Tau Mena Tutupu Mai he 2012 Yearbook
NOUE
Lau 92, paratafa 1
He tau hake, ko Ingebret Andersen, ne nofo i fafo ha Skien, ne moua e tohi ne higoa The Plan of the Ages, ne liga ko e taha he tau lagaki ne tamai e Knud ki Noue. Leva tuai e fiafia a Ingebret ke he “haele mai ke uaaki” he Keriso, ti ko e mogonei ko ia mo e haana hoana ko Berthe, ne hufia ke he mena ne totou e laua. Nakai leva ti kamata a Ingebret ke fakamatala ke he falu. Ne fano foki a ia ke he tau feleveiaaga fakalotu ke tala age ke he tau tagata hagaao ke he Pule Afe Tau he Keriso. Mogo fakamui ne ahiahi a ia ki a lautolu ne fakakite e fiafia, mo e nakai leva ti fai fakapotopotoaga ne malolō he kavi ke he hogofulu e Tagata Fakaako Tohi Tapu i Skien.
Lau 112, paratafa 3
Taha aho he 1937, ko Olaf Rød mo e taha matakainaga taane foki ne haia he kaina ha Olaf ne tutala hagaao ke he moto tagata. Ko laua ni tokoua e Fakamoli i Haugesund, ti manamanatu a laua to taute fēfē e fakapotopotoaga lahi mahaki nei. Ofo ai, ne nokonoko e gutuhala. Ne hafagi e Olaf e gutuhala, ti ko Alfred Trengereid a ia ne tū i ai. Ne moua e ia mo e totou e lagaki he The Watchtower ti fiafia a ia ke he mena haana ne totou. Nakai fakamule ai, ne heke a ia he posi haana mo e aalo ki Haugesund ke moua e tau tohi mai he tagata taane ne iloa e ia ko e Fakamoli—ko Olaf. Ne ofo a Olaf. ‘Mogonei, kua kamata a lautolu ke omai!’ he manatu e ia. Ne o mai mooli a lautolu, pete ne nakai o mai he puhala taha mo e nakai he magaaho taha. Ne eke a Alfred mo matakainaga taane ti fakalataha e falu mo ia mai he matakavi ne talia e tala mitaki he Kautu.
Kikite e taha lau ma e puha he lau 113
Ne Fakamooli e Ia e Maveheaga Haana
JOHANNES KÅRSTAD
FANAU 1903 PAPATISO 1931
VALA TALA FAKATAGATA Gahua he tau posi paionia ke valu e tau.
◼ HE 1929, ko Johannes ne malolō fakahaga he fale gagao mai he gagao māmā pala. Ne kamata a ia ke totou e Tohi Tapu mo e mavehe ke he Atua to fekafekau a ia ki a Ia ka malolō mai he gagao haana.
Nakai leva to fakatoka mai a ia ki tua, ne totou fiafia e Johannes falu he tau tohi he tau Tagata Fakaako Tohi Tapu. Fakamui, ne moua e ia loga foki e tohi, ne totou takitaha e ia lagafā po ke lagalima, nakai leva ti talahau e Johannes e tau kupu mooli foou haana ke he falu. He mogo ni ne malolō a ia, ne fano a ia ki Bergen mo e ahiahi atu ke he Matakainaga ko Ringereide, ne tala age ki a Johannes ke kamata e gahua paionia. Pete ne kamata laia e fakamatala ha Johannes, ne nakai fakauaua a ia ke hū he gahua paionia.
Mai he 1931 ke he 1938, ne gahua a ia he posi paionia ko Ester, ti paionia foki a ia kavi ke he taha e tau he posi ko Ruth, he o atu he faahi tahi he kaukau tahi ke hoko ke he faahi tokelau atu ki Tromsø. He 1939, ne eke a Johannes mo leveki faifano he vala he faahi uta ha Noue, ne lafi ke he gahua vala magaaho fakakū haana he Peteli. Mole e Felakutaki II he Lalolagi, ne mau e ia a Sigrid ti paionia mo ia. He 1995, ne oti e fekafekauaga ha Johannes he lalolagi i Fredrikstad.