Fakatolomaki ki Mua e Lotomatala ha Tautolu he Fekafekauaga—Foaki e Tohi Fakaako he Tohi Tapu

Kakano kua Aoga Ai: Ko e tohi Fakaako he Tohi Tapu ko e matapatu puhala he puha fakaako ha tautolu. Ka e to maeke a tautolu ke fakaaoga ai ke fakaako e taha tagata, kua lata ia tautolu ke age fakamua e tohi ki a ia. Ko e mena ia, kua lata ia tautolu oti ke eketaha ke fakalotomatala he foaki e tohi Fakaako he Tohi Tapu he gahua he fonua. (Fakatai 22:29) Loga e puhala ti kua lata he tau tagata fakailoa ke fakaaoga e mena kua gahua ki a lautolu.

Puhala ke Taute Ai:

Fakalagā e hūhū fakalagalaga manatu ka fakaaoga e koe ke takitaki e tagata he kaina ke he veveheaga pauaki he tohi. Maeke foki a koe ke fifili taha he tau hūhū he kamataaga he tau veveheaga takitaha. He logona e tali he tagata he kaina, totou e kupu tohi kua felauaki ti fakakite mogoia ki a ia e paratafa he matakupu ia ti maeke ke tutala fakakū tokoua ki ai.
Ko e taha puhala foki ke fakaaoga e tau lau he hafagiaga ke fakalagalaga e fiafia ti fakakite mogoia ke he tagata he kaina e tohi ne moua ai e tau tali he Tohi Tapu. Ma e fakatai, liga hagaao a koe ke he matematekelea ne tupu foou he nusi ti fakamaama kua tokologa ne manamanatu hagaao ke he tau tali ke he tau hūhū he lau 3. Po ke maeke a koe ke talahau kua ahiahi a koe ke he tau katofia haau ke talahau e manatu mitaki ke he vahā anoiha. Ti fakakite e tau fakatino he lau 4-5 mo e hūhū, “Ha e fē e tau maveheaga nei ka manako a koe ke kitia kua fakamooli?” Taha puhala foki ke talahau kua ahiahi fakakū atu a koe ke lagomatai e tau tagata ke moua e tau tali ke he tau hūhū aoga lahi he moui. Ti fakakite ke he tagata he kaina e tau hūhū i lalo he lau 6, ti tala age ko e hūhū fe ne uho ki a ia.
Fakaaoga e puhala tala age fakahako ke kamata e fakaako Tohi Tapu. Maeke a koe ke pehē: “Fakakite e mautolu e lagomataiaga fakaako Tohi Tapu nei ke he tau katofia ha mautolu. Kua kitia nakai e koe? [Fakaatā ma e tali.] Ka fai minuti a koe, manako au ke fakataitai e puhala ka fakaaoga ai e koe mo e lagaki haau he Tohi Tapu.”

Fakatai e Mena Ē he Mahina Nei:

Taute e tau fakamahaniaga he magaaho he haau a tapuakiaga he magafaoa.
He gahua he fonua, tala age ke he falu tagata fakailoa e mena kua amanaki a koe ke talahau. (Fakatai 27:17) Hiki e fakataitaiaga ka nakai felauaki ai.