Fakatolomaki ki Mua e Lotomatala ha Tautolu he Fekafekauaga—Fakatātā e Fakaako Tohi Tapu he Fakaaoga e Tohi Fakaako he Tohi Tapu

Kakano kua Aoga Ai: Tokologa e tagata ne liga nakai maama e kakano ka tala age ai kua foaki e tautolu e tau fakaako Tohi Tapu nakai totogi. Kua liga manatu a lautolu kua lata a lautolu ke fakalataha ke he matakau fakaako po ke taute e fakaakoaga puhala he meli. He nakai ni foaki e fakaakoaga, he ha he fakatātā e fakaakoaga? He tau minuti gahoa, he gutuhala foki, maeke a koe ke fakakite ke he tagata ko e mena mukamuka mo e fakalagalaga ke fakaako e Tohi Tapu.

Puhala ke Taute Ai:

He mole e fakafeleveia atu haau, hūhū ke he tagata he kaina kaeke kua tupetupe a ia ke he vahā anoiha.
Talahau na tokologa e tagata ne tupetupe pihia foki, ti fakakite ki a ia e tau mataulu tala he tohi Fakaako he Tohi Tapu. Fakamaama kua haia he tohi nei e tau fakaakoaga ne mukamuka ke maama ti kua fakakite ai e mena ne fakaako he Tohi Tapu hagaao ke he vahā anoiha mo e falu matakupu foki, ti hūhū ki a ia ko e veveheaga fe kua fiafia a ia ki ai.
Age ki a ia e lagaki he tohi, ti takitaki atu a ia ke he veveheaga ne fifili e ia. Fakamaama ko e tau hūhū he kamataaga he veveheaga kua tali he tau paratafa i lalo.
Ole ke he tagata he kaina ke totou e paratafa fakamua kaeke kua hagahaga mitaki a ia ke totou. Ti totou e hūhū ma e paratafa ia, mo e fakatutala tokoua ke he tali. Kumi mo e fakatutala e tau kupu tohi ne tutū ai kua lalago e tali. Fakakite ki a ia e puhala kua fakamailoga e koe e tali he tohi haau.
Fakatutala ke he taha paratafa foki, ka e mogonei tala age ke he tagata he kaina ke lali ke tali e hūhū he tau kupu ni haana.
Nava ki a ia, ti taute e tau fakatokaaga ke liu atu ke fakaoti e fakaakoaga.
Kaeke kua lata, hagaaki e onoonoaga ke he vitiō he jw.org ne mataulu Ko e Heigoa ne Tupu he Fakaako Tohi Tapu?

Fakatai e Mena Ē he Mahina Nei:

Liogi ki a Iehova ke fakamonuina e tau laliaga haau ke kamata e fakaako Tohi Tapu foou.—Filipi 2:13.
Lali ke fakatātā e fakaako Tohi Tapu he fakaaoga e tohi Fakaako he Tohi Tapu po ke fakakite e vitiō Ko e Heigoa ne Tupu he Fakaako Tohi Tapu? lagataha he gahua ke he fonua.