Aoga Fekafekau Fakateokarasi he 2015 ka Lagomatai a Tautolu ke Fakaholo ki Mua e Puhala Fakaako
1 Ne tohi he salamo ko Tavita: “Kia mitaki foki kia koe e tau kupu he haku gutu, mo e tau manamanatu he haku loto, Iehova na e, ko e haku a maka tumau mo e haku a lukutoto.” (Sala. 19:14) Manako foki a tautolu ke he tau kupu ha tautolu ke fiafia a Iehova ki ai ha kua tokiofa e tautolu e lilifu ha tautolu he vagahau fakamooli i loto he fakapotopotoaga mo e gahua he fonua. Ko e Aoga Fekafekau Fakateokarasi ko e taha he tau puhala kua fakamahani e Iehova a tautolu ma e gahua he fonua. Kua fakahoko e fakamahaniaga nei he tau faahi tapu takitaha ke he molea 111,000 he tau fakapotopotoaga he lalolagi katoa. Lagomatai ai e tau matakainaga he lalolagi katoa mai he tau momoui kehekehe ke latatonu ke eke mo tau fekafekau he tala mitaki, maeke ke fakaako mo e fakalagalaga, fakailoilo, mo e fakamalolō.—Gahua 19:8; Kolo. 4:6.
2 Ko e setulu he aoga ma e 2015 to putoia e tau matakupu ne ha ha i loto he tohi tote Hafagiaga ke he Kupu he Atua mo e porosua, Tala Mitaki Mai he Atua! Lafi ki ai, kua taute e tau hikihikiaga ke he magaaho fafati ma e tau fakamaamaaga he Tohi Tapu mo e Kotofaaga Nu. 1. Ko e tau hikiaga nei fakalataha mo e tau fakatonuaga ke he tau vala he aoga kua fakamaama he tau paratafa na i lalo.
3 Tau Fakamaamaaga he Tohi Tapu: Ko e tau matakainaga taane ne kotofa ki ai e vala nei to ua e minuti ke fakatutala taha e manatu fakalagalaga mo e aoga he Tohi Tapu mai he totouaga he Tohi Tapu he faahi tapu. Ko e mautauteute mitaki to maeke ke talahau e manatu uho ke he fakapotopotoaga he magaaho fafati. Magaaho fakamui, to ono e minuti fa mahani he fakapotopotoaga ke talahau e tau talahauaga ne 30 e sekone po ke nakai molea ke he mena ne loto fakaaue a lautolu ki ai he totouaga he Tohi Tapu he faahi tapu. Kua lata ke mautauteute mo e fakamahani he tagata a ia ke foaki e talahauaga fai kakano ke he 30 e sekone, ka ko e taute pihia ko e fakamahaniaga mitaki ma tautolu. Hafagi foki e magaaho ma e falu ke talahau e tau mena ne iloa e lautolu he ha lautolu a kumikumi fakatagata.
4 Kotofaaga Nu. 1: Ko e magaaho fafati ma e totouaga he Tohi Tapu kua fakatote hifo ke tolu e minuti po ke nakai molea mo e nakai lahi e vala totou. Ko lautolu kua moua e kotofaaga ke totou kua lata ke fakaako lagaloga ai he totou fakaleolahi mo e hagaaki fakalahi ke he fakaleo fakahako mo e holo mitaki ke fakakite e manatu mo e maama. Ko e tau tagata oti ha Iehova kua lata ke eketaha ke totou fakamitaki, ha ko e totou kua uho lahi ke he tapuakiaga ha tautolu. Ko e fiafia ha ia ha tautolu ha kua tokologa e tau fanau ha tautolu ne totou mitaki! Kua nava ke he tau matua ha ko e tau laliaga fakaalofa ha lautolu ke lagomatai e tau fanau ha lautolu ke eke mo tau tagata totou mitaki.
5 Kotofaaga Nu. 2: Ko e fakataitaiaga nei ne lima e minuti ka kotofa ke he matakainaga fifine. Kua lata ke fakaaoga e matakupu ne kotofa. Lata he tagata fakaako ke mailoga kua fakaaoga e vala tala ke he puhala he gahua he fonua ne tupu mooli mo e aoga ma e matakavi. Ka fakavē e kotofaaga ke he vala tala mai he porosua Tala Mitaki Mai he Atua!, ko e “Totou” he tau kupu tohi kua lata ke fakaaoga mo matapatu he fakatutalaaga. To kotofa he leveki aoga taha e lagomatai.
6 Kotofaaga Nu. 3: Ko e fakataitaiaga nei ne lima e minuti ka kotofa ke he matakainaga taane po ke matakainaga fifine. Ka kotofa ke he matakainaga fifine, to taute e vala nei tuga he fakatoka ke he Kotofaaga Nu. 2.
7 Vala Foou he Kotofaaga Nu. 3 ma e Tau Matakainaga Taane: Ka kotofa age e kotofaaga ke he matakainaga taane, kua lata ke taute tuga e fakataitaiaga he tapuakiaga magafaoa po ke gahua he fonua. Fa mahani to kotofa he leveki aoga e lagomatai mo e fakatokaaga. Ko e lagomatai kua lata ni ke he tagata he magafaoa he tagata fakaako po ke matakainaga taane he fakapotopotoaga. Ka fakavē e vala tala ke he porosua Tala Mitaki, ko e “Totou” he tau kupu tohi kua lata ke fakaaoga ko e matapatu he fakatutalaaga. He falu mogo, to liga kotofa e motua ke taute e vala nei. Maeke he tau motua ke fifili ni e lautolu e lagomatai mo e fakatokaaga ha lautolu. To fakamalolō mooli ma e fakapotopotoaga ke kitia e tau motua kua fakatātā e puhala fakaako mo e tagata he magafaoa po ke taha matakainaga taane.
Fakaholo ki mua he talia mo e fakagahua e fakatonuaga
8 Fakatonu: To fakaaoga he leveki aoga ua e minuti ka mole e fakataitaiaga he tagata fakaako ke nava ki ai ti pihia mo e fakatonuaga atihake ne fakavē ke he Benefit From Theocratic Ministry School Education. Ka talahau he leveki aoga e vala he tagata fakaako he setulu, to nakai fakailoa e ia e manatu he fakatonuaga kua gahua ki ai e tagata fakaako. Ka oti e tau fakataitaiaga takitaha kua lata he leveki ke tuku atu e tau nava mooli, he fakailoa e fakatonuaga ne gahua ki ai e tagata fakaako ti talahau fakatonu e kakano ne mitaki e vala ia he tagata fakaako po ke fakamaama mo e totonu e kakano ne aoga ai ma e tagata fakaako ke onoono fakamitaki ke he manatu pauaki ia.
9 Ko e laupepa fakatonu he tagata fakaako ka haia he lagaki ni haana he tohi Ministry School he lau 79 ke he 81. Ka oti e taute he tagata fakaako e kotofaaga haana, to fakamau he leveki aoga e tau manatu kua latatonu he tohi he tagata fakaako ti hūhū ke he tagata fakaako kua taute nakai e ia e tau manatu fakatonu ne kotofa ke he vala ia. Ko e navaaga pihia mo e falu lagomataiaga lafi ki luga ne liga tala age ke he tagata fakaako ka hili e feleveiaaga po ke taha magaaho foki. Ko e lagomataiaga fakatagata kua igatia e tagata fakaako ke moua he aoga kua lata ke onoono ki ai ko e magaaho ke lagomatai a ia ke holo ki mua fakaagaaga.—1 Timo. 4:15.
10 Ka molea e magaaho fafati he tagata fakaako, ko e leveki aoga po ke lagomatai kua lata ke fakailoa ki a ia, tuga he tā e logo, po ke tātā taha mena, he fakakite fakailoilo kua lata tuai ke oti. Kua lata e tagata fakaako ke mailoga e fakailoaaga nei mo e fakaoti e alaga kupu fakahiku haana ti hifo mai ki lalo.—Kikite tohi Ministry School, lau 282, para. 4.
11 Ko lautolu oti kua felauaki mo e tau puhala ia ne fakalagalaga ke hū he Aoga Fekafekau Fakateokarasi. (Kikite tohi Ministry School, lau 282, para. 6.) Ko e fakaakoaga ne foaki he aoga nei kua fakamalolō e tau tagata ha Iehova ke fakamatala mo e fakaako e tala mitaki he Kautu mo e hakahakau, fakalilifu, mo e fakaalofa. Nakai noa kua fiafia a Iehova ke he fakahekeaga ha lautolu oti kua aoga lahi mahaki mai he fakaakoaga fakateokarasi!—Sala. 148:12, 13; Isaia 50:4.