Puha Hūhū

◼ Ko e heigoa kua lata ke tokaloto ka manako a tautolu ke he falu po ke tau koloa oti ha tautolu ke tukuage ke he fakatokatokaaga ha Iehova ka mamate a tautolu?

Ka mamate e tau tagata, kua nakai maeke a lautolu ke pule ke he tau koloa tino ha lautolu. (Fakama. 9:5, 6) Ti tokologa ne taute tuai e maveheaga po ke levekiaga kua fakamaama e tau manako ha lautolu ke tufatufa aki e tau koloa ha lautolu. (2 Patu. 20:1) Ko e tohi fakavē matafakatufono nei ne fa fakakite foki e tagata kua manako ke eke mo tagata leveki (trustee) po ke tagata fakagahua (executor). Ka nakai taute e tohi, he tau motu loga to fifili he tau fakatufono e puhala ke tufatufa aki e tau koloa he tagata mate. Ko e mena ia, ka fai manako pauaki a tautolu hagaao ke he tau koloa ha tautolu, ti ko e falu po ke tau koloa oti ke tukuage ke he fakatokatokaaga ha Iehova, kua aoga ke taute e tohi matafakatufono ke fakakite aki e mena nei mo e fifili fakamitaki e tautolu e tagata leveki po ke tagata fakagahua.

Ko e tagata leveki po ke tagata fakagahua kua mamafa e gahua. Fakavē ke he lahi he koloa, ko e fakaputuaga ti oti ti tufatufa e tau koloa ka putoia e loga e tau vala tala mo e lahi e magaaho ke taute ai. Lafi ki ai, ko e tau pule fakatufono kua fa fai takitakiaga kua lata ke muitua. Nakai ko e tau tagata oti he fakapotopotoaga ka amanaki ti eke mo tagata leveki mitaki po ke tagata fakagahua mitaki. Ko e tagata kua fifili e tautolu kua lata ke eke mo tagata ne iloa e tautolu ke maeke ke taute, fakamooli, mo e makai ke muitua e tau manako ha tautolu.​—Kikite e vala tala “Ko e Iloilo mo e Tau Aoga he Fakatokatoka e Tau Koloa,” he fufuta he Awake! ia Tesemo 8, 1998. Pihia foki, fakamolemole tohi ke he la ofisa i Niu Silani ke ole ke he Information Regarding Gifts, Trusts and Wills.

Ka Ole ki a Koe ke Eke mo Tagata Leveki po ke Tagata Fakagahua: Ka ole ki a koe kua makai a koe ke leveki e tau koloa he taha tagata ka mamate a lautolu, fakamua kia fatifati fakamitaki e koe mo e fifili ke he liogi kua maeke a koe ke fakamooli e matagahua nei. (Luka 14:28-32) He mole e mate he tagata, kua lata ia koe ke fakailoa ke he tau higoa he tau tagata oti kua fifili. Ti ka moua e koe e fakatāaga ke taute ai, ko e matagahua haau ke tufatufa ai e tau koloa hagaao ke he matafakatufono mo e muitua fakatonu ke he maveheaga po ke levekiaga. Ko e tagata leveki po ke tagata fakagahua kua lata ke mailoga pete he lahi po ke tote e koloa, kua nakai lata ke pule ke he tau koloa. Ko e tau mena fakaalofa oti ne fakamau tohi matafakatufono ne fakaaoga he Tau Fakamoli a Iehova kua fakatapu oti ke he fakatokatokaaga a Iehova.​—Luka 16:10; 21:1-4.