Lagomatai e Tagata he Kaina ke Moua e Kakano
1. Ha e fe e hafagiaga ke he gahua he fonua kua mitaki lahi mahaki?
1 Ha e fe e hafagiaga ke he gahua he fonua kua lauia mitaki—ko e hafagiaga kua pāpā maō po ke lagomatai e tagata he kaina ke moua e kakano mo e hokotia ke he tau fakahikuaga hako? Ne fakaaoga he aposetolo ko Paulo e puhala fakahiku he tutala ke he tau Iutaia i Tesalonia, ti ko e fua “kua talia fakatonu mai foki e falu ha lautolu.” (Gahua 17:2-4) Ko e heigoa ne putoia he fakakakano ke he falu?
2. Liga muitua fēfē e tautolu e fakafifitaki ha Paulo ka folafola e tautolu e tala mitaki?
2 Manamanatu ke he Tau Logonaaga mo e Tupu Maiaga: Ko e hafagiaga ke moua e kakano kua lata ke putoia e tau logonaaga ha lautolu he fonua. Ne kamata e Paulo e lauga ke he tau Heleni nakai tua i Areopako he totoku e tau mena ne liga iloa mo e talia e lautolu. (Gahua 17:22-31) Ko e mena ia, ka tauteute e fakataitaiaga haau, manamanatu ke he tau taofiaga fa mahani mo e tau onoono hifo he tau tagata he fonua haau. (1 Kori. 9:19-22) Ka nakai talia e tagata he kaina, lali ke kumi e tau mena ne tatai e iloaaga, ti ati hake e fakatutala haau ke he mena ia.
3. Maeke fēfē a tautolu ke fakaaoga fakailoilo lahi e fakakakano ke he tau hūhū ke he falu?
3 Fakaaoga Fakailoilo e Tau Hūhū: Nakai maeke a tautolu ke age e tau fakatonuaga ke he tagata fano fenoga ke lagomatai a ia ke hoko ke he matakavi haana ato iloa e tautolu e nofoaga haana mogonei. Pihia foki, kua nakai maeke a tautolu ke lagomatai e tagata he kaina ke hoko ke he fakahikuaga tonu ato iloa e tautolu e manatu haana mogonei. Ato fakakakano ai ke he tagata fanogonogo, ne fa hūhū a Iesu ke iloa e manatu he tagata. Ma e fakatai, mogo ne hūhū taha tagata ki a Iesu, “Ko e heigoa e mena ke eke e au ke moua ai e au e moui tukulagi?,” ne kumikumi e Iesu e manatu he tagata ato tali a ia. (Luka 10:25-28) Taha magaaho, ne talahau e Peteru e tali hepe, ti fakaaoga fakailoilo e Iesu e tau hūhū ke fakahako aki e manamanatuaga haana. (Mata. 17:24-26) Ko e mena ia, ka hūhū he tagata he kaina e hūhū po ke talahau e manatu hepe, maeke ia tautolu ke fakaaoga e tau hūhū ke lagomatai a ia ke moua e kakano ke he tau manatu.
4. Ko e ha kua lata ia tautolu ke lali ke lagomatai e tagata he kaina ke moua e kakano?
4 Ka lagomatai e tautolu e tagata he kaina ke moua e kakano, kua fifitaki e tautolu e Faiaoga ne Mua ko Iesu, ti pihia mo e falu tagata fakamatala iloilo he senetenari fakamua. Kua foaki e tautolu e lilifu ke he tagata he kaina mo e fakakite e fakalilifu ki a ia. (1 Pete. 3:15) Ti ko e fua, to liga hihiga lahi a ia ke fakaatā a tautolu ke liliu atu.