Tau Hala Mekasini—Aoga ke Kamata aki e Tau Fakaako Tohi Tapu
1. Ko e ha ne kua leva he fakamafana he fakatokatokaaga ha Iehova e tau tagata fakailoa ke taute e fakatokaaga mekasini?
1 Fa hihiga e tau tagata tokologa ke nakai fakaako e Tohi Tapu mo tautolu, ka kua fiafia ni ke totou e tau mekasini ha tautolu. Ti kua leva tei ne fakamafana he fakatokatokaaga ha Iehova e tau tagata fakailoa ke taute e fakatokaaga mekasini. He totou tumau he tau tagata e tau mekasini ha tautolu, fa feaki e lautolu e manako lahi ma e Kupu he Atua. (1 Pete. 2:2) Fakahiku ai, liga totou e lautolu e mena ka hokotia ke he loto, ati talia ai e lautolu e fakaako Tohi Tapu.
2. Maeke fēfē ia tautolu ke feaki e fiafia he tau tagata kua ha ha he fakatokaaga mekasini ha tautolu?
2 ‘Fakamalū’ e Tau Tega he Kupu Mooli: He nakai ni toka e tau mekasini, ka e foli ke fakatutala mo e tagata he kaina mo e lali ke atihake e fakafetuiaga mo ia. To lagomatai he mena nei a koe ke iloa haana a tau tutuaga, tau mena ne fiafia ki ai, mo e tau taofiaga, ti maeke a koe ke tutala mo e fai maamaaga. (Fakatai. 16:23) Mautauteute ma e tau ahiahi takitaha. Ka maeke, fakamaama fakakū e taha manatu mo e kupu Tohi Tapu mai he mekasini, he fakamalū e tau tega kua liga ha ha he loto haana. (1 Kori. 3:6) Fakamau hifo e aho he tau ahiahi takitaha, ko e tohi ne toka, mo e tau matapatu manatu mo e tau kupu Tohi Tapu ne fakatutala.
3. Lagafiha kua lata a tautolu ke liliu ki a lautolu kua ha ha he fakatokaga mekasini ha tautolu?
3 Liu Atu Lagafiha? Kua lata ia koe ke liu lagataha he mahina ke uta e tau mekasini foou ki a lautolu kua ha ha he hala mekasini haau. Pete ia, fakavē ke he haau a tuaga mo e fiafia he tagata, liga maeke a koe ke fifili ke ahiahi tumau. Ma e fakatai, taha po ke ua e faahi tapu ka mole he toka e koe e tau mekasini, maeke a koe ke liu mo e pehē, “Ko e aahi mai fakakū au ke fakakite atu taha mena i loto he tau mekasini ne toka e au mo koe.” To fakalagalaga ai e manako he tagata ke totou e vala tala pauaki ia. Kaeke kua fitā he totou e ia, liga mitaki ke hūhū ke he manatu haana mo e fakatutala fakakū ki ai. Po ke kaeke fiafia e tagata ke totou e tau tohi ha tautolu, maeke a koe ke liu atu mo e foaki age e tuleke, porosua, po ke tohi foaki he mahina ia.
4. Falu mogo, ko e heigoa kua maeke ia tautolu ke taute kaeke fakamakai a lautolu kua ha ha he fakatokaaga mekasini ke fakaako e Tohi Tapu?
4 Aua neke fakatali ma e tagata he kaina ke ole ma e fakaako Tohi Tapu. Kia fakamakaukau. Pete he ai talia e ia e fakaako Tohi Tapu he tau mogo kua mole, falu magaaho maeke a koe ke fakatutala e vala tala “Tau Hūhū Tohi Tapu kua Tali” mai he Ko e Kolo Toko mo e kitia ko e makai nakai a ia ke fakatutala ke he mena ia mo koe. Liga maeke a koe ke kamata e fakaako Tohi Tapu he gutuhala. Pete ia, kaeke kua nakai maeke a koe ke kamata e fakaako Tohi Tapu, kua maeke agaia a koe ke uta e tau mekasini ki a ia ke feaki e fiafia haana.