Fuluola e Puhala ne Talaga aki e Tau Tuleke Foou!
1. Ko e heigoa e tau koloa foou ma e gahua he fonua ne kua fuluola e puhala ne talaga aki?
1 Lima e tuleke foou ne fakatoka mai he Tau Fonoaga Faahimotu 2013 “Ko e Kupu Moli e Kupu he Atua!” Lafi ki ai, ko e Tau Tala he Kautu Nu. 38, ne mataulu “Maeke Mooli Kia a Lautolu ne Mamate ke Liu Momoui?” kua lafi ke he tau fufuta tuleke. Kua fuluola e puhala foou ne talaga aki e tau tuleke ono nei. Ko e heigoa e tau kakano he puhala foou nei? Ka foaki e tautolu he taha fale ke he taha fale, fakaaoga fakamitaki fēfē e tautolu e puhala ne talaga aki?
2. Ko e heigoa e kakano he puhala foou ne talaga aki e tau tuleke?
2 Ko e Ha ne Foou e Talagaaga?: Fa putoia ke he tau fakafeleveiaaga ne lauia mitaki he gahua he taha fale ke he taha fale, fā e lakaaga: (1) Hūhū e hūhū ke moua e manatu ke kamata aki e fakatutalaaga. (2) Fakatutala ke he manatu mai he Tohi Tapu. (3) Foaki e tohi ke he tagata he kaina ke totou. (4) Toka e hūhū ke tali he taha mogo, ti taute e tau fakatokaaga ke liu atu. To lagomatai he tau tuleke nei kua talaga fakafoou a tautolu ke mukamuka ke muitua e tau lakaaga fā ia.
3. Foaki fēfē e tautolu e taha he tau tuleke foou he gahua he fonua?
3 Puhala ke Fakaaoga Aki: (1) Ka mole e fakafeleveia atu, fakakite ke he tagata he fale e hūhū omoomoi i mua he tuleke mo e tau tali, ti hūhū ko e heigoa e manatu haana. (2) Veveu e tuleke ti fakatutala ke he vala “Talahau he Tohi Tapu.” Totou mai e kupu tohi he Tohi Tapu ka latatonu. Ka fai magaaho e tagata he fale, fakatutala ke he “Kakano he Mena Ia ma Haau.” (3) Foaki e tuleke, ti fakamafana a ia ke totou e vala ne toe he magaaho ni haana. (4) Ato fano a koe, fakakite age e hūhū i tua he “Ke Manamanatu ki Ai” ti taute e tau fakatokaaga ke fakatutala ke he tali he Tohi Tapu he taha mogo.
4. Fakaaoga fēfē e tautolu e tau tuleke foou he liu aahi atu?
4 Kua mukamuka foki e liu aahi atu. Fakaaoga e tau kupu Tohi Tapu i tua he tuleke ke tali aki e hūhū ne toka e koe he mogo kua mole. Ato fano a koe, fakakite age e fakatino he porosua Tala Mitaki, fakakite age e porosua mo e fakaakoaga ne toka ai e tau vala tala ke he matakupu ia, ti foaki age e porosua. Ka talia e ia, taute e tau fakatokaaga ke fakatutala ke he porosua ka liu atu a koe. Kua kamata tuai e koe e fakaakoaga Tohi Tapu! Po ke ka nakai foaki e porosua maeke ia koe ke foaki taha tuleke foki ti fakatoka ke liu atu ke fakatutala ai mo e tagata he fale.
5. Ko e heigoa e aoga he tau tuleke ha tautolu ke he gahua he fonua?
5 Kua molea tuai e 130 e tau ne fakaaoga ai e tau tuleke he ha tautolu a gahua he fonua. Pete he kehekehe e tau lalahi mo e puhala ne talaga aki, ko e tau koloa lauia mitaki lahi a ia he gahua fakamatala. Kia fakaaoga fakamitaki e tautolu e puhala foou nei ne taute aki ai ke matutaki ke folafola e iloilo he Tohi Tapu ke he lalolagi katoa.—Fakatai 15:7a.