Ko e Tohi Mai he Kau Fakatufono
Tau Matakainaga Fakamoli Fakahele ha Iehova:
Ne fakaaoga he aposetolo ko Paulo e tau magaaho oti ke fakakite e fakaalofa mo e loto fakaaue ma e tau matakainaga talitonu haana. Ke he tau Kerisiano i Roma, ne tohia e ia: “Kua fakaaue atu au ke he haku a Atua kia Iesu Keriso ha ko mutolu oti, ha kua talahaua e tua ha mutolu ke he lalolagi oti.” (Roma 1:8) E, ke he faahi katoa he Pule Atu Motu Roma, kua talahaua e tau Kerisiano ia ma e tua malolō ha lautolu, pihia foki mo e gahua fakamatala makutu ha lautolu. (1 Tesa. 1:8) Kakano haia ati hokulo e fakaalofa hohofi ha Paulo ma e tau matakainaga haana!
Ke tuga a Paulo, kua fakaaue a mautolu ki a Iehova he tau magaaho oti ne manamanatu a mautolu ki a mutolu. Kua fakaalofa hofihofi a mautolu ki a mutolu oti! Kia mauokafua a mutolu ke he fakaalofa a Iehova ma mutolu takitokotaha. Ko e falu ia mutolu kua fehagai mo e totokoaga velagia, ka kua fakatumau a mutolu ke fakamatala. Ti ko e agaaga malolō mo e mauokafua hane fakakite e mutolu kua taute mooli e loto a Iehova ke fiafia!—Fakatai 27:11.
He totou mo e manamanatu fakahokulo a mutolu ke he “Tau Gahua he Tau Fakamoli a Iehova he Vahā Foou Nei” ne fakakite i loto he fufuta nei he Yearbook ne fakalagalaga mo e atihake e tua, to kitia e koe e tau fakamooliaga loga kua finatu ai e Iki ko Iesu Keriso “kua kautu, to kautu ni a ia” ti ko e ha kavanaakau ka fakaaoga ke tau ke he tau tutaki he Keriso to nakai monuina ai.—Fakakite. 6:2; Isaia 54:17.
Ke he tau Kerisiano i Filipi, ne tohia e Paulo: “Kua fakaaue atu au ke he Atua haku . . . ha ko e ha mutolu a fakafetui fakalataha ke he tau mena he vagahau mitaki.” (Filipi 1:3-5) Kua pihia foki e logonaaga ha mautolu he Kau Fakatufono hagaao ki a mutolu. He tau he fekafekauaga he 2007, ne 6,691,790 e tagata fakailoa ne fakaaoga e 1,431,761,554 e tulā he katoa ke fakamatala e vagahau mitaki ke he 236 e motu ke he lalolagi katoa. Ko e laliaga lahi mahaki ha ia hane taute e mutolu ke fakatupu tolomaki e vagahau mitaki! Manamanatu la ke he totou teau e tau afe he tau momoui ne kua lagomatai ha ko e tau laliaga auloa ha tautolu, ne taute pauaki ai ke fakaheke a Iehova!
He taha magaaho foki, ne fakakite e Paulo e manamanatu hohofi lahi ma e tau matakainaga haana. Ne tohia a ia ki a lautolu i Tesalonia: “Kua nakai noa ha mautolu a manatu ke he . . . fakauka ke he amaamanaki ke he Iki ha tautolu ko Iesu Keriso, ki mua he Atua, ko e Matua ha tautolu haia.” (1 Tesa. 1:2, 3) E, kua nakai noa e moui mo e tau paleko. Na tutupu e tau lekua, ka kua aoga lahi ia tautolu ke fakauka. Ko e heigoa e tau paleko hane fehagai fakatagata mo koe? Kua hogohogomanava kia a koe ha kua gagao lahi ti fakakaupā e tau mena kua maeke ia koe ke taute he fekafekauaga a Iehova? Kua loga kia e tau tau ne mate e hoa fakahele haau ha ko e fī lotokai lahi ko e tukuaga, po ko Seoli? (Fakatai 30:15, 16) Kua kaumahala kia a koe he lali ke moua e hoa he fakamauaga ne fakaalofa foki ki a Iehova, he pipiki mo e tua fakamooli a koe ke he fakatonuaga he Tohiaga Tapu ke mau ni ke lata mo e Iki? (1 Kori. 7:39) Kua lali kia a koe ke feaki e fanau haau he lotouho he tau tutūaga fakatupe ne uka fefeke? Ko e heigoa ni e tuaga haau, ka tuku mua e koe e fiafia he Kautu he manamanatuaga haau, ti iloa mooli e koe to nakai “fakanimonimo ai e [Iehova] ha mutolu a tau gahua, mo e gahua fakamalolo he fakaalofa kua fakakite mai ai e mutolu ke he hana higoa.” Fakamolemole, ma tau matakainaga, kia “aua neke fakalolelole a tautolu ke he mahani mitaki”!—Hepe. 6:10; Kala. 6:9.
Ko e heigoa ka maeke ai a koe ke fakauka? Ke tuga e tau Tesalonia, ko e “amaamanaki ke he Iki ha tautolu ko Iesu Keriso.” Ma e kakano mitaki, ne fakataitai e Paulo e ‘amaamanakiaga he fakamouiaga’ ke he potiki maō ka puipui e Kerisiano mai he tau manamanatu kelea mo e he fakauaua tumau.—1 Tesa. 5:8.
Mooli ai, he fakauka fiafia, kua foaki e koe e tali ke he fakafiufiu ha Satani he matakupu lahi hagaao ke he pule katoatoa ke he lagi mo e lalolagi. Ne talahau e Satani na fanau mai mo e lotokai e tau fekafekau he Atua ti pete he fakamakai a lautolu ke fekafekau ke he Atua ke he magaaho kū, to tote hifo fakahaga e tapuakiaga ha lautolu kaeke ke holo ki mua e tau kamatamata po ke kaeke ke loaloa atu foki e fakatokaaga nei ke he mena ne amanaki a lautolu ki ai. Kua ha ha ia koe e fifiliaga ke fakatapakupaku e Tiapolo ko e pikopiko fakalialia! Ti ko e tau aho takitaha he moui haau kua fakatata atu a koe ke mailoga e amaamanakiaga haau.
Tuga ni ne fakaaoga fiafia e Paulo e tau magaaho ke nava ke he tau matakainaga haana ma e ha lautolu a tua malolō lahi, ke he putoiaaga fakamakai ha lautolu ke he gahua fakamatala, mo e ha lautolu a fakauka, kua fakaaoga fiafia foki e mautolu e magaaho nei ke nava ki a mutolu mo e ke fakamafana atu e fakaalofa ha mautolu ki a mutolu. Kia fakatumau ā ke he tau gahua mitaki!
Kia eke ai e tau ka hau ke puke he tau monuina fakaagaaga loga. Mo e tau manatu mitaki oti, ko mautolu ko e
Ha mutolu a tau matakainaga,
Kau Fakatufono he Tau Fakamoli a Iehova