Tufuga Homo ue Atu ha Tautolu mo e Hana Tau Gahua
KUA HOMO UE ATU HA! Ko e tau vaitafe paku lahi a Iguaçú po ko Niagara, tau pahua lalahi mahaki a Colorado po ke i Hauai, tau kauafati lilifu ue atu a Noue po ko Niu Silani—kua navanava ha e tau kupu ne moua mai ha ko e tau tufugatiaaga ofoofo nei! Ka kua moua mai noa kia he Matua Fifine Tufugatiaaga? Nakai, kua mua mai he mena ia! Ko e tau gahua fakaohooho navanava he Tufuga Homo ue Atu, ko e Matua loto fakaalofa i luga he lagi ne tohia ki ai e Patuiki pulotu ko Solomona: “Ne eke e ia e tau mena oti ke fulufuluola ai ke he ha lautolu ni a tau vaha; kua tuku foki e ia e manatu ke he tukulagi ke he tau loto ha lautolu; ka e nakai kitia he tagata e gahua kua eke he Atua tali mai he kamataaga ke hoko ke he fakahikuaga.” (Fakamatalaaga 3:11) Kua moli, to hoko ki tukulagi tukumuitea e tau magaaho ma e tau tagata ke kumikumi ke he tau gahua lilifu ue atu ne kua fakapuke aki he Tufuga ha tautolu e lagi mo e lalolagi katoatoa.
Kua Homo ue Atu ha e Tufuga ha tautolu! Mo e kua kolikoli ha e tau loto ha tautolu ha ko e Atua malolo lahi ue atu nei “kua vagahau mai kia tautolu ke he tau aho nai ke fakahiku ai ke he Tama, ko ia ne kotofa e ia mo mataohi he tau mena oti kana; ne eke foki e ia e tau mena oti kia ia.” (Heperu 1:2) Ne loto fakaaue e Tama nei ko Iesu Keriso ke he tau mena fulufuluola ne tufugatia he Matua hana. Ne hagaao tumau e tau kupu hana ki a lautolu ka taute e fakataiaga ke he finagalo he Matua hana mo e tau ka vagahau e tau kupu ke fakamafana aki a lautolu ne fanogonogo ki a ia. (Mataio 6:28-30; Ioane 4:35, 36) Ha “ko e tua” kua iloa ai he tau tagata tokologa ko e tau mena mitaki lahi he tufugatiaaga “ne eke e tau mena oti kana ke he kupu he Atua.” (Heperu 11:3) Kua lata e tau momoui he tau aho takitaha ke ata mai e tua pihia.—Iakopo 2:14, 26.
Homo ue atu moli e tau tufugatiaaga he Atua ha tautolu. Ne ata mitaki lahi mai e lautolu hana pulotu, hana malolo, hana tututonu, mo e hana fakaalofa. Ke fakatai ki ai, ne fakatipa e ia e fua lalolagi ha tautolu mo e fakatoka ai ke taveliveli he holo viko ke he la ke maeke ai hana tufugatiaaga he vaha i mua, ko e tagata ke moua e olioli ke he fakaholoaga mitaki lahi he tau vaha. Ne talahau mai he Atua: “Ko e tau aho oti he lalolagi nakai tuai fakahiku e tau ke to mena ai, mo e tau ke helehele mai ai, ko e makalili foki mo e vevela, ko e tau mateafu mo e tau tupu, ko e aho foki mo e po.” (Kenese 8:22) Ko e taha mena foki, ne fakakoloa loga lahi mahaki he Atua e lalolagi ha tautolu ke he tau mena uho he kelekele. Mua atu foki, ne foaki mai e ia e tau vai loga, ko e mena he magaaho fakamui kua eke ko e mena aoga lahi mo e ke lagomatai aki e tau mena oti ne momoui he lalolagi.
Ke he utaaga fakapapahi he ono e ‘tau aho tufugatia,’ ne kua takitaha ke ha ha e tau afe e tau tau he loa, ne fakaholo atu ai e “Agaga he Atua” ke tauteute tuai e lalolagi ma e nofoaga he tagata. Ko e maama ne maeke ai a tautolu ke kitia mena, e matagi ne fafagu e tautolu, e kelekele momo ne nonofo ai a tautolu, e tau lakau, ko e fakapapahiaga he aho mo e po, he ika, he tau manu lele, ko e tau manu totolo—ne tamai fakapapahi oti he Tufuga Homo ue Atu ha tautolu ma e fekafekauaga mo e fakaolioliaga ke he tagata. (Kenese 1:2-25) Kua moli ni, kua maeke a tautolu ke fakalataha mo e salamo ke tukuogo: “Iehova na e, kua loga ue atu hāu a tau gahua! Ne eke e koe e tau mena oti ia mo e iloilo, kua puke e lalolagi ke he hāu a tau mena.”—Salamo 104:24.
Ko e Tufugatiaaga Uho Pauaki he Atua
He tata ke oti e “aho” tufugatia ke ono aki, ne taute he Atua e tagata tane mo e hoa lagomatai hana, ko e fifine. Ko e tapunuaga lilifu ue atu he tau mena he tufugatiaaga ke he lalolagi, kua mua atu e mitaki lahi mai he tau mena tufugatia he tino mai he vaha fakamua! Kua fakailoa mai he Salamo 115:16 ki a tautolu: “Ko e lagi, ko e lagi ni, ha Iehova ia; ka kua tuku mai e ia e lalolagi ke he fanau he tau tagata.” Ke hagaao ke he mena ia, ko e talaga fakataiaga ne taute aki e Iehova a tautolu ko e tau tagata solu ke maeke ai a tautolu ke kolikoli e loto mo e fakaaoga hana tau tufugatiaaga fakamua he lalolagi. Kua lata ha a tautolu ke lahi e loto fakaaue ma e ha tautolu a tau mata—kua mua atu e uka ke iloa tonu mai he tau pokiata mitaki lahi—ne kua maeke ke tapaki e lalolagi lanu fulufuluola ne ha ha viko ia tautolu! Kua fai teliga a tautolu—mua atu e mitaki mai he ha fakatokaaga fakaleo kofe ne taute he tagata—ke lagomatai a tautolu ke moua e loto olioli he tutalaaga, leo kofe, mo e tau lologo fulufuluola he tau manu lele. Kua ha ha ia tautolu e vala kakano ne talaga pauaki ke vagahau, fakalataha mo e alelo gahuahua kehekehe. Ko e tau vala kakano kamatamata he alelo, ne fakalataha mo e ha tautolu a logonaaga hohogi, kua foaki mai foki ke kolikoli e loto ke he tau faga mena kai kehekehe. Mo e kua fakaaue ha a tautolu ke he aamo maiaga he lima fakaalofa! Nakai kia kua moli ni kua maeke a tautolu ke fakaaue atu ke he Tufuga ha tautolu, ke tuga e mena ne talahau he salamo: “Kua fakaaue au kia koe, ha ko e mena eke au kia matakutakuina mo e ofo ki ai; ko e tau mena ne eke e koe ko e tau mena ke ofomate ki ai haia; kua iloa tonuhia e au e tau mena ia.”—Salamo 139:14.
Fakaalofa-Totonu he Tufuga ha Tautolu
Ne tohia mai he salamo: “Kia fakaheke a mutolu kia Iehova, ha kua mitaki ni a ia; . . . Ko ia hokoia ni ne eke e tau mana lalahi; ha ko e mena tukulagi ni hana fakaalofa.” (Salamo 136:1-4) Kua omoi he fakaalofa-totonu ia a ia he magaaho nei ke taute e tau mena mitaki lahi kua mua atu e homo ue atu mai he tau tufugatiaaga oti kana ne kua fakamaama mai e mautolu he magaaho nei. E, tuga foki he magaaho ne okioki mai ai he tufugatiaaga ke he tau koloa he tino, kua tufugatia a ia ke he tau mena fakaagaga. Ne kua taute e ia e mena nei ke tali atu ke he paleko kelea ne fakafuluhi atu ki a ia. Fefe e mena ia?
Ne tuku ai e tagata tane mo e fifine fakamua i loto he parataiso lilifu ue atu, ko Etena. Ka e pete ni ia, ne fakatu hake he agelu afokau totoko ko Satani a ia ni mo atua mo e takitaki e tau tagata tokoua ke fetoko atu ki a Iehova. Ke he fakafiliaga tonu ne fakahala he Atua a laua ke mamate, ti ko e fua ne moua mai kua fakalataha e tau fanau ha laua, ko e tau tagata oti kana ke he tuaga agahala, ko e mate. (Salamo 51:5) Kua fakakite mai he fakamauaga he Tohi Tapu ne hagaao ki a Iopu kua paleko a Satani ke he Atua, kua tukuogo kua nakai maeke ha tagata ke taofi mau e fakamoliaga ki a Ia ka kamatamata. Ka e fakakite moli e Iopu ko e fatipiko kelea lahi a Satani, tuga kua fakakite foki he tau fekafekau tokologa he Atua i loto he Tohi Tapu mo e hoko mai foki ke he vaha ha tautolu. (Iopu 1:7-12; 2:2-5, 9, 10; 27:5) Ko Iesu ko e tagata mitaki katoatoa, ne kua fakatoka hifo e fifitakiaga mitaki ue atu ke he taofiaga mau he fakamoliaga ne nakai fai taha ne tatai ki ai.—1 Peteru 2:21-23.
Ti kua maeke a Iesu ke pehe, ko e “Iki he lalolagi nei, ka e nakai moua e ia taha mena kia au.” (Ioane 14:30) Ka e ke he aho nei “ko e lalolagi oti ha he pule hana kua mahani kelea.” (1 Ioane 5:19) He fita e taufetoko ke he tonu a Iehova ke pule katoatoa, kua age ki a Satani e 6,000 he tau tau ke fakakite po kua maeke nakai hana pule ke kautu. Kua fakateteki ha e kaumahala hana, he fakakite tumau mai he tau tutuaga kelea lahi he lalolagi! To nakai leva to uta kehe he Atua fakaalofa ha tautolu, ko Iehova e kaufakalatahaaga kolokolovao he lalolagi nei, ti omoi mai hana tonuhia lahi ke pule katoatoa ke he lalolagi. Ko e fiafia ha e hauhauaga ka tamai ke he tau tagata ne manako lahi ke he mafola lahi he pule tututonu!—Salamo 37:9-11; 83:17, 18.
Ka e pete ni ia, nakai koenaia! To fakakite mai foki e fakaalofa-totonu he Atua ne fakave ke he tau kupu a Iesu ia Ioane 3:16: “Nukua pihia e fakaalofa mai he Atua ke he lalolagi [he tau tagata], kua ta mai ai hana Tama fuataha, kia nakai mate taha ne tua kia ia, ka kia moua e ia e moui tukulagi.” Ko e liuaki maiaga nei he tau tagata ke he amaamanakiaga he moui tukulagi ke he lalolagi kua putoia ki ai e tufugatia he tau mena fou. Ko e heigoa e tau mena nei? Kua lagomatai fefe e lautolu e tau tagata tauoi? To talahau mai he tala ha mautolu ka mui mai.