Ko e Foliaga Aoga Lahi ma e Tau he Fekafekauaga Foou
1. Ko e heigoa e foliaga ka liga taute e tautolu ma e tau he fekafekauaga foou?
1 Lata ia tautolu ke fakatoka e tau foliaga kaeke ke manako a tautolu ke holo ki mua fakaagaaga. Ko e heigoa e tau foliaga fakatagata kua fakatoka e koe ma e tau he fekafekauaga foou? Ko e foliaga ne mua e mitaki ko e paionia fakakū ke he taha po ke loga e mahina. Ha kua fa mahani ke pulega tuai ma e matagahua fiafia nei kua mitaki lahi ai ke kamata he mogonei ke manamanatu atu ki ai. Ko e ha ne eke e paionia fakakū mo foliaga?
2. Ko e ha ne eke e paionia fakakū mo foliaga?
2 Tau Kakano ke Paionia Fakakū: He paionia fakakū kua maeke ke ‘fakamalolo katoatoa’ a tautolu ke fakafiafia ha tautolu a Matua he lagi he fakaaoga fakalahi e magaaho ke he fekafekauaga. (1 Tesa. 4:1) He mailoga e tau mena oti ne taute e Iehova ma tautolu, ne omoi he tau loto ha tautolu a tautolu ke tutala ke he falu hagaao ki a ia. (Sala. 34:1, 2) Kua mailoga mo e loto fakaaue a Iehova ke he tau poa fakatagata ne taute e tautolu ke fakalahi ha tautolu a fekafekauaga. (Hepe. 6:10) He iloa kua fakafiafia a Iehova ha ko e tau gahua fakamakamaka ha tautolu ne tamai ki a tautolu e fiafia lahi.—1 Nofo. 29:9.
3, 4. Aoga fēfē a tautolu mai he paionia fakakū?
3 Na fa mahani, ka lagaloga he taute e koe taha mena ti mua atu e mukamuka mo e fiafia lahi ki ai. He lahi e magaaho ne fakaaoga ke he fekafekauaga ka taute a koe ke mauokafua ke tutala he gutuhala. To makutu a koe ke kamata e tau fakatutalaaga mo e ke fakaaoga e Tohi Tapu. Ka lagaloga e tala haau hagaao ke he tua, to malolō lahi e tua haau. Tokologa ne nakaila takitaki ha fakaakoaga Tohi Tapu kua maeke ke kamata taha fakaakoaga he paionia fakakū.
4 Kua liga maeke foki he paionia fakakū ke fakamalolō ke o mai kehe he tuaga tunono fakaagaaga. Ne talahau he matakainaga ne paionia tumau fakamua, ne lahi mahaki e magaaho haana nukua fakamole ke gahua tupe kua fifili ke paionia fakakū ke he taha e mahina. Ne pehē a ia: “Ne ofo lahi au ha kua maeke he mahina taha ia ke fakamalolō fakaagaaga au! Ti taute e au e tau fakaholoaga ke paionia fakakū tumau ati takitaki atu au ke liu foki ke paionia tumau.”
5. Liga maeke fēfē ia tautolu ke kautū ke he tau logonaaga maimainā?
5 Kautū Mai he Tau Fakatauhele: Ne fakauaua falu ke paionia fakakū he manatu kua nakai makaka a lautolu ke fakamatala. Kaeke ko e mena hanei ne mataofi ai a koe, na maeke ia Iehova ke lagomatai a koe tuga ne taute e ia ki a Ieremia. (Iere. 1:6-10) Pete he ‘nakai gutu mahifi mo e nakai mahifi foki e alelo’ ha Mose, ne fakaaoga e Iehova a ia ke taute e finagalo Haana. (Esoto 4:10-12) Kaeke kua logona e koe e maimainā, kia ole ki a Iehova ma e malolō.
6. Liga maeke fēfē ke paionia fakakū pete e tau lekua he malolō tino po kua lavelave e setulu?
6 Kua fakauaua kia a koe ke paionia fakakū ha ko e tau lekua he malolō tino po kua lavelave e setulu? Kaeke kua nakai malolō e tino haau, he gahua fakatatau ke he mena kua fahia a koe ka liga taute a koe ke maeke ke paionia fakakū. Kaeke kua lavelave e setulu haau, liga maeke ia koe ke fakaholo falu matafekau nakai aoga lahi ke he taha mahina foki. Ko e falu ne gahua tupe tumau kua maeke ke fakatau taha magaaho ke paionia fakakū he fakaaoga taha po ke ua e aho okioki.—Kolo. 4:5.
7. Ko e ha kua aoga ai ke liogi ke paionia fakakū?
7 Puhala ke Taute Aki: Kia fakailoa e manako haau ke he liogi. Ole ki a Iehova ke fakamonuina e tau laliaga haau ke fakalahi e fekafekauaga. (Roma 12:11, 12) Maeke ia ia ke lagomatai a koe ke taute e tau fifiliaga iloilo ke hikihiki e setulu haau. (Iako. 1:5) Kaeke kua nakai ha ha ia koe e manako, ole ki a Iehova ke lagomatai ke moua e fiafia ke he gahua fakamatala.—Luka 10:1, 17.
8. Liga maeke fēfē he fakagahua e Tau Fakatai 15:22 ke taute a koe ke paionia fakakū?
8 Tutala fakamagafaoa ke he foliaga ke paionia fakakū. (Fakatai 15:22) Liga taha he magafaoa kua maeke ke paionia fakakū mo e lalagoaga he falu he kaina. Fakatutala mo e falu i loto he fakapotopotoaga e manako haau ke paionia, mua atu ki a lautolu ne tatai e tau tutūaga mo e haau. Liga to fakatupu he mena nei e fakamakai ke paionia fakakū.
9. Ko e tau mahina fe ka liga fifili e koe ke paionia fakakū?
9 He kikite e koe e kalena fakateokarasi haau ma e tau he fekafekauaga foou, a fē kua liga maeke a koe ke paionia fakakū? Kaeke kua gahua tupe tumau a koe po ke fano he aoga, liga manako a koe ke manamanatu ke he tau mahina okioki po ke tau mahina ne lima e Aho Faiumu po ke lima e Aho Tapu. Ke fakatai ki ai, kua lima katoa e matahiku faahitapu ia Sepetema, Tesemo, Mati, mo Aokuso. Kua lima e Aho Faiumu he mahina ha Me, ti lima e Aho Tapu he mahina ha Iuni. Kaeke kua fai lekua e malolō tino haau, manamanatu ke he tau mahina ne fa mitaki e matagi. Liga manako foki a koe ke paionia he mahina ne setulu e leveki takaiaga ke ahiahi e fakapotopotoaga haau. He magahala ka ahiahi mai a ia, to lafi ki a koe e kotofaaga lilifu he finatu ke he vala fakamua he feleveiaaga mo e tau paionia tumau. Ha kua hoko e Fakamanatuaga ia Mati 22 he tau ka hau, to eke a Mati, Aperila, mo Me mo tau mahina mitaki lahi. He fifili e koe e mahina po ke tau mahina ne manako a koe ke paionia fakakū, kamata ke tohi hifo e setulu ke maeke ia koe ke moua e tau tulā kotofa.
10. Ko e heigoa ka taute e koe kaeke kua nakai maeke ke paionia fakakū?
10 Pete kua nakai maeke ia koe ke paionia fakakū he tau he fekafekauaga foou i mua, maeke agaia a koe ke fakakite e agaaga paionia. Fakatumau ke taute oti e tau mena ne fahia ia koe ke he fekafekauaga, he mauokafua kua fiafia a Iehova ke he laliaga loto katoa haau ke gahua fakalahi ki a Ia. (Kala. 6:4) Kia lalago mo e fakamalolō ki a lautolu ne maeke ke paionia fakakū. Liga maeke ia koe ke hikihiki e setulu haau ke fai aho foki ka gahua he faahitapu ke he fekafekauaga mo lautolu ne paionia.
11. Ko e ha kua lata ia tautolu ke iloa e mafiti lahi he magaaho?
11 Kua iloa he tau tagata ha Iehova e mafiti lahi he magaaho. Ti ha ha ai e gahua ne lata ke taute—ko e fakamatala e tala mitaki. Kua putoia ai e tau momoui he tau tagata, mo e gahoa e tau magaaho ne toe. (1 Kori. 7:29-31) Ko e fakaalofa ma e Atua mo e katofia ka omoi a tautolu ke taute e tau mena kua fahia ia tautolu ke he fekafekauaga. Ha ko e tau laliaga mo e pulega fakamitaki, liga to maeke ia tautolu ke paionia fakakū he taha ni e mahina he tau he fekafekauaga foou—ko e foliaga aoga lahi mooli!