Fakatolomaki ki Mua e Lotomatala ha Tautolu he Fekafekauaga​—Fakakite e Fiafia Fakatagata

Kakano kua Aoga Ai: Ne onoono a Iesu ke he tau tagata ko e tau tagata takitaha, ti fakakite e ia e fiafia mafanatia fakatagata ki a lautolu. Ma e fakatai, taha mogo ne liga mailoga e Iesu e hopoate he tagata teligatuli, ti ko e mogo ne fakamaulu ai e ia, ne uta e ia a ia tokotaha mai he tau tagata. (Mare. 7:31-35) Ne manamanatu a ia ke he tau tutaki haana he mailoga e tau kūkū ha lautolu mo e nakai tapoohi a lautolu aki e tau vala tala loga. (Ioane 16:12) Pete foki he tuaga ha Iesu he lagi, ne fakakite e ia e fiafia fakatagata. (2 Timo. 4:17) Ha ko e tau tutaki he Keriso, manako a tautolu ke fifitaki a ia. (1 Pete. 2:21; 1 Ioa. 3:16, 18) Mua atu, to lauia mitaki lahi e gahua ha tautolu he fonua ka manamanatu a tautolu ke he tagata he kaina mo e mailoga e tau tuaga matakehe, tau fiafia, mo e tau tupetupe haana. To liga manako a ia ke fanogonogo kaeke ke mailoga e ia kua nakai ni ko e matagahua ha tautolu ke uta e fekau po ke age e tau tohi; ka e pihia foki kua fiafia a tautolu ki a ia.