‘Kia Eke e Finagalo he Atua’
1. Ko e heigoa e mataulu he fakaholoaga he aho toloaga pauaki ma e tau he fekafekauaga he 2012, ti ko e ha kua latatonu ia tautolu ke fakatutala ke he matakupu nei?
1 Ne tufugatia, po ke eke a tautolu ha ko e finagalo ha Iehova. (Fakakite. 4:11) Ti kua nakai maeke mogoia ke fakamooli e finagalo ma e moui ha tautolu ka nakai fakaako mo e taute e finagalo he Atua. Nakai mukamuka e mena nei tuga he kitia, ha kua tau fakalahi a tautolu ke he hihiga he loto ke taute e “tau mena kua loto ki ai e tino katoa mo e tau manatu” po ke taute e “manako he tau motu kehe.” (Efeso 2:3; 1 Pete. 4:3; 2 Pete. 2:10) Ka nakai lagomatai he Atua, kua tu hagahaga kelea a tautolu ke “moua [he Tiapolo], kia eke hana finagalo.” (2 Timo. 2:26) Ko e fakaholoaga he aho toloaga pauaki ha tautolu ma e tau he fekafekauaga 2012 ka lagomatai a tautolu takitokotaha ke gahua fakatatau mo e matapatu ole ke toluaki he liogi fakatai, ne pehē, “kia eke hau a finagalo.”—Mata. 6:9, 10.
2. Ko e heigoa e tau hūhū ka tali he fakaholoaga?
2 Tau Hūhū ka Tali: He fanogonogo a koe ke he fakaholoaga, kumi e tau tali ke he tau hūhū nei: Ko e heigoa foki kua aoga ke tuga e fanogonogo ke he Kupu he Atua? Maeke fēfē ia tautolu ke iloa ko e heigoa e finagalo he Atua ma tautolu? Ko e ha kua lata ia tautolu ke makai ke lagomatai e tau tagata oti kana? Moua fēfē e tautolu e moui monuina mo e fiafia? Mutolu ne ikiiki, ko e heigoa ha mutolu kua lata ke fakakite ki a Iehova? Ko e heigoa e tau palepale ka moua he taute e finagalo he Atua? Ko e ha kua lata ia tautolu ke fakamafiti ke ati hake mo e fakamafana e falu?
3. Maeke fēfē ia tautolu ke aoga katoatoa mai he foakiaga fakaagaaga nei?
3 Kia eketaha ke fakalataha atu mo e ke fanogonogo fakalahi ke he fakaholoaga. Ko e hukui mai he Peteli po ke leveki takaiaga ka hau ko e tagata lauga ahiahi. Ato kamata mo e ka oti e fakaholoaga, atāina ke o atu ke tutala ki a ia mo e hoana haana, kaeke kua fai hoana a ia. Ka liu a koe ki kaina, ua eke mo tagata “fanogonogo fakanimonimo,” ka e liu fakamanatu e fakaholoaga ko e magafaoa ti fakatutala ke he puhala ka maeke ia mutolu ke gahua fakatatau fakalahi katoatoa mo e finagalo he Atua.—Iako. 1:25.
4. Ko e ha kua aoga ia tautolu ke tuku fakamua e taute e finagalo he Atua?
4 Nakai leva ko lautolu hane tutuli e tau manako ni ha lautolu mo e nakai talia ke omaoma ke he finagalo ha Iehova to moumou ai. (1 Ioa. 2:17) Kua loto fakaaue mogoia a tautolu ha kua tauteute e Iehova e tau vala tala nei he magaaho tonu ke lagomatai aki a tautolu ke tuku fakamua e taute he finagalo he Atua!