Tau Lologo Foou ma e Tapuakiaga!
1 He fonoaga foou kua mole laia ne lagataha he tau he Watch Tower Bible and Tract Society of Pennsylvania, ne fakahoko ia Oketopa 4, 2014, ne fakailoa e tau fakatokaaga ke liu fakafoou e tohi lologo ha tautolu mogonei. Ko e tala ofoofogia mooli a ia! Fakamanatu ai ke he toloaga katoa e aoga ne kua latatonu he tau lologo ha tautolu he Kautu ma e tapuakiaga ha tautolu.—Sala. 96:2.
2 Manamanatu a koe, ‘Ko e ha kua lata ke fakafoou e tohi lologo?’ Loga e kakano. Fakamua, ko e maamaaga ha tautolu ke he tau Tohiaga Tapu kua matutaki ke fakamaama, ti lauia ai e tau kupu he tau lologo ha tautolu. (Fakatai 4:18) Taha kakano foki ma e fakafoouaga: Loga e talahauaga mo e tau matakupu ne fakaaoga he tohi lologo mogonei ne moua mai he liliuaga fakamua he New World Translation. Kua lata e tau kupu lologo ia ke hiki ke fakatatai mo e tau kupu he liliuaga foou. Ha kua lahi e gahua kua lata ke taute ke fakafoou e tau kupu lologo, kua fifili foki ke lafi ki ai e tau lologo foou ke he tohi.
3 To fakatali kia a tautolu ke lomi e tohi lologo foou ato maeke a tautolu ke fakaaoga e tau lologo foou? Nakai. Kua fiafia a mautolu ke fakailoa atu he falu mahina i mua to fakatoka mai e tau lologo foou he ha tautolu a faahi Kupega Hila he jw.org. Ka fakatoka mai e lologo foou, to setulu ai he matahiku he Feleveiaaga Fekafekau mo e talahauaga “lologo foou.”
4 Puhala ke Fakaako e Tau Lologo Foou: Liga paleko ke fakaako e lologo foou. Tuga ni e salamo, manako a tautolu ke lologo fakaleolahi he tau feleveiaaga he fakapotopotoaga mo e “aua foki neke fakamate.” (Sala. 30:12) Ke fakaako e lologo foou, muitua e tau lakaaga mukamuka nei.
Fanogonogo tafeliuaki ke he tapakiaga piano he lologo, ka tuku hake he ha tautolu a faahi Kupega Hila. Ko e lahi he fanogonogo haau ke he leo kofe, to mukamuka lahi ki a koe ke manatu ai.
Fakaako e tau kupu lologo, ti lali ke ako manatu ai.
Tā e leo kofe ti uhu fakalataha mo e tau kupu lologo. Uhu ato iloa mitaki e koe e lologo.
Fakamahani lagaloga e tau lologo foou he ha mutolu a magaaho Tapuakiaga he Magafaoa ato iloa he magafaoa haau e tau kupu.
5 He tau mahina i mua ka setulu e lologo foou ke fakaoti aki e Feleveiaaga Fekafekau, to fanogonogo lagataha he fakapotopotoaga e tapakiaga piano. To uhu he toloaga e lologo fakalataha mo e tapakiaga piano, tuga ne taute e tautolu ke he falu lologo.
6 Ka manamanatu a koe ki ai, ko e lologo he tau feleveiaaga ha tautolu kua lagomatai ai ke foaki mai e fiafia he lologo auloa a tautolu ke fakaheke ki a Iehova. Ko e mena ia, kua nakai lata ia tautolu ke o kehe noa ni mai he tau nonofoaga ka kamata e lologo he tau feleveiaaga Kerisiano ha tautolu.
7 Ha ha i ai foki taha puhala ka fakakite e tautolu e loto fakaaue kua tonu ma e leo kofe fakaagaaga ha tautolu. He tau toloaga mo e tau fonoaga, ko e tau leo lologo hafagi kua tā ato kamata e tau fakaholoaga takitaha. Lagaua he tau, ko e tau matakainaga taane mo e fifine mai he tau faahi oti he lalolagi kua o atu he totogi ne lautolu e tau puhala ha lautolu ki Patterson i New York, ke maeke ke taute e tau leo kofe fulufuluola ke fakaaoga he tapuakiaga ha tautolu. Ka uiina he tagata nofoa a tautolu ke nonofo mo e fanogonogo ke he tau leo kofe fakatagitagi ne kua tauteute, kua lata ia tautolu ke taute pihia. Ko e taute pihia ka lagomatai a tautolu ke mautauteute e tau loto ha tautolu ma e vala tala ka mui mai.—Esera 7:10.
8 To fakaoti e feleveiaaga ha tautolu he aho nei aki e lologo foou ne mataulu “Kua Fakatū Tuai e Kautu—Kia Hoko Mai Ai!” Ko e lologo nei ne kua fakamaama he feleveiaaga foou he tau tau takitaha, ne fati pauaki ke fakamailoga aki e 100 tau he fanauaga he Kautu.
9 Ko e tau lologo foou ko e “tau mena mitaki” mooli mai ia Iehova. (Mata. 12:35a) Kia eketaha a tautolu ke fakaako e tau lologo foou nei mo e uhu ai mai he tau loto ha tautolu ne kua latatonu ke fakaheke mo e fakalilifu e Atua ha tautolu!—Sala. 147:1.