Fakaaoga e jw.org he Fekafekauaga Haau

Ko e faahi Kupega Hila ha tautolu ko e koloa aoga lahi ke lagomatai a tautolu ke folafola e tala mitaki “ke hoko ni ke he fakaotiaga [tau kala oti] he lalolagi.” (Gahua 1:8) Laulahi he tau tagata he tau kaina ne nakai iloa ne lautolu e jw.org. Kua iloa e lautolu ha kua tala age he taha tagata fakailoa.

Ko e leveki faifano ne tuku e vitiō Ko e Ha ne Fakaako e Tohi Tapu? he telefoni haana ti fakakite ai he tau magaaho oti ka maeke a ia. Ma e fakatai, ka fano he taha fale ke he taha fale, pehē a ia: “Kua ahiahi fakakū mai au ke lagomatai e tau tagata ke moua e tau tali ke he tolu e hūhū aoga: Ko e ha e lalolagi ne loga lahi e tau lekua? To fakahako fēfē ai he Atua? Ti maeke fēfē ia tautolu ke fahia mogonei? Tali he vitiō kū nei e tau hūhū ia.” Ti kamata a ia ke fakakite ai mo e onoono ke he tagata he kaina. Kua omoomoi lahi e vitiō ti laulahi he tau tagata ne nakai utakehe e tau mata mai he telefoni ato oti ai. Ti pehē mogoia e leveki faifano: “Kua logona e koe na maeke ke tuku e ole haau he Initanete ma e fakaako Tohi Tapu. Ha kua hoko mai au, maeke au ke fakakite atu fakamafiti e puhala ki a koe mogonei.” Ka talia he tagata he kaina, ne fakakite e ia e puhala ka taute ai he fakaaoga e porosua Tala Mitaki. Ka nakai fai magaaho e tagata he kaina, ne fakatokatoka e ia ke taute ka liu atu he taha mogo. Ka fano a ia ke he fale inu kofe ke okioki, ne talahau foki e ia taha mena pihia ke he tagata ne nofo tata mai he kamata a laua ke tutala. Kua fakaaoga nakai e koe e jw.org he fekafekauaga haau?