Puhala ke Kamata e Tau Fakaakoaga Tohi Tapu Mai he Tau Mekasini ne Foaki
1. Ko e heigoa e foliaga haau he foaki e tau mekasini?
1 He tau Aho Faiumu ne foaki tumau e tautolu e tau mekasini ko e Kolo Toko mo e Awake! ke he fekafekauaga. Pete ia, ko e lakaaga fakamua ni anei ke moua e foliaga ha tautolu ke fakaako e kupu mooli ki a lautolu ne loto fakamooli. Ko e falu lagomatai a nā i lalo ke he puhala ka foaki e tohi Fakaako he Tohi Tapu ka liliu ahiahi atu mo e kamata e fakaakoaga Tohi Tapu. Maeke ke hikihiki ai ke lata mo e fonua haau ti talahau ke he tau kupu ni haau. Kia atāina ke fakaaoga taha talahauaga foki ne lauia mitaki ki a koe.
2. Maeke fēfē ia tautolu ke fakaaoga e tau lau i mua he tohi Fakaako he Tohi Tapu ke kamata e fakaakoaga Tohi Tapu?
2 Fakaaoga e Tau Lau i Mua: He liu atu, liga pehē a koe: “Kua hagaaki e tau mekasini ne toka hifo e au mo koe ke he Tohi Tapu. Mailoga e kakano kua aoga lahi ke totou e Tohi Tapu.” Totou Isaia 48:17, 18; Ioane 17:3; po ke taha kupu tohi kua lata. He mole mogoia e fakakite e tohi Fakaako he Tohi Tapu ti age taha lagaki ke he tagata he fale, ti liga talahau e koe tuga a nei:
◼ “Kua tuku mai he Tohi Tapu ki a tautolu e amaamanakiaga mooli ma e anoiha.” Fakakite ke he tagata he fale e lau 4-5 ti hūhū, “Ha e fe e tau maveheaga nei ka manako a koe ke kitia he fakamooli?” Fakakite ki a ia e veveheaga ne tala ke he maveheaga mai he Tohiaga Tapu ne fifili e ia, mo e fakatutala fakakū ke he taha po ke ua e paratafa kaeke fakaatā e ia.
◼ Po ke pehē a koe, “Kua tali he Tohi Tapu e tau hūhū aoga lahi he moui.” Fakakite ki a ia e lau 6, ti hūhū age kua fa tuahā nakai a ia hagaao ke he taha hūhū he kelekele he lautohi. Fuke ke he veveheaga ne foaki e tali, ti fakatutala fakakū ke he taha po ke ua e paratafa.
◼ Po ke fakakite age e koe falu mataulu he tau mataulu tala ti hūhū ko e matakupu fe ne fiafia a ia ki ai. Fuke ke he veveheaga ia, ti fakatātā fakakū e fakaakoaga Tohi Tapu.
3. Liga kamata fēfē e tautolu e fakaakoaga Tohi Tapu he mole e foaki e tau mekasini ne fakatutala ke he (a) tau tutūaga kelea muitui he lalolagi? (e) magafaoa? (i) moolioli he Tohi Tapu?
3 Toka e Hūhū he Ahiahi Fakamua Atu: Ko e taha puhala ko e taute e fakavēaga ke liu atu ke he ahiahi fakamua. He talia he tagata he fale e tau mekasini, talahau e hūhū, ti mavehe ke tali ai ka liu atu a koe. Lali ke taute e fakatokaaga ke mau mooli ke liu, ti fakamooli e maveheaga ia. (Mata. 5:37) He liu a koe, fakamanatu ke he tagata he fale e hūhū, ti totou fakakū mo e fakatutala ke he tali he tohi Fakaako he Tohi Tapu. Age taha lagaki ma haana ke muitua ki ai. Hanei falu a fakataiaga:
◼ Kaeke ke tala e mekasini ne foaki e koe ke he tau tutūaga kelea muitui he lalolagi, liga pehē a koe, “To tutala a taua he taha magaaho ke he tali he Tohi Tapu ke he hūhū nei, Ko e heigoa e tau hikihikiaga ka tamai he Atua ke he lalolagi?” Fakaaoga e lau 4-5 ka liu a koe. Po ke talahau e koe e hūhū, “Ko e finagalo kia he Atua e tau matematekelea?” He liu ahiahi atu, fakakite ke he tagata he fale e paratafa 7-8 he veveheaga 1.
◼ Kaeke ke tala e mekasini ne foaki e koe ke he magafaoa, ato fano a koe liga talahau e hūhū nei, “Ko e heigoa kua lata ke taute he tau tagata takitokotaha he magafaoa ke fiafia lahi e moui he magafaoa?” He liu atu a koe kia tutala ke he paratafa 4 he veveheaga 14.
◼ Kaeke ke tala e mekasini ne foaki e koe ke he moolioli he Tohi Tapu, liga talahau e koe e hūhū nei ke fakatutala ki ai ka liu atu, “Kua tonutika fakasaiene kia e Tohi Tapu?” He liu ahiahi atu, tutala ke he paratafa 8 he veveheaga 2.
4. Ko e heigoa ka taute e tautolu kaeke ke nakai talia he tagata he fale e tohi Fakaako he Tohi Tapu?
4 Ka oti e fakatutala, ti talahau taha hūhū ke tali ka liu ahiahi atu. He magaaho ka taute tumau e fakaakoaga, kia tutala fakapapale ke he tohi mai he kamataaga ke he fakaotiaga. Ka e kua ka nakai talia he tagata he fale e tohi Fakaako he Tohi Tapu? Maeke agaia ia koe ke matutaki ke uta e tau mekasini mo e ke tutala mo ia ke he Tohi Tapu. He feaki e koe e fiafia haana, liga ni to fai magaaho ti talia e ia e fakaakoaga Tohi Tapu.
5. Ko e ha kua lata ke lali a tautolu ke lahi atu e mena ka taute ka e nakai toka hokoia e tau mekasini mo e tau tagata?
5 Liga to fakalagalaga he Ko e Kolo Toko mo e Awake! e manako he tagata ke iloa ko e heigoa ne fakaako mooli he Tohi Tapu. Ko e mena ia, kia taute e tau laliaga pauaki ke kamata e tau fakaakoaga Tohi Tapu mo lautolu ne talia e tau mekasini. He puhala nei, to omaoma a tautolu ke he tau poaki ha Iesu ‘ke taute tutaki, ti fakaako kia lautolu.’—Mata. 28:19, 20.