“Gana e Tega he Kautu” he Tau Fakaholoaga Mekasini
1 Ko e lologo 133 he Sing Praises to Jehovah ne mataulu “Gana e Tega he Kautu.” Ne matapatu ke he fakataiaga a Iesu kua fakatai ke he gahua taute tutaki ke he gana saito. (Mata. 13:4-8, 19-23) Totou pehe e tau kupu lologo: “Ko e lahi he saito hau kua mokulu ke he kelekele mitaki/Fa falanaki tumau ni ki a koe.” Fakalahi atu fefe e tautolu e lauiaaga mitaki he fekafekauaga ha tautolu? Ko e taha puhala ko e fakakatoatoa mo e fakatumau e fakaholoaga mekasini.
2 Falu foliaga ke maeke ke moua mai he fakaholoaga mekasini. (1) Ahi atu tumau he tau fahitapu ke uaaki ke maeke ia koe ke ati hake e fakafetuiaga kapitiga hau mo e tagata fiafia. (2) Fakatumau a koe mo e foakiaga ia he vala tala fakamoui ne toka he Ko e Kolo Toko mo e Awake! (3) He tau fakatutalaaga hau kua maeke ke lagomatai e koe e tagata ke taute e manako ma e kupu moli faka-Tohiaga Tapu, ka takitaki atu ke he fakaakoaga Tohi Tapu.—1 Pete. 2:2.
3 Kamata Fefe e Fakaholoaga Mekasini: He magaaho ni ka fakakite he tagata e fiafia ke he tau mekasini, fakamaama kua ha ha i ai e tau vala tala fulufuluola lahi i loto he tau fufuta takitaha mo e to fiafia a koe ke uta tumau ai he tau fahitapu ke ua aki. He toka, fakamau hifo e higoa he tagata mo e kaina, ko e aho kua ahi atu, ko e tau aho he tau fufuta ne toka, ko e vala tala ne fakakite, mo e tau fakaakoaga kua fiafia pauaki e tagata ki ai.
4 Kamata e koe e fakaholoaga ke he tau tagata gahoa. Ti fakalaulahi ai he lafi ki ai falu ne kua toka e koe e tau mekasini i ai. He tupu ki mua e fakaholoaga hau, kia fakatokatoka e koe fakamatakavi ke mukamuka ai ke oti he taute. Kia leveki fakamitaki e fakamauaga he tau fufuta ne kua age he tau ahi takitaha mo e i ne fe. Lafi atu ki ai foki e tau tutalaaga hau mo e puhala ke matutaki atu e fiafia he tagata ke he kupu moli ka liu ahi atu ai.
5 Lauia Foki e Tau Tagata Pisinisi mo e Tu Gahua: Kua fakailoa mai ai e tau tagata gahua fale koloa mo e falu tagata tu gahua kua tuga ke talia e tau mekasini ha tautolu ke he tau fufuta oti. Taha e motua ne fakaaoga e fakaholoaga mekasini hana ke he takitaki he taone hana. Ne kamata he tagata fakailoa e fakaakoaga mo e tagata 80 e tau tau kua pule ke he fakaholoaga he kamupani he mole e ta atu e tau mekasini ki a ia ke hogofulu e tau katoa!
6 Ko e matakainaga fifine paionia ne hu atu ke he fale koloa ti feleveia mo e hoa ne nakai fakafeleveia fakamitaki a ia. Pete ia, ha kua talia e laua e tau mekasini, ne fifili a ia ke lafi e hoa nei ke he fakaholoaga mekasini hana. Fai magaaho, ne manako e matakainaga fifine ke fakaoti ha kua nakai kapitiga mo e nakai lahi e mena ha laua kua talahau, pihia foki ka huhu a ia ke he tau huhu fakalaga. Ka e liogi e matakainaga fifine mo e he magaaho fakamui ne foaki e tohi Live Forever ke he hoa. He oti e totou, ne talahau he hoana: “Kua moua tuai e au e kupu moli!” Ne kamata e fakaako Tohi Tapu, ti papatiso e hoa he magaaho fakamui. Ko e fakauka he paionia kua fua mitaki moli mai.
7 Taute e Liu Ahi Atu: Ka moua e koe e mekasini fou, totou oti e tau vala tala. Kumi e tau manatu ka lata mo e tau tagata takitaha he fakaholoaga hau. Ka liu atu a koe, maeke ia koe ke talahau: “He totou e au e vala tala nei, manatu e au a koe mo e liga ke fiafia ki ai a koe.” Ko e tau tagata fakailoa he tau tau kehekehe kua fiafia he fai fakaholoaga mekasini. Maeke foki he tama tote ke talahau: “Fiafia au ke liu kitia a koe. Kua hoko mai tuai e tau lagaki fou hau he Kolo Toko mo e Awake! Manatu au to fiafia a koe ke he vala tala nei ne mataulu . . .”
8 Fakaohooho e fiafia ma e tau vala tala ka mui mai he fufuke atu ke he puha ne mataulu “Fufuta Ka Hau ha Tautolu.” Ka hau fakafufuta e tau vala tala, fakakite age e manatu nei ti fakamalolo e tagata totou ke nakai fakato ha vala i loto. Kia nakai nimo ko e tau magaaho oti ka fina atu a koe ke ta atu e tau mekasini ke he tagata ko e fakaholoaga mekasini hau, kia totou ko e liu ahi atu. Mua atu ai, manatu ko e foliaga ha tautolu ke fakatupu e tau liu ahi atu nei ke he tau fakaako Tohi Tapu he kaina.
9 Ahi e Tau Tagata he Fakaholoaga Hau he Taute Tumau: Maeke ia koe ke taute oti e fakaholoaga mekasini hau he ha magaaho kua lata—he pogipogi he taha aho he fahitapu, po ke afiafi pale la, he afiafi lahi, po ke he matahiku vahatapu he oti e gahua he taha fale ke he taha fale. Ka nakai maeke ia koe ke taute oti e fakaholoaga hau ha kua gagao po ke fano evaeva, ole taha tagata fakailoa he magafaoa hau po ke he fakapotopotoaga ke uta e tau mekasini. He puhala ia, ko lautolu he fakaholoaga hau to nakai to noa ai ke moua e tau mekasini he magaaho tonu.
10 Taha puhala ke gana e tega he Kautu ko e uta tumau e tau Kolo Toko mo e Awake! ki a lautolu oti he fakaholoaga mekasini hau. He fakaako e koe a lautolu ke he kupu moli faka-Tohiaga Tapu, to moua e lautolu e maamaaga he kupu he Kautu mo e hokotia ai ke fua mai ai e fua he Kautu fakalataha mo koe.—Mata. 13:8, 23.