Kia Nakai Fakauaua
1. Ko e heigoa kua lata ke loto malolō ki ai, ti ko e ha?
1 Kua fakauaua nakai a koe he fakamatala ke he aoga ha kua matakutaku neke vaiga ki a koe? Kua lata ke loto malolō mooli ke vagahau hake, mua atu ka mā a koe. Ko e heigoa ka lagomatai a koe?
2. Ka fakamatala he aoga, putoia fēfē e fifiliaga mitaki?
2 Fakaaoga e Fifiliaga Mitaki: Pete he onoono ke he aoga ko e fonua fakatagata haau, manatu kua nakai amanaki ki a koe ke kamata e tau fakatutalaaga fakaagaaga mo e tau tagata oti tuga he fakamatala a koe he taha fale ke he taha fale. Eketaha ke fakaaoga e fifiliaga mitaki ka tutala. (Fakama. 3:1, 7) Ko e vala tala fakatutala he vahega po ke tau gahua aoga ka foaki ki a koe e mogo mitaki ke fakakite e tua haau. Po ke tama aoga ka hūhū ki a koe e kakano ne nakai fai vala a koe he falu matagahua. Kua fakailoa he falu Kerisiano ke he tau faiaoga ha lautolu he kamataaga he tau he aoga ko lautolu ko e Tau Fakamoli a Iehova ti age ke he tau faiaoga e tohi kua fakamaama e tau taofiaga ha tautolu. Ko e falu ne toka e tau tohi he tau fuga laulau ke fakalagalaga e tau hūhū mai he tau kapitiga aoga ha lautolu.
3. Maeke fēfē a koe ke mautauteute ke fakamatala he aoga?
3 Kia Mautauteute: Ka mautauteute a koe, to tupu ki mua e mauokafua haau. (1 Pete. 3:15) Ti lali ke manamanatu ke he hūhū ka lagā mai, ti manamanatu ke he puhala ka tali e koe. (Fakatai 15:28) Ka maeke, uta mo koe he aoga e Tohi Tapu haau mo e falu tohi, tuga e tohi Reasoning, tohi Young People Ask, mo e tau tohi ke he tufugatia, ti maeke ia koe ke fakakia ki ai ka lata. Ole ke he tau matua haau ke fakaaoga he tau magaaho fakamahani he tapuakiaga magafaoa ha mutolu.
4. Ko e ha kua lata ia koe ke fakatumau ke fakamatala he aoga?
4 Kia Onoono Mitaki: Ua manatu teao to vaiga tumau he tau kapitiga aoga haau a koe ka totoku e koe e kupu mooli. Liga to nava he falu e loto malolō haau mo e liga to fanogonogo foki. Ka e ua fakalolelole ka nakai talia he taha. To fiafia a Iehova ha ko e lali haau. (Hepe. 13:15, 16) Fakatumau ke ole ki a ia ke lagomatai a koe ke ‘talahau mo e fakamalolo.’ (Gahua 4:29; 2 Timo. 1:7, 8) Manamanatu la ke he fiafia haau ka fanogonogo taha tagata. Liga to eke e tagata ia mo matakainaga fekafekau ha Iehova!