Ko e Ofoofogia he Tufugatia kua Fakakite e Lilifu he Atua
Tokologa ne fiafia ke onoono ke he tufugatia. Ka e tokogahoa ne mailoga he taute pihia e lautolu, kua moua e lautolu e kitiaaga ke he manamanatuaga mo e loto he ha tautolu a Tufuga Homo Ue Atu. (Roma 1:20) Leva tigahau, ne fakaako e Tavita hagaao ki a Iehova puhala he Kupu omoomoi Haana. Ka e “kitekite” foki a ia mo e fakatata ki a Iehova puhala he tufugatia. (Sala. 8:3, 4) Ko e vitiō ne mataulu The Wonders of Creation Reveal God’s Glory kua lagomatai a tautolu, tau fanau ha tautolu, mo e tau tagata fakaako ha tautolu he Tohi Tapu ke onoono fakatata ke he falu he tau tufugatia a Iehova, kitia e tau mahani mo e aga he ha tautolu a Tufuga Homo Ue Atu, ti ko e fua kua fakatata lahi ki a ia. He mole e onoono ke he vitiō, kitia kaeke ke maeke a koe ke tali e tau hūhū nā.
(1) Fakahokulo fēfē he lahi mo e maopoopo he fua lalolagi katoa e loto fakaaue haau ki a Iehova? (Isaia 40:26) (2) Ka onoono fakatata a tautolu ke he vai, ko e heigoa ha tautolu kua fakaako hagaao ki a Ia ne talaga ai? (Fakakite. 14:7) (3) Fakatātā fēfē he lahi mo e tata he lalolagi ke he laā e pulotu a Iehova? (4) Ko e heigoa e kakano he mahina? (Sala. 89:37) (5) Talaga fēfē e Iehova e tau tagata ke fiafia e moui? (6) Ko e heigoa e DNA? (Sala. 139:16) (7) He tau tufugatia oti ha Iehova he lalolagi, kehe fēfē e tau tagata? (Kene. 1:26) (8) Ko e heigoa kua amanaki atu a koe ki ai he lalolagi foou?
Falu Vala: (9) Moua mai i fe e tau lanu? (10) Kautū fēfē e vai ke he mamafa (gravity) ke maeke ke hoko hake ke he tau tapunu akau? (11) Ko e heigoa e matagahua ne taute he vai i loto he tau tino ha tautolu? (12) Talahau e tau fakataiaga he lagotatai he tau mena momoui. (13) Iloa fēfē he tau mena momoui ke fematutakiaki mo e falu? (14) Ko e heigoa e “golden angle,” ti kua fakatātā fēfē ai he tufugatia?
“Kia Kitekite” ke he Tau Gahua Lima ha Iehova: Ne fakamalolō e Iesu a tautolu ke fakamakutu he ‘kitekite ke he tau manu lele’ mo e ke ‘manamanatu ke he tau talotalo he vao.’ (Mata. 6:26, 28) He taute pihia ka fakahokulo e tua ha tautolu, fakamalolō e mauokafua ke he Tufuga, mo e atihake e loto fakaaue ma e pulotu, malolō fakamoui, mo e fakaalofa a Iehova. He nakai fakatauhele teao ha ko e tau gahua he lalolagi nei, fakatoka e magaaho mo e laliaga ke kitekite ke he ofoofogia he tufugatia ha Iehova, ti manamanatu ke he mena ne talahau i ai ki a tautolu hagaao ke he ha tautolu a Atua.—Sala. 19:1.