Fakatolomaki ki Mua e Lotomatala ha Tautolu he Fekafekauaga—Taute e Tau Hala Mekasini

Kakano kua Aoga Ai: Tokologa e tagata kua fiafia he totou e tau mekasini ha tautolu ne nakai manako ke fakaako e Tohi Tapu mo tautolu. Liga fiafia a lautolu ke he lotu ha lautolu, po ke logona hifo e lautolu kua nakai fai magaaho a lautolu ke fakaako. Ka e he totou tumau e lautolu e tau mekasini ha tautolu, liga tupu e manako ha lautolu ke he Kupu he Atua. (1 Pete. 2:2) Liga hokotia ke he loto e vala tala pauaki, po ke liga hiki ai e tau tuaga ha lautolu. Ko e ahiahi kū tumau ka fakatotoka a lautolu mo e lagomatai a tautolu ke iloa e tau mena kua fiafia mo e tau mena ne tupetupe a lautolu ki ai. Fakahiku, to liga kamata e fakaako Tohi Tapu.

Puhala ke Taute Ai:

He tau mahina takitaha, fakatoka e magaaho ke uta ke he tagata e tau fufuta foou he Ko e Kolo Toko mo e Awake! Liga lata ia koe ke ahiahi he falu mogo he mahina ke fakalaulahi e manako haana ke he vala tala mai he tau mekasini ne toka e koe po ke foaki e tau tohi ne fakakite ma e mahina ia. Fakamau fakamitaki tumau.—Kikite Ha Tautolu a Fekafekauaga he Kautu ia Ianuari 2014, lau 3.
Mautauteute ma e tau ahiahi takitaha. He nakai fano noa ni ke uta he tau mekasini, fakatutala mo e tagata he kaina ti lali ke fakakapitiga mo ia ke feaki e fiafia haana.
Mataala ke he tau tuaga ke kamata e fakaako. Ka hūhū e tagata he hala mekasini haau ki a koe ke he talahauaga he Tohi Tapu ke he matakupu pauaki, uta ki a ia e tohi fakaako ne haia i loto e tau tali, ti fakatutala tokoua ki ai. Ato fano a koe, talahau e hūhū ne felauaki mo e matakupu ia ti fakatutala ki ai ka liu a koe ke aahi atu. Ka fakatumau mo e fakatokatoka a koe he fakatutala fakakū foki he fakaaoga e Tohi Tapu po ke taha he tau tohi fakaako ha tautolu, kua taute e koe e fakaako Tohi Tapu. Kua foaki nakai e koe ke he tagata he kaina e porosua Tala Mitaki mo e fakatātā e fakaako fakakū he Tohi Tapu? Kua fakakite nakai e koe ki a ia e tau vitiō Ko e Ha ne Fakaako e Tohi Tapu? mo e Ko e Heigoa ne Tupu he Fakaako Tohi Tapu? Pete foki ka nakai manako e tagata ke fakaako he tau mogo kua mole, na hiki e tau tuaga. To aoga kia ia koe ke liu lali foki?

Fakatai e Mena Ē he Mahina Nei:

Fakamau hifo a lautolu ka ha ha he hala mekasini. Age ki a lautolu e tau fufuta foou he tau mekasini, ti tala age to ta age e koe e fufuta kahau ki a lautolu.