaaho ke fakamatala mo e fakamaama e mauokafua haau. (1 Timo. 2:9, 10) He tau katoa he aoga, to liga fehagai a koe mo e tau paleko tuga e tau fakamanatuaga mo e tau aho okioki he motu. Ka hūhū ko e ha ne nakai fakalataha a koe i ai, to pehē noa ni kia a koe, “Kua nakai felauaki mo e lotu haaku; ko au taha he Tau Fakamoli a Iehova,” po ke to fai magaaho a koe ke fakamatala hagaao ke he haau a Matua fakahele he lagi, ko Iehova? Ko e tauteuteaga mitaki i lalo he takitakiaga a Iehova to taute a koe ke mautali ke fakamatala fakamitaki ke he tau faiaoga, tau kapitiga aoga, mo e falu.—1 Pete. 3:15.
4. Ko e ha kua mauokafua a mutolu to maeke ia mutolu ke kautū he aoga?
4 Pete ne liga tehatehaua a koe ha ko e amanaki ke fano he aoga, kia iloa kua ha ha ia koe e lalagoaga he tokologa ne manako ki a koe ke kautū e magaaho haau he aoga. Lafi ki ai, kua fiafia a mautolu fakalataha mo mutolu he amaamanakiaga ke fakamatala ke he falu he fonua lahi mahaki ha mutolu. Ko e mena ia, kia loto malolō mo e mautali ma e aoga!